Suhˉ jehˬ ve li‸ 5
5
Deˍboˇraˍ leh Baˍrehˆ hui ve kʼa muiˬ hkawˇ
1Oˇ ve teˇ nyi awˬ hkʼaw lo, Deˍboˇraˍ leh Aˍbiˆnonˍ ve yaˇ Baˍrehˆ kʼa muiˬ hkawˇ chi hkʼe kʼoˆ kʼa ve yoˬ.
2Gʼuiˬsha hta‸ chiˇ mvuh-o.
Iˉsaˍreˍlaˆ chaw hui lehˬ, ma‸ bawˆ tuˬ hkʼa deh‸ dawˇ cheˆ taˍ peuˬ.
Yawˇ hui ha lehˬ ha kʼa ma‸ bawˆ kuiˬ lo kʼai ve yoˬ.
3Jawˇmawˇ teˇ hpaˍ-oˬ, na sheˍ.
Nawˬ hui uˉ peunˍ shehˍ hpaˇ teˇ hpaˍ htawˇ hkʼa deh‸ na taˍ sheˍ.
Iˉsaˍreˍlaˆ ve Jawˇmawˇ Gʼuiˬsha hta‸ ngaˬ tinˍ hteˆ leh kʼa muiˬ chiˇ mvuh tuˬ yoˬ.
4Gʼuiˬsha-oˬ, nawˬ lehˬ Siˇraˆ hkʼaw hkʼoˆ lo tawˆ la leh,
Eˇdonˍ mvuhˇmiˬ hkʼaw laˬ ve teˇ yanˇ,
miˬ hiˆ leh mvuhˇ yeˬ laˬ ve yoˬ.
Yoˬ, moˬ awˬ hkʼaw lo mvuhˇ yeˬ ya‸ la ve yoˬ.
5Siˉnaˆ hkʼaw ve Gʼuiˬsha,
Iˉsaˍreˍlaˆ chaw hui ve Jawˇmawˇ Gʼuiˬsha mehˆ gʼuˇ suhˍ,
hkʼaw pui teˇ hpaˍ hiˆ hiˆ naˇ naˇ hpeh‸ chehˇ ve yoˬ.
6Aˍnaˆ ve yaˇ Shaˍgaˍ leh,
Yeˍlaˆ hui awˬ co-e htaˇ, tanˇ kaˬ paˍ teˇ hpaˍ lehˬ mvuhˇmiˬ awˬ hkʼaw lo maˇ hpanˍ toˇ.
Yawˇ hui lehˬ ya‸ kʼaw ehˉ teˇ hpaˍ hta‸ te toˇ chehˇ ve yoˬ.
7Deˍboˇraˍ-oˬ, nawˬ maˇ tawˆ la sheˍ gʼuˇ suhˍ,
Iˉsaˍreˍlaˆ ve venˇ teˇ hpaˍ lehˬ suh taˍ ve yoˬ.
Nawˬ lehˬ Iˉsaˍreˍlaˆ ve awˬ e hkʼa shuˍ hpeh‸ ve yoˬ.
8Iˉsaˍreˍlaˆ chaw hui awˬ nu ve gʼuiˬsha teˇ hpaˍ hta‸ oˉ kʼoˍ pui ve teˇ yanˇ, mvuhˇmiˬ awˬ hkʼaw lo ma‸ hpeh‸ la ve yoˬ.
Iˉsaˍreˍlaˆ ve ma‸ yaˇ awˇ meunˍ gʼaˇ awˬ hkʼaw lo,
chaw teˇ gʼaˇ ka‸ la‸ caˉ maˇ cawˬ.
9Ngaˬ ve nyi ma lehˬ, Iˉsaˍreˍlaˆ chaw hui ve ma‸ poˍ teˇ hpaˍ leh,
ha lehˬ ha kʼa ma‸ bawˆ kuiˬ lo kʼai toˇ ve chaw hui geh chehˇ taˍ ve yoˬ.
Gʼuiˬsha hta‸ chiˇ mvuh-o.
10Hpuˉ-ehˍ ve piˉ laˬ hkʼoˆ ciˇ taˍ ve chaw hui,
iˉ mvuhˇ an hkʼoˆ mui taˍ ve chaw hui leh
ya‸ kʼaw toˇ chehˇ ve chaw hui-oˬ, awˬ lawn oˇ ve hta‸ kʼoˆ maˍ piˇ-oˆ.
11Na sheˍ. Nanˍ bawˍ paˇ lo hpoˆ chehˇ taˍ ve chaw teˇ hpaˍ lehˬ,
Gʼuiˬsha gʼaˇ shehˍ hpaˇ hpeh‸ ve awˬ lawn leh
Iˉsaˍreˍlaˆ chaw hui gʼaˇ shehˍ hpaˇ hpeh‸ ve awˬ lawn kʼoˆ da‸ chehˇ ve yoˬ.
Oˇ ve hkʼaw‸ nawˉ, Gʼuiˬsha ve chaw teˇ hpaˍ lehˬ, yawˇ hui ve venˇ teˇ hpaˍ hkʼaw tawˆ kʼai ve yoˬ.
12Deˍboˇraˍ-oˬ, gʼuˇ suhˍ shiˍ kʼai laˇ-oˆ.
Aˍbiˆnonˍ ve yaˇ Baˍrehˆ-oˬ, gʼuˇ suhˍ kʼai leh
nawˬ ve canˇ paˍ teˇ hpaˍ hta‸ gʼa‸ kʼoˬ piˇ-oˆ.
13Oˇ htaˇ ka ti‸ yeˬ ve chaw teˇ hpaˍ lehˬ, yawˇ hui ve awˬ hoˉ teˇ hpaˍ geh laˬ leh,
Gʼuiˬsha ve chaw teˇ hpaˍ lehˬ, ma‸ bawˆ tuˬ yawˇ geh laˬ tuˬ yoˬ.
14Yawˇ hui lehˬ, Eˇhpaˍrenˍ awˬ ceuˬ awˬ hkʼaˇ hpeh‸ leh, lawˬ hkʼo‸ hkʼaw ya‸-e ve yoˬ.
Yawˇ hui hkʼaw‸ nawˉ, Beˍyaˍmenˍ awˬ ceuˬ awˬ hkʼaˇ teˇ hpaˍ laˬ ve yoˬ.
Ma‸ poˍ teˇ hpaˍ lehˬ, Maˍhkiˇraˆ awˬ ceuˬ awˬ hkʼaˇ teˇ hpaˍ hpeh‸ leh,
awˬ hoˉ teˇ hpaˍ lehˬ, Zaˍbuˆlonˍ awˬ ceuˬ awˬ hkʼaˇ teˇ hpaˍ hpeh‸ ve yoˬ.
15Iˉsaˍhkaˍ ve awˬ hoˉ awˬ naˬ teˇ hpaˍ Deˍboˇraˍ geh laˬ ve yoˬ.
Iˉsaˍhkaˍ leh Baˍrehˆ htawˇ laˬ ve yoˬ.
Yawˇ hui yawˇ hkʼaˇ suh lawˬ hkʼo‸ lo ya‸ la ve yoˬ.
Ya‸ hkʼaˇ Ruˇbenˍ awˬ ceuˬ awˬ hkʼaˇ teˇ hpaˍ lehˬ, hpaˆ da‸ kʼai peuˬ ve pa taw laˬ maˇ hpeh‸.
16Yawˇ hui lehˬ aˬ hto‸ ma pa taw yawˇ geh chehˇ taˉ ve le.
Yawˬ hawˉ paˍ teˇ hpaˍ, yawˬ awˬ moˍ hta‸ kuˬ ve awˬ hkawˇ hta‸ na tuˬ awˬ pon laˇ.
Yoˬ, Ruˇbenˍ awˬ ceuˬ awˬ hkʼaˇ teˇ hpaˍ lehˬ hpaˆ da‸ kʼai peuˬ.
Hkʼe te leh yawˇ hui laˬ maˇ hpeh‸.
17Gaˆ awˬ ceuˬ awˬ hkʼaˇ teˇ hpaˍ lehˬ, Yawˇdanˍ iˉ kaˆ lawˬ mvuhˇ nyi tawˆ hpawˇ lo chehˇ taˍ ve yoˬ.
Danˍ awˬ ceuˬ awˬ hkʼaˇ teˇ hpaˍ htawˇ, kʼaˆ caˇ kuiˬ lo chehˇ taˍ ve yoˬ.
Aˍshaˍ awˬ ceuˬ awˬ hkʼaˇ teˇ hpaˍ lehˬ,
laˇ tsuhˇ gʼuiˬ pfuhˍ lo chehˇ taˍ ve yoˬ.
18Ya‸ hkʼaˇ, Zaˍbuˆlonˍ leh Naˍtaˍliˆ chaw teˇ hpaˍ lehˬ,
a shu yawˇ ve a sha‸ tanˇ leh ma‸ bawˆ kuiˬ lo chehˇ taˍ ve yoˬ.
19Jawˇmawˇ teˇ hpaˍ lehˬ, Mehˆgiˇdoˍ iˉ kaˆ law paˇ lo cawˬ ve Taˍnehˆ venˇ lo
ma‸ ca bawˆ la ve yoˬ.
Hkaˍnanˍ jawˇmawˇ teˇ hpaˍ ma‸ ca bawˆ la ve htawˇ,
yawˇ hui hpu maˇ gʼa yuˬ kʼo‸-e.
20Meu‸ keu shiˍ teˇ hpaˍ htawˇ, mvuhˇ naw ma hkʼoˆ lo chehˇ taˍ leh ma‸ bawˆ chehˇ ve yoˬ.
Yawˇ hui mvuhˇ naw ma hkʼoˆ te toˇ chehˇ leh,
Siˇsaˍraˆ hta‸ma‸ bawˆ chehˇ ve yoˬ.
21Aˬ sho-eˬ htaˇ ka‸ cawˬ taˍ ve Kiˇshonˍ iˉ kaˆ lawˬ lehˬ,
yawˇ hui hta‸ te luˬ piˇ ve yoˬ.
Awˬ gʼaˇ awˬ shaˉ yuˬ tawˆ leh, ngaˬ awˬ gʼuˇ suhˍ kʼai tuˬ yoˬ.
22Oˇ htaˇ iˉ mvuhˇ teˇ hpaˍ awˬ gʼuˇ suhˍ gʼaˇ hte‸ gʼuiˇ kʼai leh,
miˬguiˬ hta‸ naˆ nehˆ taˉ ve yoˬ.
23Meˍyawˇzaˆ venˇ hta‸ hkeu piˇ-oˆ.
Oˇ kaˬ lo chehˇ ve chaw hui hta‸ htawˇ hkeu piˇ-oˆ.
Awˬ lawn kʼo, yawˇ hui lehˬ ma‸ yaˇ hkʼa shuˍ Gʼuiˬsha hpawˇ chehˇ leh, ma‸ maˇ ga bawˆ laˇ ve yoˬ, teh‸
Gʼuiˬsha ve mvuhˇ naw ma tcuh yaˇ kʼoˆ ve yoˬ.
24Aˉ po kʼo hkʼaw chehˇ taˍ ve Keˍniˆ awˬ ceuˬ awˬ hkʼaˇ Heˍbaˍ miˇ ma Yeˍlaˆlehˬ,
yaˇ miˇ hkʼa peu-eˬ a‸ kehˉ awˬ bon uiˍ ve yoˬ.
25Siˇsaˍraˆ lehˬ, yawˇ geh iˉ kaˆ lawˬ dawˬ ve htawˇ,
yawˇ yawˇ hta‸ nuˇ cuˉ gʼuiˬ taw piˇ ve yoˬ.
Yawˇ lehˬ da‸ jaˆ ve kawˆhkʼaw lo, nuˇ cuˉ gʼuiˬ keu taw piˇ ve yoˬ.
26Yawˇ lehˬ la‸ sheh teˇ paˉ hkʼaw juˇ yuˬ taˍ leh,
awˬ nu ve la‸ sheh teˇ paˉ hkʼaw hta tu hta‸ yuˬ taˍ ve yoˬ.
Yawˇ lehˬ Siˇsaˍraˆ ve oˉ kʼoˍ hta‸ dawˆ meu-e piˇ ve yoˬ.
27Yawˇ lehˬ yaˇmiˇ oˇ ve hkui paˇ lo paiˍ leh suh sheˬ ve yoˬ.
28Siˇsaˍraˆ ve awˬ e lehˬ, hpa ko taˍ ve yehˬ miˉ ehˉ awˬ baˬ hpawˇ lo chehˇ taˍ leh,
law nyi chehˇ ve yoˬ.
Aˬ hto‸ ma pa taw, yawˇ ve iˉ mvuhˇ lawˬ teˇ hpaˍ haˆ haˆ maˇ kʼaw‸ gaˬ la ve le.
Aˬ hto‸ ma pa taw, yawˇ ve iˉ mvuhˇ teˇ hpaˍ chi taw taw naiˇ chehˇ ve le, teh‸ dawˇ chehˇ ve yoˬ.
29Cuˇ yiˍ cawˬ ve yaˇ miˇ teˇ hpaˍ yawˇ hta‸kʼaw‸ yaw hkʼaw‸ piˇ chehˇ ve yoˬ.
Ya‸ hkʼaˇ, yawˇ awˬ to hta‸ yawˇ chi hkʼe kʼoˆ piˇ chehˇ ve yoˬ.
30Yawˇ hui lehˬ, mawˇ ca hpfuhˆ yuˬ leh pehˬ da‸ chehˇ ve yoˬ.
Ma‸ yaˇ teˇ gʼaˇ hta‸ yaˇ miˇ haˉ teˇ gʼaˇ, maˇ heˆ kʼo, nyiˇ gʼaˇ ca piˇ chehˇ ve yoˬ.
Siˇsaˍraˆ awˬ pon awˬ hpfuhˇ hkʼaˆ jaˇ ve veu‸ kʼaˇ leuˆ piˇ chehˇ ve yoˬ.
Jawˇmawˇ ma awˬ pon, nyi sha jaˇ ve shi caˆ leuˆ piˇ chehˇ ve yoˬ, teh‸ kʼoˆ ve yoˬ.
31Gʼuiˬsha-oˬ, nawˬ ve canˇ paˍ hkʼa peu-eˬ suh peuˬ piˇ-oˆ.
Ya‸ hkʼaˇ, nawˬ ve awˬ chawˇ teˇ hpaˍ lehˬ, mvuhˇ nyi hkʼa shuˍ awˬ gʼeuˆ ba chehˇ piˇ-oˆ, teh‸ kʼoˆ ve yoˬ.
Oˇ ve hkʼaw‸ nawˉ, mvuhˇmiˬ awˬ hkʼaw lo 40 hkʼaw‸ hkʼa gaˬ gawˬ lehˍ cawˬ ve yoˬ.
Currently Selected:
Suhˉ jehˬ ve li‸ 5: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
