Jon 5

Jisas bɨ ñɨg cheb Betesda kɨd adaŋ yek ak nop gek suŋ lak

1Kɨdek pen, Juda ñɨn awl kɨli olap apek, Jisas Jelusalem amnak. 2Pen Jelusalem wali kuskus gɨlak ak kanɨbtub olap, Chag Sipsip Kanɨbtub agelɨgɨpal. Kanɨbtub anɨb ak gol sɨŋak, ñɨg cheb won olap yek. Ñɨg cheb won anɨb ak, Hiblu takaw agɨl Betesda agelɨgɨpal. Pen ñɨg gol anɨb sɨŋak, kal bad ak, bad anep mamɨd ak yek. 3-4Pen binɨb tap gak kuŋay yɨbɨl, wɨdɨn koy gak ogɨnap, tob tɨmel gak ogɨnap, ñɨn tob kumak ogɨnap, kɨli kal bad ak, bad anɨb okok yelak.

5Pen bɨ tob tɨmel gak olap yek, tap anɨb ak gek pelnep kɨn yek, sub yɨn 38 ak amnak. 6Jisas bɨ kɨn yek anop nɨŋɨd nɨgak, pel anɨgɨl yolɨgup. Anɨb ak nɨŋɨd, nop agnɨŋɨd agak, Nep suŋ lɨnɨmuŋ agɨl nepan agak?

7Agek, bɨ tap gak anɨb ak pen agak, Bɨawl, ñɨg ak kaskas gaknɨŋ, binɨb yɨp dɨl, ñɨg cheb nab ayaŋ lɨnɨgel olap ma mɨdeb agak. Ñɨg nab ayaŋ ned amen ñɨg ak yɨp gek suŋ lɨnɨmuŋ agɨl nepin ak pen, binɨb ogɨnap kasek ned yɨbɨl abal agak.#5.7 Juda binɨb okok kɨli anɨgɨl nɨgelɨgɨpal, Bɨawl ensel ne olap gup tek, ñɨn ogɨnap apɨl, am ñɨg cheb ayaŋ kaskas gak. Kaskas gek, bɨ nokom olap ned amɨl ñɨg nab okyaŋ amnɨgab ak, nop suŋ lɨnɨgab. Kɨli anɨgɨl gos nɨgelɨgɨpal anɨb ak, kuŋay yɨbɨl apɨl ñɨg anɨb ak gol okok yelak. 8#Mat 9.6 Anɨb agek Jisas agak, Tɨkjakɨl, mɨj nak ak wɨnɨg dad amnoŋ agak. 9Agek, won anɨb anep nop suŋ lek, mɨj ne ak dɨl dad amnak.

Pen Jisas bɨ gek suŋ lak ñɨn anɨb ak, Juda añɨŋ lep ñɨn awl ak. 10#Kis 20.10, Neh 13.19, Jer 17.21, Mat 12.2, Mak 2.24, Luk 13.14, Jon 9.14 Anɨb ak nɨm, Juda bɨawl okok kɨli bɨ anɨb ak nop agɨlak, Mɨñɨl añɨŋ lep ñɨn awl chɨn ak agɨlak. Taynen ñɨn awl wog ma gep ñɨn ak, mɨj nak ak dad ajeban agɨlak? 11Agel kɨlop pen agak, Bɨ yɨp gek suŋ lup ak, ne yɨp agup, Mɨj nak ak dɨl dad amnoŋ agup agak. 12Agek nop agnɨŋɨd agɨlak, Bɨ an nep agup, Mɨj dɨl dad amnoŋ agup agɨlak? 13Jisas pen binɨb kuŋay yelak nab anɨb okok kɨmɨgel amnak tek, bɨ yɨp gek suŋ lup nɨm awl agɨl, agɨnɨmuŋ tek ma lak.

14 # Jon 8.11 Kɨdek pen, Jisas God agnɨgep kal awl kab wali kus gɨl yek mɨgan ak ajɨl, bɨ anɨb anop nɨŋɨd anɨb agak, Nɨgan, nep suŋ lup agak. Tap si tap tɨmel gɨpan ak kelɨgɨnɨmɨn agak. Mel ak, nep tap awl yɨbɨl gɨnɨmuŋ tek lup agak. 15Pen bɨ anɨb ak, ne adɨkɨd amɨl Juda bɨawl okok kɨlop agak, Jisas ne nokom yɨp gek suŋ lup agak.

16 # Mat 12.14 Anɨb agek nɨŋɨd, kɨli Jisas tap anɨb okok añɨŋ lep ñɨn awl chɨn ak pelnep golɨgup agɨl, nop mɨlɨk nɨŋɨd gɨ tɨmel gelɨgɨpal. 17#Jon 9.4, 14.10 Jisas pen kɨlop agak, Bapi yad ak wog ne bɨlel pel gɨ dad apɨl mɨñɨl owup agak. Pen yad abe anɨgɨpin agak. 18#Mat 26.4, Jon 7.1, 7.19, 7.30, 10.30, 10.33, Plp 2.6 Anɨb agek, Juda bɨawl okok nɨŋɨd kɨli nɨgɨlak, Juda añɨŋ lep ñɨn awl tɨbɨlɨkup ak pen, tap olap sek gek, nop mɨlɨk tɨmel nɨgɨlak. Ne abe agak, God Bapi yad agak. Ak God mɨdeb tek mɨdebin agup agɨl nɨgɨlak. Anɨb ak tek, nop ned ñagɨnɨgun agɨl gos nɨgɨlak ak, kɨles yɨbɨl gɨl nɨgɨlak.

Nap agek Ñɨne wog teplep anɨb ak ke gak

19 # Jon 5.30, 8.28-29, 12.49, 14.10 Juda bɨawl okok anɨgelak, Jisas kɨlop pen agak, Nɨbop nɨŋɨd yɨbɨl agebin, Ñɨ ak ne ke tap olap gɨnɨmuŋ tek ma lup, Nap tap gup okok nep nɨŋɨd gup agak. Anɨb ak Nap tap okok gup tek, Ñɨne abe anɨgup agak. 20#Mat 3.17, Jon 3.35, 2 Pi 1.17 Nap Ñɨne nop mapen lɨl, tap ne gup okok mɨdupsek yomub agak. Pen nɨbi ju dɨl gos pal awl lɨnɨmɨb agɨl, ogɨnap Ñɨne nop yomek nɨm, tap awl ke yɨbɨl ogɨnap sek nop yomnɨgab agak. 21#Lo 32.39, 1 Sml 2.6, 2 Kin 5.7, Luk 7.14, 8.54, Jon 11.25, 11.43, Lom 4.17, Epe 2.5 Pen Nap binɨb kubal okok gek tɨkjakɨpal tek, Ñɨ abe binɨb okok gen tɨkjakɨlaŋ agɨl, gek tɨkjakɨnɨgabal agak. 22#Mat 11.27, Jon 3.17, 5.27, 9.39, Apo 10.42, 17.31, 1 Pi 4.5 Binɨb tɨtay gɨpal, gos tɨtay nepal ak, Nap ke kɨlop ma bɨlokup agak. Ñɨne nop agek bɨlokup agak. 23#Plp 2.10-11, 1 Jo 2.23 Nap ne anɨgɨl gos nɨgup, Nap yɨb nop ak dad aplanɨbal nep tek, Ñɨ yɨb nop ak dad aplanɨnɨgel agak. Pen binɨb Ñɨ yɨb nop ma dad aplanɨbal okok, Nap yokek owak anop yɨb ak abe ma dad aplanɨbal agak.

24 # Jon 3.15-18, 6.40, 8.51, 1 Jo 3.14 Nɨbop nɨŋɨd yɨbɨl agebin agak. Binɨb olap takaw yad ak nɨŋɨd, bɨ yɨp agyokek ownek ak nop gos lɨnɨgup ak, pel pelnep mɨdeb, yad nop ma bɨlok nepin agak. Kumeb kɨd ak kelɨgɨl, pel mɨdep kɨd ak mɨdeb agak.

25 # Jon 5.28, Epe 2.1, 2.5-6, Kol 2.13 Nɨbop nɨŋɨd yɨbɨl agebin agak. Ñɨn anɨb ak ownɨgab ak pen mɨñɨl owup agak. Binɨb kubal tek mɨdebal okok, God Ñɨne takaw ak nɨgɨnɨgabal agak. Takaw ne nɨŋɨd, kɨm mɨdɨl pel yenɨgabal agak. 26Nap ne ke kɨm mɨdep jɨj ak tek, ne gek, Ñɨne abe ne ke kɨm mɨdep jɨj ak mɨdeb agak. 27#Dan 7.13-14, 7.22, Jon 5.22, Apo 10.42, 17.31 Ne Bɨ Olap Ñɨne mɨdeb, anɨb ak tek Nap agek, binɨb okok kɨlop tɨg asɨkɨl bɨlokɨnɨgab agak. 28Takaw agebin anɨb ak, nɨŋɨd gos pal awl ma lɨnɨmɨb agak. Ñɨn ownɨgeb ak, binɨb kumel kamɨlak okok kɨli mɨdupsek Ñɨ meg mɨgan agɨnɨgab ak nɨŋɨd, 29#Ais 26.19, Dan 12.2, Mat 16.27, Jon 6.40, Apo 24.15, 1 Ko 15.52, 1 Te 4.16 tɨkjakɨl seŋayaŋ ownɨgabal agak. Binɨb gɨtep gɨpal okok, tɨkjakɨl pel yenɨgabal agak. Binɨb pen gɨ tɨmel gɨpal okok, tɨkjakel kɨlop bɨlokɨl agenɨgab, mɨŋel awl dɨnɨgabal agak. 30#Mat 26.39, Jon 4.34, 5.19, 6.38 Pen Jisas takaw olap anɨb agak, Yad tap tɨtay gebin anɨb awl, gos yad ke ma gebin agak. Bapi yɨp agek nɨŋɨd, binɨb okok kɨlop bɨlokebin agak. Anɨb ak binɨb bɨlokebin ak, ke gos nɨŋɨd ma gebin agak. Bapi gos nɨgup tek nɨŋɨd, yɨpɨd gɨl yɨbɨl bɨlokebin agak. Ak pen Bapi yɨp agek ownek ak, gos ne ñub tek nɨŋɨd gebin agak.

Ogɨnap Jisas bɨ tay tek mɨdeb ak agɨlak

31 # Jon 8.13-14, Lep 3.14 Yad ke bɨ tay tek mɨdebin agɨl agñɨbin ak, yɨpɨd ma gup agak. Takaw yad ak nep anɨgɨl agenɨm, ak nɨgep tek ma lup agak. 32#Mat 3.17, Jon 5.36-37, 8.18, 1 Jo 5.6-9 Bɨ olap pen, yad bɨ tay tek mɨdebin ak ne abe agñub agak. Pen yad nepin, Bɨ nɨm ak ne agñub anɨb ak, nɨŋɨd yɨbɨl agup agak.#5.32 Jisas ne bɨ olap nop agak ak, nɨm God nep.

33 # Jon 1.19-34, 3.27-30, Epe 2.8, Tat 3.5 Nɨbi bɨ ogɨnap kɨlop agyokem, Jon yɨl amnɨlak agak. Amɨl Jon nop, yɨp bɨ tay tek agɨl agnɨgelak, takaw nɨŋɨd yɨbɨl ak agñak agak. 34Yad gos anɨgɨl nepin, binɨb olap takaw ne agak ak, takaw yad ak kɨles ma ñɨnɨgab agak. Yad pen God nɨbop tɨg asɨk dɨnɨmuŋ agɨl gos nepin agak. Anɨb ak Jon yɨp bɨ tay tek takaw agak ak, nɨbop agñebin agak. 35#Mat 13.20-21, Mak 6.20, 2 Pi 1.19 Jon ne sup yɨn mɨlek gup tek ak agak. Nɨbi won sɨkol ak mɨlek anɨb ak nɨŋɨd, mɨñmɨñ gɨpek agak.

36 # Jon 3.2, 10.25, 10.38, 14.11, 1 Jo 5.9 Jon nɨbop agtep gup ak pen, ak takaw yokɨp tek agak. Takaw olap pen, yad wog anɨgɨl gɨpin takaw ak, takaw awl yɨbɨl agak. Bapi wog gɨnɨmɨn agak tek, wog yad ke yɨbɨl okok gɨ juwnɨg opin agak. Wog gɨpin anɨb ak nɨm, mɨseŋ yɨbɨl lek binɨb okok anɨgɨl nepal, Bapi yɨp agyokek opin agak. 37-38#Mat 3.17, 17.5, Mak 1.11, Luk 3.22, Jon 5.32, 6.27, 8.18, 1 Ti 1.17, 1 Jo 4.12 Pen Bapi yɨp agyokek apen, yad bɨ tay tek mɨdebin ak ne ke binɨb okok kɨlop agñub agak. Nɨbi pen bɨ anɨb ak Bapi agyokek owak ak, takaw nop ak ma nepɨm agak. Anɨb ak Bapi takaw ne ma nepɨm, jomulɨk nop ma nepɨm, takaw ne ak nɨb ayɨp ma mɨdeb agak. Mel yɨbɨl agak. 39#Lo 18.15-18, Luk 16.29, 24.27, 24.44, Jon 5.46, Apo 13.27, 17.11, 2 Ti 3.15, 1 Pi 1.10-11 Buk Baybol ak kɨl tɨkɨlak okok, nɨbi takaw anɨb ak nɨgtep gon, chɨnop gek pelnep yonɨgun agɨl, pel gos nepɨm agak. Pen takaw anɨb ak, yad bɨ tay tek mɨdebin ak kɨl tɨkɨl agñɨlak agak. 40#Jon 1.11, 3.19 Agñelak pen, yɨp yɨl apem pel mɨdep ak dɨnɨgun agɨl gos ma nepɨm agak.

41 # Jon 5.34, 1 Te 2.6 Binɨb okok yɨb yɨp dad aplanɨlaŋ agɨl ma agebin agak. 42Pen yad nɨbop nepin agak. Nɨbi God nop mapen ma lɨpɨm agak. 43#Mat 24.5, 24.24 Bapi yɨp agek takaw ne dad opin ak pen, yɨp ma dɨpɨm agak. Pen bɨ olap gos ne ke nɨŋɨd apenɨgab, nop dɨnɨgabɨm agak. 44#Jon 12.43, Lom 2.29 Nɨbi binɨb chɨn okok, chɨnop nɨŋɨd yɨb awl lɨnɨgel agɨl gos nepɨm agak. God nokom ak pen, chɨnop nɨŋɨd yɨb awl lɨnɨmuŋ agɨl gos ak ma nepɨm agak. Anɨb ak tɨtay dɨl yɨp gos lɨnɨgɨnɨmɨb agak?

45 # Lo 31.26-27, Lom 2.12 Yad pen Bapi yɨl amɨl, nɨbop ag gɨl nɨŋɨjsek ma lɨnɨgayn agak. Gos anɨb ak ma nɨgɨnɨmɨb agak. Bɨ Mosis ak pen, ne chɨnop gɨtep gɨnɨgab agɨl nepɨm ak, ne nokom nɨbop ag gɨl nɨŋɨjsek lɨnɨgab agak. 46#Stt 3.15, Lo 18.15-18, Jon 1.45, Apo 3.22, 26.22 Mosis yɨp gos nɨŋɨd takaw kɨl tɨkɨl agñak agak. Anɨb ak, takaw Mosis kɨl tɨkak ak nepɨkep ak, takaw yad ak abe nepɨkep agak. 47#Luk 16.31 Takaw ne kɨl tɨkak ak nɨŋɨd agɨl ma nɨŋɨd nɨm, tɨtay dɨl takaw yad ak nɨgɨnɨgabɨm agak.

Currently Selected:

Jon 5: TayNT

Highlight

Copy