MARKUSI 9
9
1Yeso lə ghɔm bi pú gɑ: Kwa' nyənyɔ gɑ̌ siŋ wɔ gɑ́ cəcɑ̌ pɔ pyə wap si tsɔ' a, shɑ́ pɔ tə gɔ sɔ' pfʉ́ tə yɔ yə nə sa'dzʉ̌ Si pa' a sɔ' m nə́ tʉɔ a pɑ́.
Nə́ sɑnyə Yeso
(Mt 17.1-13; Lk 9.28-36)
2A lə cyə tyɛ'dzʉ́ nthɔk, Yeso lɑ Pɛtrɔ ba Yakop pu Yohane, pu a pu ghɔ tsʉ' tsiŋ, dəm mu' mɑ sʉəsʉə kuŋgǒ. Yeso lə ko tsʉ'u sɑ́nyə́ dzə̌ pú, 3dzə́ tsyə́ fɔk dəŋnyələŋnyə pa' pɑ̀ sɔm nu'dzə́ dəmcǎ' lə ghə dzə fɔk po' a. 4Elia pu Mosɛ ŋwak dzə̌ pú, pu a Yeso pɑwə shɔm nwə́. 5Pɛtrɔ lə lɑ ghɔm, gɔm gɑ: Rabi, ǎ puŋ bi pɑ nə pɑ́ tsɔ'ɔ. Pɑ zhɔk mnthap mɑnthá, mu' pɑ yǔ, mu' pɑ yə Mosɛ, mu' pɑ yə́ Elia. 6Pɛtrɔ la tə́ bɑwə jyə ywə yə e gɔ ghɔm a pɑ́, nə pa' pwɔk lə bɑ ǎ ko nə pú. 7Mlwa lə sɔ' pfɔptə wap, pu yu' gi mo fɑ nə mlwa gɑ: Mo yə̌ŋ bɑ Mu a yə gɑ̌ ŋkhuŋ é te' a, po yu'nyə e. 8Wap lə wuŋ détə́ giŋnyə̌ pú, wap lə piŋ jɔ sɔm mò tə́ ně da' Yeso do e, biŋ gə wap. 9Cwə yə́ pu a pú lə pɑ dzə́ŋ fɑ kúŋgǒ a, Yeso co' bi pu gɑ wap kɑ siŋ sɔmmo ywə yə wap jɔ́ a, tə̌ Mu mo la' jám nə vʉ̌. 10Wap lə ghiŋ nə mco' bɔ, da' gɑ bɑ həŋtə́ cəcɑ̌ pú kwa' ywə yə e lə gɔm gɑ́ nə yám nə vʉ̌ a.
Nwə nə Elia
11Wap lə pǐŋ həŋtə́ Yeso gɑ: Nwə kɑ̀ pɑ zhyə́ mco' pɑ gɔm gɑ́ Elia gɔ sɔ' ləŋdzə sɔ̌'? 12E ghɔm bi pu gɑ: Ǎ kwa' pa', Elia gɔ ləŋdzə́ sɔ', piŋ yap guŋ ywə awɛ pa' a shəŋ a, da' gɑ́ a bɑ pu və nə nwə Mú mo gɑ e gɔ sɔ' yɔgo' te' pu piŋ gwak e. 13A po'o tə gɑ̌ siŋ wɔ, Elia lě sɔ', wap piŋ gə guŋ ywə yə́ wap kuŋ a nə e, dəŋdəŋ pa' a bɑ pu lə və̌ a.
Nə yɛ̀ mu' mú nə zhwenyə cwəpùŋ
(Mt 17.14-21; Lk 9.37-43)
14Wap lə nə pɑnyə bə́ŋ pyəshɑ́ pɑkhʉ̌ jɔ mɑ vəŋ pɔ pɑ bəŋ pu pu a pɑ zhyə́ mco' pɑwə nthɛshwə̀. 15Wap lə wuŋ nə yɔ Yeso, guŋ pɔmnəŋ awɛ zhəzhə̀ŋ, pu pɑ́ ŋkhʉdʉ́ nə ca'tə e. 16E həŋtə pɑkhʉ̌ pyə gɑ: Pu a pú nthɛshwə nə kʉ́? 17Mu' mo cəcɑ̌ pɔmnəŋ pa' bi e gɑ: Ta gɑ̌ bɑ gɑ̌ lɑ mu a sɔ' bu, zhwényə tə ghɔm pɑ́ nə é. 18Zhwenyə bɔ nthɔm e bǎ hɑ lə́, ma' e si, e sə́ dhə̀dhə̀, pfɑ́ msúŋ, nthiŋ. Gɑ̌ ghɔm bi pɑkhʉ̌ pǔ gɑ wap zhə́ŋ e, la' wap ghə gʉ' nə jə́ŋ e.
19Yeso lɑ ghɔ̀m gɔm bi pu gɑ: Gwya pɑ tə piŋ, gɑ̌ gɔ pɑ bə́ŋ po tə́ kəm sǒ? Gɑ̌ gɔ kyəp tʉm tsɑ̌ nə po tə kəm sǒ? Po lɑ e nə sɔ' bəm. 20Wap lə́ lɑ e nə sɔ' bi Yeso. Mu bɔ̌ lə cwə̌tə́ jɔ Yeso, zhwenyə to' nə cʉ'nyə é, gə e tiŋ; bvʉsi, ŋkheŋnyə lə́ sə́ dhə̀dhə̀. 21Yeso həŋtə tap e gɑ: A cwə dəŋ pǎ' pa' a pɑ̌ gə nə e po' a? E ghɔm gɑ: Tə fɑ bwa 22a bɑ mcʉmmcʉ̌m, zhwenyə bɔ ma' e mɔk kɑ m nthʉ̌m shyə lə, po'o gɑ e pfʉ́. Tə a pɑ gɑ́ pɑ o ghə ywə nə́, o kwitə wɔk shyə m nə cɔmmtso. 23Yeso ghɔm gɑ: A pɑ̀ gɑ́! Gɛ piŋnthʉm bɑ́ ě ku' nə ghə guŋ ywə awɛ. 24Tá mú bɔ lə wuŋ shwe gɑ: Gɑ̌ bíŋ! Sɔ' ŋkwitə yɑ nə yak piŋnthʉm.
25Yeso lə yɔ̌ pa' pɔmnəŋ shu'tə a, shɔktə zhwenyə cwəpuŋ gɔm gɑ: Zhwenyə bu'mtəŋ ba tə ghɔm, gɑ̌ ghɔm bu, təm nə mu yə̌ŋ, o kɑ piŋ tə́ bɑnyə nə e!
26Zhwenyə lə lɑ cwé pu a mtiŋ nə nthəm nə mú bɔ. Mu bɔ cwə pa' cwə yə ě pfʉ̀ a, tə́ guŋ pɔ awɛ pɑwə gɔ́m gɑ: Ě pfʉ́.
27Da' gɑ́ Yeso tɔm pú e, bʉ' e, e tiŋnyə thə́. 28Cwə yə Yeso lə pɑnyə dyə a, pɑkhʉ̌ pyə həŋtə e gɑ: Kɑ gə tə la' pyə ku' nə zhəŋ zhwenyə bɔ?
29E ghɔm bi pu gɑ: Nthi zhwenyə yəŋ gɑ bɑ bi a pɑ́ sɔmywə lə té é nə́ mo, tə ně da' mcwyɛ'nyə.
Yeso kwi' siŋ nwə go' e bɑ nə yǎm nə́ vʉ̌
(Mt 17.22-23; Lk 9.43-45)
30Yeso pu a pɑkhʉ̌ pyə lə lǔ tsʉ'ú, shyə m Galilea ba m Yudea; Yeso la tə́ bɑwə shəŋ gɑ sɔmmo zhyə pɑ́. 31Nə pa' e lə́ bɑwə ji'tə pɑkhʉ̌ pyə gɔm gɑ: Pu gɔ hɑ Mú mo nə bǔ pɔmnəŋ; a wap zhwə é, cwə yə́ wap zhwə é á, a nə cyə̀ tyɛ'dzʉ́ yɑtá e yám nə vʉ̌. 32Da' gɑ pɑkhʉ̌ pyə la tə́ yu' tsɔ ghɔm tə tútə, biŋ bwɔk nə hə́ŋtə é nwə nə́.
Wǎ bɑ mo gwyə́?
(Mt 18.1-5; Lk 9.46-48)
33Wap lə ghɔ̌ Kapɛrnaum; cwə yə wap lə pɑ̌ dyə́ a, Yeso hə́ŋtə wap gɑ: Po kɑ́ bɑ́ mə́jyə nthɛ́shwə nə kɑ? 34Da' gɑ́ wap lɛtə lɛ̌tə́; tə́ bɑ wap la' bɑ mə́jyə bɑwə fəŋnyə́ nə zhyə́ mo yə́ e bɑ mo gwyə́ a. 35Yeso lə cwə̌si, biŋ ŋkhe pɔ shwɔppʉə mghǎm, gɔm bi pú gɑ: Mo pɑ shə́ŋ nə pɑ́ dəŋdzə̀, e pɑ́ jʉɔjʉm nə guŋ pɔ awɛ, biŋ bɑ gɛfa' bi guŋ pɔ awɛ. 36E lə pǐŋ dɑ ta' muywə mú, jap e cəcɑ̌ pú, nthɛtə́ e, gɔm bi pú gɑ: 37Mo yə e lɑ muywə mú pa' yəŋ gɑ́ a dɑ nə tso tsɑ̌, bɑ é dɑ pɑ kwa' myə̀; mo yə e nəŋ nyə́ŋ a dyə́ a, bɑ e tə́ nyəŋ pɑ́ myə̀ dyə pɑ́, e nyəŋ Mo yə e nthəm a a.
Mo yə é tə bɑ gɛ bo yɔk a, bɑ́ mo yɔk
(Lk 9.49-50)
38Yohane lə ghɔ̌m bi e gɑ: Ta pyə̌ yɔ mu' mo, e pɑwə́ dɑ tso tsǔ jə́ŋ mzhwenyə cwəpùŋ, pyə pɑ shəŋ nə kɔ bi e, nə pa' tə pyə a pu nə lə bəmtə bɑ́ a pɑ. 39Tə́ Yeso ghɔm gɑ: Ka po kɔ bi e, nə pa' pɑ sɔmmo lə lɑ́ tso tsɑ̌ gə msya, biŋ gúŋ pɑ cwə o bɔ, ŋkhe tso tsɑ̌ cwəpùŋ. 40Mo yə́ e tə bɑ gɛ bo yɔk pɑ a pɑ́, bɑ́ mo yɔk pɑ̀. 41Gɑ̌ siŋ wɔ gɑ́ bǎ wɑlə́ yə e gɔ sɔ' hɑ nthu' shyə bi po gɑ po nwə shyə́ m nə pa' pǒ bɑ pɔ Kristo a, tə gɔ sɔ' pi myə́ mcwɔ'fa' pɑ̀.
Mo pɔmtə́
(Mt 18.6-9; Lk 17.1-2)
42Da' gɑ mo yə e fa'tə bǎ ta' mo nə pɔmkəcɔk po pɔ gɑ pyə́ wap biŋ a, bɑ dzə̌ wə bɑ bi mo bɔ gɑ́ pu cə́ŋ gwɔ' gwyə nthúŋ é, ma' e shyə lɑpʉə. 43A pɑ gɑ́ pú ó gɔ ghə o fa'tə bvʉ́si, o ya' e; dzə̌ bɑ gɑ́ o ko nə vɔk kam pu, shyə́ nə lɑ bʉ́ mǔ məbʉ́ə gɔ nthʉm gehɛnə̀, nthʉm mɔk tə́ pi. 44-45A pɑ gɑ́ kwə̀ o gɔ ghə o fa'tə bvʉ́si, o ya' e; dzə̌ bɑ gɑ́ o ko nə́ vɔk kam kwə, shyə pá' pu gɔ ma' o pu a mkwə mǔ məbʉ́ə nthʉm gehɛnə̀ a. 46-47Bi á a piŋ bɑ gɑ́ bɛtsə o fa'tə o nə vʉ nə mhɔ o té e; dzə́ gɑ́ o ko nthʉ́m Nəfo Si kəpi bɛtsə shyə́ pa' pu gɔ ma' o nthʉ́m gehɛnə̀ pu a mnyə mǔ məbʉə a, 48tsʉ' yə́ nənəŋdam tə́ pfʉ́ a pɑ́, ba mɔk lə piŋ bɑ bi a. 49Nə́ pa' pu gɔ sɔ' lɑ mɔ́k pa' gwɛ́ á, nyəŋ bǎ nə wɑ̌lə́. 50Gwɛ̌ bɑ́ ywə pɑpúŋ, tə́ gwɛ̌ pi yə́ nə tʉ̀m bɑ pu gɔ piŋ lɑ kɑ́ nyəŋ nə é? Po ghə gwɛ́ nə po, biŋ bɑ bvɔk nə hwitə̀ cəcɑ̌ po.
Currently Selected:
MARKUSI 9: NTGomala
Highlight
Share
Copy
Want to have your highlights saved across all your devices? Sign up or sign in
Nouveau Testament Ghomala © Bible Society of Cameroon, 2002.
