LUKAS 14

Yesus paget ca iaʹ sakit bahaʹ

1Tegoʹ ca Tau Kelineʹ, tai kun Yesus pemung uman kedalem amin ca diaʹ pengelataʹ Perisi. Ngan un dulu diaʹ pekelung seʹ Yesus kina. 2Un ca iaʹ sakit bahaʹ nai tahaʹ juma ia. 3Kun Yesus lemutu neng guru Adet Yahudi ngan Perisi dina, kun ne: “Kumpin baʹan adet le tupe? Sukat le paget dulu tegoʹ Tau Kelineʹ mo, buk are abeʹ sukat pe?” 4Nyahut de un pisiu lene. Kun Yesus ngkang iaʹ sakit ina, penco ho paget ia, ngan cuk ia tai uleʹ. 5Un dau Yesus neng ida laʹa: “Buk un ca usa mele aheʹ pe mikem, buk anak ke, buk are sapi ie pe, tai laboʹ kedalem sepan tegoʹ Tau Kelineʹ, abeʹ e ke ngajaʹ ke menat ia kempau tegoʹ Tau Kelineʹ ne tupe?”

6Abeʹ pe ida mencam ke mipa dau ue.

Puyan libaʹ kimet ngan puyan pubo sakai

7Kun Yesus taʹan seʹ palai mida kina lemileʹ adan iaʹ tiga. Ina ukoʹ Yesus ti ca kata katuk mida mung, kun dau ue: 8“Buk dulu mengin ikem nai pemung uman tegoʹ adet pepeto, ayen tai madung neng adan iaʹ atek tiga, moʹ un taʹin iaʹ lapa bioʹ neng ʹo ikem iaʹ sihoʹ pengin puʹo. 9Masaʹ laki bioʹ iaʹ ban mengin ikem ina kenai pisiu ikem: ‘Naʹ ukoʹ koʹ ne me laki ini.’ Penco ngan saʹe ne ikoʹ ketai madung kaʹ ukoʹ iaʹ sada laleʹ. 10Di lareʹ buk kem sihoʹ pengin, tai ne ikem madung kaʹ ukoʹ iaʹ sada, apan iaʹ ban mengin ikem ke pisiu, kuma ha neng ikem: ‘Cenganak, nai ne kaʹ beluaʹ. Madung ne neng iaʹ tiga ini.’ Inaʹ le bangen kaʹ tawai hem kata dulu mung iaʹ madung uman pemung ngan ncem. 11Moʹ singket singket kelunan iaʹ ngempau usa ha tengen, ia lete iaʹ ketai libaʹ. Laʹa aheʹ iaʹ ke ngelibaʹ usa ha tengen, ia te iaʹ ke tai kempau ʹo.”

12Sulo un dau Yesus palaʹ iaʹ mengin ia are: “Buk koʹ uyan ca pemung mana tegoʹ beluaʹ tau, naʹ pia ngahu pe, ayen mengin diaʹ malai ngan ncoʹ, ngan cenganak, ngan pemanak koʹ, nang diaʹ kayaʹ, diaʹ pemung lepoʹ ngan ncoʹ, moʹ ida ke nyuaʹ mengin ikoʹ laʹa, ina seleket coʹ ke alaʹ a uleʹ suaʹ a ngeliwet. 13Buk koʹ uyan pemung mana, mengin ne diaʹ kasip, diaʹ apet, diaʹ kejaʹ, peging diaʹ butaʹ. 14Ina le ikoʹ bangen tekaʹ tawai hoʹ, moʹ ida dina, abeʹ de sukat ke naʹ uleʹ liwet inu palaʹ ikoʹ. Moʹ Allah ke nyuaʹ a mikoʹ tegoʹ tau kelunan diaʹ teneng ke numpak beteʹ cen patai re.”

Kata katuk cen Bunut iaʹ bioʹ

(Un te neng Matius 22.1-10)

15Un ca usa iaʹ madung kina, iaʹ ngeringa dau tiraʹ ina are, penco ho pisiu Yesus, kun dau ue: “Bangen saheʹ ne mung diaʹ ke uman dalem puyan pengaren Allah.”

16Kun dau Yesus neng ia: “Un ca laki uyan ca bunut iaʹ bioʹ, ngan kadoʹ dulu iaʹ ia tai mengin. 17Lepa tenup mung ne penguman ne, sulo ho cuk ulaʹ a tai palaʹ dulu iaʹ ia ban mengin are, kun ne: ‘Baka, mung nge lepa tenup ne.’ 18Mung dulu dina kukan kukan ke dau re neng ulaʹ ina are. Un dau ukan iaʹ ading: ‘Lepa ne akeʹ lemeli ca uma, ubaʹ keʹ ketai naʹat te naʹkini ʹo. Bang nyat lesau ne akeʹ.’ 19Un dau iaʹ ca laʹa: ‘Lepa ne akeʹ lemeli sapi lema pemeto. Naʹkini ketai heʹ ke ten ida ʹo. Bang nyat lesau ne akeʹ.’ 20Un dau ca pelaʹa: ‘Laho lepe akeʹ un leto, ina ukoʹ keʹ are sukat kenai.’

21“Nai kun ulaʹ ina uleʹ badaʹ mung puyan ina me laki bioʹ iaʹ un ia. Penco dau laki bioʹ amin ina miʹa, mentung dau ue neng ulaʹ ina: ‘Tai ne ikoʹ kawang sangkit. Tai kaʹ janan lepoʹ, ngan kaʹ sangat sangat te. Mengin diaʹ kasip nai kini, pekina pe diaʹ apet, diaʹ butaʹ, ngan diaʹ kejaʹ.’ 22Abeʹ e majan uʹo ina, kenai laki ulaʹ ina uleʹ, un dau ue: ‘Ahaʹ amai, mung dau iaʹ ikoʹ cuk are, lepa ne. Un sepuʹo abeʹ kukoʹ o sangan lepe.’ 23Un dau laki bioʹ neng ulaʹ ina laʹa: ‘Tai ne ikoʹ kawang laʹa. Tai kaʹ janan penyada lepoʹ, ngan kaʹ sangat sangat te, ngan ngelapen mengin dulu nai kedalem, apan amin nceʹ sangan ʹo. 24Dau heʹ mikem mung, pabeʹ ca usa pe iaʹ akeʹ mengin ading didai, nyahut te ke tisen tekaʹ uman penguman nceʹ ne.’ ”

Suaʹ buk bayaʹ katuk Yesus

(Un te neng Matius 10.37-38)

25Kadoʹ laleʹ dulu tai masat serengan Yesus. Kun ne pupa pisiu ida: 26“Aheʹ iaʹ nai palaʹ akeʹ, abeʹ e sukat nai bayaʹ katuk keʹ buk ke are pali kaʹ kimet te malaʹ ke bayaʹ akeʹ neng ʹo amai ie, ueʹ e, pekina pe leto ho, ngan anak ke, ngan cenganak laki ie, ngan cenganak leto ho, pekina pe neng udip usa ha tengen. 27Buk aheʹ iaʹ are ubaʹ suʹun tekaʹ neng tecek ke, iaʹ ukoʹ o ke matai dalem me ke bayaʹ akeʹ, abeʹ e sukat ke bayaʹ katuk keʹ. 28Moʹ aheʹ iaʹ neng ahang ikem iaʹ pekimet ke medeng ca lumpung, abeʹ e pedenaʹ ading, ngan pecap ke kudaʹ suaʹ a, apan ne ke tisen buk ke sukat ke pelepa ha. 29Malap tai lepa ha uyan tengkan ne, abeʹ e sukat pelepa ha, sulo mung dulu diaʹ taʹan seʹ puyan ina ke ngetepet ia ʹo. 30Kun dau re: ‘Laki ini lepa nading medeng ca lumpung, un sepuʹo abeʹ e sukat pelepa ha.’

31“Laja iaʹ mpi iaʹ ubaʹ ketai pepatai ngan laja diaʹ ca, abeʹ de pedenaʹ ke petiraʹ ading, mele senteng kaʹ ca puloʹ ibu usa keti ngan dua puloʹ ibu ayau re. 32Buk ke are senteng, kun ne cuk kudaʹ usa lawa ha tai naʹat laja iaʹ ca ina petem pe coʹ, apan nte petadan udip kahang ida.”

33Kun Yesus pedaʹam dau kina: “Pekina pe ikem. Naʹ pia iaʹ mpi pe neng ahang ikem, abeʹ e sukat kenai bayaʹ katuk keʹ, buk ke are pekimet tiga ading, ngan lepo ketoʹ inu iaʹ un neng ia.”

Usen iaʹ jeling

(Un te neng Matius 5.13; Markus 9.50)

34Un dau Yesus laʹa: “Tiga lete usen. Un sepuʹo buk ke tai jeling, abeʹ le senteng ke pelaʹit te laʹa. 35Abeʹ un bang nge neng tanaʹ pe. Abeʹ pe ia sukat pebileng tanaʹ pe. Abeʹ e un inu ue, bang pet ne tuaʹ. Aheʹ iaʹ un telinga, ngeringa ne.”

Currently Selected:

LUKAS 14: KNT

Highlight

Copy