LUKA 4

Setan tah Zisu a tuhso

(Mt 4:1-11; Mk 1:12-13)

1Zisu cawh Thlawpaw Pathai tah chih ka, Jordan tuivaw taitah va kaw kaw ka, Thlawpaw taco raangcaa lang a seikhui. 2Ma leco Setan tah ning songli chung tuhso ka, ma chung vytei cawh zehmai a e lynah cawtah a hning taco a ngai a di.

3Setan taco, “Khazing Sawcapaw na cang caco, ma alung heh very tah cang law tah ca!” tatah a tah.

4Zisu taco, “Khazing bia letah ma hrahei ciapaw a cang, ‘Cawngsaw heh very suipaw tah aa hring tlung be!’ ”#Biary 8:3 tatah a chai.

5Setan taco Zisu cawh tlaang sangpaw lang kekhui ka, khazaw painah raang vytei khah sungkheh tah hmuhsah ka, 6taico a hai letah, “Ma vytei nawhnuinah le a rungnawnah heh ka ca pae a, zecawtamaw tatah ma heh kama letah pehpaw cang thah he ka, ka dupaw maikaw cawh ka peh khy he. 7Macawtaco, na pa beh caco, ma vytei heh na tei a cang a,” a tah.

8Zisu taco, “Capathai letah ma hrahei cia a cang, ‘Abuipaw na Khazing khah beh la, Ama a rai suipaw hre my lo,’#Biary 6:13 tah a cang,” tatah a palei.

9Setan tah Zisu cawh Jerusalem khuapui lang seikhui ka, behnah ing a sangcainah ing cung lekhei a dawsah ka, “Khazing Sawcapaw na cang caco, ma taihei a zythlah tua. 10Zecawtamaw tatah ma hrahei cia a cang,

‘Nama na kong lehei Khazing tah

a vaiming sahlo khah naw pei a he ka,

11na phe cawh alung letah

na khong ly nápawtah aa kiá tah aa ca caling a,’#Hlaw 91:11-12 a tah,”

tatah a tah.

12Zisu tah, “Abuipaw na Khazing cawh hnehsah kheh, tahpaw a cang,”#Biary 6:16 tatah a chai.

13Setan tah Zisu cawh ma vytei hrahei a tuhso khy taitah hmelang cai a raicangpaw cawtah a seisai.

Nazaret letah Zisu du bei he

(Mt 4:12-17; 13:53-58; Mk 1:14-15; 6:1-6)

14Thlawpaw Pathai thawtlungnah khatah Zisu cawh Galili raang lang a paleh kaw ka, a konglang cawh khuapui kaekang vytei letah a thang. 15Aa synagog#4:15 Synagog cawh, Juda sahlo behnah ing, a cang. sahlo letah cawngpah he ka, ming vytei tah Ama cawh aa reithai.

16A changchynah khua Nazaret khua lang cawh sei ka, Sabat#4:16 Sabat cawh, Juda cawngsaw sahlo a hianah ning, a cang. ning taco a tua teipaw phung hratah synagog lang kha a nae. Taico capathai rei pawtah a daw. 17Khazing khuavang Isaiah bia, sapho lingpaw cabu cawh a kih letah aa hlai. Ma cabu cawh pathlang ka, ma hratei ciapaw khah a hmuh,

18“Abuipaw Thlawpaw cawh ka cung letah a ung,

zecawtamaw tatah mehsisah sahlo hai letah

thawngchawbia rei rua pawtah kama cawh sathy thu tah a pa thing.

Thong letei a tangpaw sahlo he piachuanah ruapaw tlang y pawtah pa taw ka,

a mehcopaw sahlo mehvang sápaw le tlaihnawh a cangpaw sahlo thochua rua pawtah le,

19Abuipaw dukhuipaw kung kong y khui rua pawtah,”#Isai 61:1-2

tahpaw heh.

20Mataico sapho lingpaw cabu cawh ling kaw ka, a kaitu khah pei ka, a ty. Synagog chung letei ming vytei taco a cung letah aa meh aa chia thlu thlang. 21Aa hai leco, “Atoning letah ma Capathai heh naa thuipaw tei hrahei a tling myca,” a tah he.

22Ming maikaw tah a kong chaw rei he ka, a kaw taitei ningdonah bia a chuhpaw cung leco aa ningang ngetei thlu ka, “Ma heh Josef a sawcapaw khah cang bei maw?” aa tah.

23Zisu tah aa hai leco, “Ma phungthluh bia heh naa pa reiso hrahring tae hi, ‘Sibuipaw, nama le nama a dangsah tua, Kapernaum khua letei na tuapaw kaa thuipaw khah ma na changchynah khua lehei tua hrah!’ tahpaw heh.

24Biahmuisui ka ca ching he, Khazing khuavang cawh ama a pinah khua leco cyhlang bei he. 25Khazing khuavang Elija chai lekhei, Israel raang chung letah lahme hlupui a ung he. Kung thung le a chy khua kaang ka, raang pungpaluh letah cakaang a thaw tah a tlung. 26Canghrasala Elija cawh Israel raang lahme maikaw khatah taw cang hlui be. Sidon raang, Zarefat khua letei a ungpaw lahme khatah suipaw taw a cang. 27Mataico, Khazing khuavang Elisha chaining zong takhei, Israel raang chung letah mehthinghmui hlupui a ung he. Canghrasala Siria cawngsaw Naaman tah cy ly co ahohmai a dangsah tlung bei he,” tatah a tah he.

28Synagog letei a ungpaw ming vytei tah aa thui tihtah aa thing aa ae ngetei. 29Tho he ka, Ama cawh khua lailang papia he ka, aa khuathui tlaang, lungkang lang nang thlah pawtah aa seikhui. 30Canghrasala zawpui hrong taikhei a zuh thlah ka, a seihly.

Zisu tah thlawpaw pialuipaw a tingchua

(Mk 1:21-28)

31Ma khy taico Galili raang, Kapernaum khua lang cawh cungthlah ka, Sabat ning tah zawpui khah a cawngpah he. 32A bia cawh nawhnuinah chi tah a cangnah cawtah a cawngpahnah cawh aa khuarawh a haa thlang.

33Synagog leco, thlawpaw pialuipaw tei a tlepaw cawngsaw pakheh ung ka, a thangpui tah y ka, 34“Vy, Nazaret Zisu, kaaning khahei zemaw na du? Kaaning hlyde ruapaw tamaw na vong? Nama cawh ahomaw na cang tahpaw ka hni, Khazing Mehpathai na cang,” tatah a tah.

35Zisu tah, “De teitah ung! A chung taikhei ka pia,” tatah a hrangso. Ma khy taico thlawpaw pialuipaw tah ma cawngsawpaw cawh ming vytei mehmuh leco phongchai ka, hmaw phosah lytah a piathlah.

36Cawngsaw vytei cawh aa ningang thlang ka, pakheh le pakheh khah, “Zehapaw cawngpahnah maw a cang he? Naw hnuinah le hmingtuakhynah khatah thlawpaw pialuipaw zong naw pei he katei, aa pia thlangpaw heh!” tatah aa tah he. 37Taico Zisu kong thongpang cawh ma raang kaekang vytei cawh a thang thlu.

Zisu tah mehlupui a dangsah he

(Mt 8:14-17; Mk 1:29-34)

38Zisu cawh synagog taitah piathlah ka, Simon ing lang a nae. Simon a nupuino a no cawh asaw tah a sahpui tah nang ka, Zisu cawh bawnah aa haepah. 39Zisu tah a bung hno ka, a sawnah khah raw ka, a sawnah taco a thlaw. Sungkheh tah ka tho ka, aaning sahlo cawh a tangtui he.

40Ning a va tlah lang leco asawnah phingphing a hnuipaw vytei khah Zisu khatah va chua khui he ka, aa cung letah a kih pahnia cy ka, aaning sahlo cawh a dangsah he. 41Ma hlui co, mehlupui chung taitah khachia sahlo khah pia he ka, “Nama cawh Khazing Sawcapaw na cang,” tatah a y he. Canghrasala aaning cawh Zisu tah raw he ka, Khri a cang tahpaw aa hni cawtah khei aa rei thlawpaw khah sai bei he.

42Mong khua va dui ka, Zisu cawh a kingdangnah lang khah sei ka, zawpui tah Ama khah aa hui. Taico a ungnah aa va phah tihtah aaning khah seisai khawh ly rua pawtah tle a pachia he. 43Canghrasala Zisu tah, “Khua hring lang zong letah Khazing painah raang thawngchawbia ka rei hrah ruapaw a cang, ma ruapaw taco tawpaw cang tlung neh ka,” a tah he. 44Taico Judia raang synagog sahlo letah a cawngpah lai longmang he.

Currently Selected:

LUKA 4: zyp

Highlight

Copy