Matyu 17

Yesus aqa jejamu bulyonaq naŋgi unobeiteb

1Yesus a na naŋgi anjam degsi minjrsiq koboonaqa bati 6-pela onaqa a tigelosiqa Pita na Jems na aqa aube Jon na naŋgi qalub joqsiqa koba na mana goge kobaq oqeb. Naŋgi segi qalub oqsib di soqneb. 2Sosib Yesus aqa jejamu bulyonaq naŋgi unobeiteb. Aqa ulatamu seŋ bul tulaŋ suwaŋoqnej. Aqa gara dego tulaŋ puloŋosiq qatekritej. 3Onaqa Moses wo Elaija wo brantosib Yesus ombla anjam maroqneb. 4Onaqa Pita a naŋgi aiyel unjrsiqa Yesus minjej, “O Tamo Koba, Moses wo Elaija wo bosib iga koba na endi unum di bolequja. Deqa ni na e odbimqa e tal kiñilala qalub gereiyqai. Bei ino. Bei Moses aqa. Bei Elaija aqa.”

5Pita a degsi mareqnaqa laŋbi tulaŋ suwaŋo aisiqa naŋgi kabutnjrej. Onaqa laŋbi miligiq dena anjam bei endegsi brantonaq naŋgi queb, “Endi ijo Aŋgro qujai e na tulaŋ qalaqalaiyeqnum qaji. E a qa tulaŋ areboleboleibeqnu. Deqa niŋgi aqa anjam quetoqniye.”

6Onaqa Yesus aqa aŋgro naŋgi anjam di qusibqa naŋgi tulaŋ ulaugeteb. Osib siŋga pulutosib mandamq di ŋam quosib ŋereŋeb. 7Onaqa Yesus a naŋgo areq gilsiqa naŋgo gateq di aqa baŋ atsiqa minjrej, “Niŋgi tigeliye. Niŋgi ulaaib.” 8Onaqa naŋgi tigelosib ŋam ateb Yesus a segi naŋgi koba na sonab uneb. Naŋgi tamo bei unosai.

9Ariya naŋgi Yesus ombla manaq dena olo aioqnsibqa Yesus a siŋgila na minjrej, “Kumbra niŋgi mana goge di unonub qaji di ubtsib tamo qudei minjraib. Bunuqna e Tamo Aŋgro moisiy olo subq na tigelotqa bati deqa niŋgi na ubtsib minjroqnqab.”

10Onaqa naŋgi Yesus aqa anjam di qusib kamba minjeb, “Dal anjam qalie tamo naŋgi mareqnub, ‘Elaija a namo bamqa Kristus a bunuqna bqas.’ Anjam di kiyaqa degsib mareqnub?”

11Onaqa Yesus na minjrej, “Naŋgo anjam di bole. Elaija a namo bosim tamo uŋgasari kalil naŋgo areqalo gereiyetnjrsim soqnimqa bunuqna Kristus bqas. 12Ariya e niŋgi endegsi merŋgwai. Elaija agi bej. Bonaqa tamo naŋgi a qa poinjrosai. Deqa kumbra kalil naŋgi a qa yqajqa are soqnej qaji agi yeb. Ysibqa agi qaleb. E Tamo Aŋgro dego degsib kumbra uge ebqab.” 13Yesus a naŋgi degsi minjrnaqa naŋgi qusib poinjrej, “Bole, Yesus a Elaija qa bole marosai. A Jon yansnjro qaji tamo qa marqa osiqa Elaija aqa ñam na yawo anjam marqo.”

Yesus na aŋgro mel bei mondor uge ti soqnej qaji di boletej

14Ariya Yesus na aqa aŋgro qalub naŋgi di joqsiqa koba na manaq dena olo aisib tamo uŋgasari tulaŋ gargekoba mana utruq dia tariŋeqnab itnjreb. Onaqa tamo bei a bosiqa Yesus aqa areq di siŋga pulutosiqa minjej, 15“O Tamo Koba, ni ijo aŋgro mel qa are ugeimimqa aqaryaiye. A bati gaigai nanarioqnsiqa dena aqa jejamu ugeteqnu. Bati gargekoba a uloŋoqnsiqa ŋamyuoq o yaq aieqnu. 16Deqa e na a osim ino aŋgro naŋgi qa osi bonumqa naŋgi na boletqa yonub keresaiinjrqo.”

17Onaqa Yesus a anjam di qusiqa endegsi marej, “Niŋgi tamo uŋgasari bini bati endeqa unub qaji nuŋgo areqalo e qa siŋgilatosai bolesai. Nuŋgo kumbra ti nuŋgo areqalo ti tulaŋ uge. Bati gembub e niŋgi koba na sosiyqa nuŋgo gulube di qoboiyoqnqai? Aŋgro mel di ijo areq osi boiye.” 18Onaqa osi bonabqa Yesus na mondor uge di ŋiriŋtosiq minjej, “Ni aŋgro di uratosim ulaŋ.” Degsi minjnaqa mondor uge na aŋgro di uratosiq ulaŋej. Onaqa bati qujai deqa aŋgro a boleej.

19Onaqa Yesus aqa aŋgro naŋgi aqa areq lumu bosib nenemyeb, “Iga kiyaqa mondor uge di wiyqa yonumqa keresaiigwo?”

20Onaqa Yesus na minjrej, “Niŋgi e qa nuŋgo areqalo siŋgilatqa yonub niŋgi tulaŋ truquonub. Deqa niŋgi mondor uge di wiyqa yonub keresaiiŋgwo. Niŋgi quiye. E bole merŋgwai. Nuŋgo areqalo e qa siŋgilatonub qaji di sis yago bul kiñala sqas di kereqas. Degesqas di niŋgi mana kobaquja endi minjibqa a nuŋgo anjam dauryosim tigelosim sawa beiq gilqas. Nuŋgo areqalo e qa siŋgilatonub qaji degesqas di niŋgi kumbra kalil yqa kereiŋgwas. 21Deqa niŋgi mondor uge deqaji winjrqa osibqa Qotei pailyqa osib ya uratosib qurieŋosib sosib pailyqab dena qujai niŋgi na mondor uge winjrib jaraiqab. Gam bei na sai.”

Yesus a moisim olo subq na tigelqas deqa aqa aŋgro naŋgi olo minjrej

22Onaqa Yesus na aqa aŋgro naŋgi olo joqsiqa koba na sawa di uratosib Galili sawaq gilsib dia sosibqa Yesus na minjrej, “E Tamo Aŋgro. Deqa jeu tamo naŋgi na e ojsib qaja tamo naŋgo baŋq di e atqab 23Atib lubib moiqai. Bati qalub koboamqa e olo subq na tigelqai.” Ariya Yesus aqa aŋgro naŋgi aqa anjam di qusib utru poinjrosai. Deqa naŋgi are tulaŋ gulubekobainjrej.

Yesus a atra tal qaji takis waiyej

24Onaqa bati bei Yesus aqa aŋgro naŋgi koba na walwelosib Kaperneam qureq gileb. Gilsib di sonabqa atra tal qaji takis o tamo naŋgi Pita aqa areq bosib nenemyeb, “Nuŋgo Tamo Koba a atra tal qaji takis oqnsiq ateqnu e?” 25Onaqa Pita na minjrej, “Od, a ateqnu.”

Osiqa tal gogetosiqa anjam di Yesus minjqa laqnaqa Yesus a nami qalieosiq deqa minjoqujatej, “O Saimon, ni kiersi are qalonum? Mandam endeqaji mandor kokba naŋgi yai naŋgoq dena takis eleŋeqnub? Naŋgo segi aŋgro naŋgoq dena eqnub kio tamo laŋaj naŋgoq dena eqnub kio?” 26Onaqa Pita na kamba minjej, “Tamo laŋaj naŋgoq dena eqnub. Naŋgo segi aŋgro naŋgoq dena osaieqnub.” Onaqa Yesus na minjej, “Ni kere maronum. Mandor kokba naŋgo segi aŋgro naŋgi na takis atosaieqnub. Tamo laŋaj naŋgi na takis ateleŋeqnub. 27Deqa e atra tal qaji takis atqa uratqai di kere. Di kiyaqa? E segi Qotei aqa Aŋgro deqa. Uŋgum. Iga takis o qaji tamo naŋgo are ugetetnjrqasai. Deqa ni alile aisim yima waiysim qe namoqna oqam qaji di aqa medabu waqtosimqa aqa medabu miligiq di silali bei soqnim unqam. Unsim silali di osi gilsim gago aiyel qa takis atqa osimqa takis o qaji tamo naŋgi enjre.” Onaqa Pita a Yesus aqa anjam di dauryosiqa aisiq qe aqa medabu miligiq di silali itsiqa osi gilsiq takis o qaji tamo naŋgi enjrej.

Currently Selected:

Matyu 17: bojNT

Highlight

Copy