Maki 1

Yoni togiebapitaiso 'ina loguguya

(Madiu 3:1-12; Luke 3:1-9, 15-17; Yoni 1:19-28)

1Gete tetela bobo'ana To'etoseyana Yesu, Tauna Yaubada natuna, tetelina 'ana 'ebe e'ale.

2 # Mal 3:1; Lu 7:27; Ais 40:3 Lowaenei palopita Aisea Yesu manuna 'i'etoladina, ga Yaubada 'ina ona 'isimanena, 'igwae:

“Gete 'igu toepilialeale yaetune be 'inugana be manuyo 'eda 'ikakali, 3be sena mitawa daitaya#1:3 mitawa daita: Me Yudia 'idi mitawa kaukau be gulegulewa daisinamo, ta pwatula gidalina, be kaiwenao wate nigeya sinabwadi. 'enana sinabwana 'enega 'ida simana apwesa be 'ida gwae, ‘'Inapwana 'ina 'eda wada kakali ta wagiepaepalu.’ ”

4 # Gu 13:34; Lu 1:77 'Enega Yoni togiebapitaiso nina 'iapwesa sena mitawa daitaya ga 'iguguya tomota 'ediya, 'igwae, “'Imi bubuna to'umalidi 'ediyega wada nuwa'ebuni be 'enega yada giebapitaisoemi ta Yaubada 'imi bubuna nidi 'ida nuwataudi.”

5Ta tomota yauyaudi sena Yudia maibo'ana 'enega be 'asa Yelusalema 'enega sidelima Yoni 'ina guguya sabi nonona, ga 'idi bubuna to'umalidi sisimanedi, ga 'igiebapitaisoedi bwasi Yolidani 'enaya. 6Yoni 'ana 'oama yobai kameli unuununa tuga, ta 'ana gadiwana kameli bwalana, ta 'ana masulao bilolo be mu'awa tuga.

7Ta Yoni 'iguguya ga 'igwae, “Tauna muliguyega 'imeemai 'isinabwa sinegu, 'enega nigeya 'ilobwelobwenegu be 'aenaya yabwagobwago be 'ana 'aelawa yali'ami. 8#Gu 1:5'Abo'agu bwasiyega tuga yagiebapitaisoemi, ta tauna Yaluyaluwa Tabunega 'ida giebapitaisoemi.”

Yesu 'ana giebapitaiso

(Madiu 3:13-17; Luke 3:21-22)

9Tuta gote 'enaya Yesu 'asa Nasaleta 'ipilisinena, nate sena Galili 'enega, ga 'imai bwasi Yolidani 'enaya ga Yoni Yesu 'igiebapitaisoena. 10#Yo 1:32Ta Yesu ni'atu bwasiyega 'igayo'oya'ama ga 'i'itatu'e ta galewa 'i'itena 'i'egegena, ta Yaluyaluwa Tabuna 'ana 'ita 'atuwa bunebune 'imwa'uta 'enaya. 11#Sam 2:7'Enega 'ebweu 'enana galewega 'ionama 'igwae, “'Oyo natu'ai'ailigu, manuyo yagwausowala sinabwana.”

Seitani Yesu 'itoona

(Madiu 4:1-11; Luke 4:1-13)

12Gote 'enega ga Yaubada Yaluyaluwana Yesu 'ietunena ga 'itauya mitawa daitaya, 13#Ib 4:15ga 'asiyata poti gote 'ena 'imiyana ta tuta nidi 'ediya Seitani 'itoo waiwai be 'aene Yesu 'igiebe'u. Ta sena nina 'enaya yobai bosasa wate simiyami, ta aneloseyao Yesu si'ita'i'isina.

Togomana site ata Yesu 'ibwauyedi

(Madiu 4:12-22; Luke 4:14-15, 5:1-11)

14 # Md 3:2 Ga tuta nina 'ena Kini Elodi 'iloina ga 'enega Yoni deliya sisa'u luguyena ga muliyega Yesu 'iapwesa Galili, ga Tetela bobo'ana Yaubada 'enega 'iloguguyaena, 15'igwae, “Tuta ni'atu 'iapwesama be Yaubada 'ida etoloina 'edaya. 'Enega 'imi guinuwa to'umalidi 'ediyega wada nuwa'ebuni be Tetela bobo'ana wada emise.”

16'Enega 'ebweu tuta Yesu ola Galili le'awinaya 'iwadawada'e ga togomana siteluwa matasina 'i'itedi Galili olanaya 'idi gomana siyauyauye, 'adi esanao Saimoni be Anidulu. 17Ga Yesu 'ibwauyedima, 'igwae, “Wamuliyegu be yada gibubumi tomota 'adi togomanao.” 18#Md 19:27Gote 'ena 'idi gomana sipilisinena ga Yesu simuliyena.

19'Enega 'iawada'e nao tupwana ga Yemesa be Yoni, taudi Sebedi natunao, 'i'itedi wagaya 'idi gomana sigibugibudi, 20ga 'ibwauyedima, ga tamadiya ma ina topaisewao siebesinedi nada wagaya ta Yesu simuliyena.

Yesu 'ebweu tai 'enega yaluyaluwa bi'i 'iula apwesena

(Luke 4:31-37)

21Ga muliyega simai 'asa sinabwana 'ana esana Kapaneumi 'enaya, ga Sabateya Yesu anuwa tapwalolo 'ena 'ilugu ga 'ie'ita. 22#Md 7:28Ta tomota maibo'adi nuwadi 'iowana 'ina e'ita manuna, ga sigwae, “E'ita gete palupaluna ta waiwaina, ta 'ida loina 'ana toe'itao 'idi e'ita nenetana.”

23 # Mk 5:7; Yo 6:69 Ta anuwa tapwalolo nina 'enaya 'ebweu tai 'imiyami, ta tai nina 'enaya yaluyaluwa bi'i lowa 'ilugu ga 'imiyami, 'enega tai nina Yesu 'ena 'ibwau, 24'igwae, “Yesu, 'oyo goma Nasaleta, to'ase 'alena ga 'umai 'emaya? Nuwanuwayo be 'aene 'uda pe'uma, aga? Ta 'oyo sa'i ni'atu yamwalatonimu, 'oyo tuga Yaubada Natuna.”

25Ta Yesu 'iloinena, 'igwae, “'Ulosa'u be tai nate 'enega 'uapwesama.”

26'Enega yaluyaluwa bi'i tai nina 'igietaina ga 'idededela ta 'imagana toila ga muliyega yaluyaluwa bi'i tai solanega 'iapwesa.

27'Enega tomota maibo'adi silosuyaedi ga taudimo sienaidedi, sigwae, “Mwa'adega e'ita auwauna gete? Gete tai nina 'ina loinega yaluyaluwa bi'i 'iloiloinedi ta siematamatane.” 28'Enega Yesu tetelina silelewanena Galili senanao maibo'adi 'ediya.

Yesu tole'oasa yaudi 'igie bobo'anedi

(Madiu 8:14-17; Luke 4:38-41)

29Ta Yesu anuwa tapwalolo 'enega 'iapwesa ga Yemesa be Yoni ma'enao sitauya Saimoni be Anidulu 'idi anuwaya. 30Ga Saimoni lawana ooyaiyaiyega 'ile'oasa, 'enega Yesu siemataluwena tole'oasa nina manuna. 31Ga Yesu 'ilugu 'enaya ga nimanaya 'igiyaina ga 'igietoolona, ga 'ina le'oasa 'isaligogo. 'Enega waine nina 'iapwesa ga 'adi masula 'igibubuna.

32 # Md 4:24 Ta sinala ni'atu 'isugusuguwa, ga tomota 'idi tole'oasao be taudi yaluyaluwa bi'i 'ediyega sile'oasa maibo'adi sime'edi Yesu 'enaya, 33#Mk 3:11-12; Gu 16:17-18be wate 'asa 'ana tomiyanao maibo'adi siegogonama ga anuwa nina matanaya sitoolo. 34'Enega tole'oasao yaudi be taudi yaluyaluwa bi'i 'igie kabaleyedi maibo'adi Yesu 'igie bobo'anedi. Ta yaluyaluwa bi'i 'eguma 'iula apwesedi 'i'etobodedi be geya'abo sisimasimane, manuna tauna simwalatonina.

Yesu Galili senananaya 'iloguguya

(Luke 4:42-44)

35 # Md 14:23; Lu 5:16 Ta 'enega gonamapumapuya#1:35 gonamapumapuya: Gonagona gidalina. Yesu 'itoolo ga anuwega 'iapwesa ga tebweuna 'itauya mwatui daitaya ga 'isidasida Yaubada 'ena.

36Ta Saimoni magosenao wate siapwesa ga Yesu si'ebesena, 37ga silobenaya ta sieonena, “Tomota yaudi nuwanuwadi 'oyo.”

38Ta Yesu 'igwae, “Tatatauya 'aina wate 'asa 'ediya be yaloguguya. Gete manuna yamai.”

39 # Md 4:23-25 'Enega Galili maibo'ana 'iasakowasiyena ga 'idi anuwa tapwalolo 'ediya 'iloguguya ta wate yaluyaluwa bi'i tomota 'ediyega 'iula apwesedi.

Yesu tolepelo 'ebweu 'igie bobo'anena

40Ta tolepelo 'ebweuna Yesu 'ena 'imai ga 'i'aetulasaya ta 'isidena, 'igwae, “'Eguma 'imu nuwanuwa nadigega, kapekapeyana be 'ugie bobo'anegu.”

41'Enega Yesu 'i'atenuwa 'ole'oleyena ga nimanega tai bwalana 'igitoona ta 'igwae, “O bobo'ana! 'Uda 'esasa!” 42Ga tai nina 'ana lepelo 'igumwala manini, ga 'i'esasena.

43 # 1 Loi 14:1-4 Ta Yesu tai nina 'i'ena pa'alena, 44'igwae, “'Utatauya ta geya'abo 'ebweu wate yaita 'ena 'usimasimanegu, ta esi palupaluna 'utatauya totaliya 'enaya be 'i'itayo, be 'enega 'imu taliya 'u'ebwaya Yaubada 'ena, to'ase nadigega 'ada loina Mosese 'enega, be 'enega tomota simwalatoniyo 'aene ni'atu 'u'esasemu.”

45 # Mk 7:36 Ta tolepelo nina nigeya Yesu 'ina loina 'iematamatane, ta tomota yaudi 'ediya 'iesimasimana. 'Enega Yesu nigeya sawesawenaya 'ia'ata'atamana 'asa nidi soladiya, ta 'enega 'itauya sena mwatui daitaya ga nada 'imiyamiya, ta tomota sena yaudi 'ediyega sitauya 'enaya.

Currently Selected:

Maki 1: dob

Highlight

Copy