Ripimae Agaa 20

Abraham Gera Pisa Rabure Ore Sarah-re Bani Ma-aulaisa.

1Abraham-me Mamre su gimoa Negep supara pisa. Nipu Kedes para Sar lapona rikirana pua asa, goa pua nipu Gera ogesi pua awa. 2Ore Sarah-re, nina bani yade sa. Gera-na aa mudu Abimalek-me Sarah pua meatepa loa nipu misa.

3Rana meda riba Abimalek piri Gote epana ipumea nipu para lalo: Nere omali. Gore apo meaede onare aa aba pe ona yade.

4Abimalek nipu mo ona piripara abi na pisa, goa pua nipumi lalo: Adaa Aa waea napi onaare pa taliya? 5Nipuna bipa ni laagiade: Sarah-re nina bani lade. Oname page nina bani lade. Neme waea kone nasawa, epea pikone sawa.

6Gore Gote-me wala epana ipua goa sa: E, gore pa epea pi kone saede, pare ne mo onarapu naa pataedere, ni repara waea palilo neme ma-parude. Goane mo ona naa oraina-laawade. 7Abiare apo ona nipuna ani wala kalape, gore nipuri nina agaa lae aa yade, goa pua nipumi nena beten lalia, goa palia rabu ne epe rupa ali. Go yapare nipu na katedare, ora ria-lalo ne page nena onaa page rayo omalimi.

8Wala yapipu aba ribarekore Abimalek-me nipuna kogono aanu yasa, mo nipuna adisade yae luabu lakelo kiritisa raburi, nimumi pala waru omisimi. 9Go rabu Abimalek-me Abraham-para ipuloa lalo: Nemere niare akepae pae? Neme neparare waea meda napawade, gore neme kedare nipara naa onanu piri apo mea epaena? Neme nipara paenare napapea paena. 10Abimalek-me Abraham agaamisa: Goare nemere akena rena pae? 11Abraham-me lalo: Nina bipa goa lawa, Go adare para Gote pala na-omeme ada kone sawa. Onaame nina ore nimu mulalo niri talimi kone sawa. 12Ora riare nipuri nina bani page yade, sana-aapare komea yapare amare rado rado; goyapare nipuri abiare nina ore yade. 13Go raburi Gote-me nena aapana su anda gimapu saraburi, neme nipu-para goa su: Nena lo-pu robare ni gupa giape, palipade suluabu parare, niri na bani yade lape.

14Go rabu Abimalek-me sipisipi para gawa para kogono aa onanu page Abraham epa kasia, goa pua nipuna ore Sarah page wala nipuna kasa. 15Abimalek-me lalo: Na suri ogepu apo naiyada, nena rana paliapara ape. 16Sarah parare goa sa: Nena baniri neme mone ini (tausen) kina go kalaloda.#20.16 1,000 Silva mone-na kendare abiare K14,000 rupa. Go piamere nepara nena rurunu rapuri agaa meda na salia lalo, nerapuri agaa ora ogesida page ora na salia.

17-18Gote-me Abimalek-na rurupara ona nogo rayore nogo naki na madinasa. Akoloya, Abimalek-me Abraham-na ore Sarah nipu misada. Gore Abraham-me Gote repara beten paisa. Go rabu Gote-me Abimalek-maepeasa, ore para nipuna kogono nogonu page, goa pua nimumi nogo naki wala madisimi.

Currently Selected:

Ripimae Agaa 20: kew

Highlight

Copy