MARKUSI 5

Yeso yɛ̀ mu' mo nə́ mzhwenyə cwəpùŋ

(Mt 8.28-34; Lk 8.26-39)

1Wap lə ko nə yə́ mu' jʉɔ shyə lɑpʉə, nthʉ́m gúŋ pɑ Gerasa. 2Yeso lə pɑ̌ nthəm nthʉm kənu', mu' mo zhwenyə cwəpuŋ pɑ́ nə é wuŋ sɔ' pu e yu'tə. Mo bɔ lə nthəm m mthəsì. 3E lə shwə̀ nthʉ́m mthəsì, sɔmmo lə piŋ bɑ́ bɑ ě ku' nə kwɑ́ e, kɑ dɑ́ pɑ́ gwɑ mtʉ̌ɔ ŋkwɑ e lə. 4Nə pa' a lə bɑ pu lə lɑ mkəlo' pu a gwɑ́ mtʉ̌ɔ ŋkwɑ́ é mcʉmmcʉ̌m, e cwa gwɑ̀ mtʉ̌ɔ, biŋ bo' mkəlo', tə́ la' sɔmmo piŋ gə gʉ' nə nthɔm é. 5E lə bɑ́ mtsʉ' bɑ m mɔkcʉ́, bɑ nthʉ́m mthəsì ba m kúŋgǒ, bɑ shwé, bɑ dɑ mwɔ' shàktə nɑ́ é. 6E lə yɔ Yeso gʉə sʉəsʉə, ŋkhʉ́dʉ́, sɔ' bvʉ́ dzə e. 7Shwé tɑ́ thə̀ gɑ: O ŋkwi kɑ bəm Yeso Mú Si tə Thə́ Kɛbəŋ? Gɑ ghɔm bu nə tsǒ Sí, kɑ́ paknyə a.

8Nə pa' Yeso lə bɑwə gɔm bi e gɑ: Zhwenyə cwəpuŋ təm nə bɛ yə̌ŋ.

9E lə həŋtə̌ é gɑ: Tso tsǔ bɑ wɑ?

E pa' bi e gɑ: Tso tsɑ̌ bɑ́ jɔmyɔ̌m, nə pa' a bɑ pyə̌ yɔ́m.

10E lə pǐŋ shəŋtə́ shwyɛ'nyə é gɑ́ e kɑ té wap nthʉ́m gùŋ. 11A lə́ nə pɑ̌ po'o mu' kà mgənɔ̀m pɑ tsʉ̌'u bɔ m nə ghəŋ kúŋgǒ bɑwə pfɑ́ mghé.

12Mzhwenyə cwəpuŋ bɔ lə cwyɛ'nyə Yeso gɔm gɑ: Cya wɔk nə mgənɔm, pyə ko nə pú.

13E lə pǐŋ bi pú. Wap piŋ nthəm ŋkho nə mgənɔm, guŋ ka mgənɔm awɛ piŋ fɑ kúŋ nə mkəkəŋ bvʉ́tə nthʉm shyə lɑpʉə; wap lə bɑ gwɛ a mnɔm shǎ' pʉə, wap fá nthʉm shyə lɑpʉə. 14Pɑ pyap mgənɔm bɔ lə khʉ̌ biŋ gɔ siŋ ywə bɔ nthʉm tisuŋ ba m nthʉm mla'. Pɔmnəŋ lə sɔ̌' jɔ ywə́ yə a lə təm a. 15Wap lə́ sɔ' bə́ŋ Yeso, jɔ mo yə́ zhwenyə cwəpuŋ lɑ bɑ nə e a bɑ ě cwə́ si, bɑ e kwa dzə́, bɑ zhyənwə e sɔ' bi e, yʉ yə mzhwenyə cwəpuŋ yə pu ŋkhe gɑ jɔmyɔ́m lə bɑ nə e a. Wap lə pwɔk té' o. 16Pɔ pyə wap lə yɔ pa' a lə nə shyə a lə siŋ wap ywə yə a lə cyə́ nə mo yə zhwenyə cwəpùŋ lə bɑ nə é a ba nə mgənɔm a. 17Wap piŋ ntho' cwəlɔ nə cwyɛ'nyə Yeso gɑ e təm nə ca' tsap gɔ gʉə sʉəsʉə. 18Yeso lə pɑ ŋkwɔ' nə ko nthʉm kənu', mo yə zhwenyə cwəpùŋ lə təm nə e a cwyɛ'nyə é həŋtə́ e gɑ e gɔ wuŋ bəŋ e. 19Yeso kəŋnyə bi e, da' gɑ́ gɔm bi e gɑ: Ghɔ la' o, bəŋ pɔ pǔ, siŋ wap guŋ ywə awɛ yə́ Cyəpɔ gə nə o shyə́ m nə cɔ̌mmtso e a. 20Bɛ bɔ lə ghɔ́, ntho' nə cyanyə guŋ ywə awɛ yə Yeso gə nə e a nthʉ́m Dekapoli. Nwə pɑ̀ shyə́ guŋ pɔ awɛ.

Nə́ yɛ mu' mjwǐ. Gò Yairos yám nə vʉ̌

(Mt 9.18-26; Lk 8.40-56)

21Yeso lə́ lɑ̌ kənu' sa' tə́ ŋkho nə yə mu' jʉɔ, dú pɔ cu'tə bəŋ é. E lə́ bɑ kəŋ shyə. 22Mu' mo nə mtadyə sinagogə tso tsyə́ pɑ Yairos lə nə yɔ Yeso, bvʉ́ nə mkwə myə́ 23biŋ shəŋtə shwyɛ'nyə gɔm gɑ: Mú go a yə ŋkho' wə gɔ pfʉ́, sɔ' jap bú nə é, é vɔk, bɑwə́. 24Pu Yeso lə ghɔ̌; vəŋ du pɔ lə bɑ́ jʉ́m e bɑwə nthənyə. 25Mu' mjwǐ lə bɑ si bɑ gɛ gho tə fɑ́ nə gu'dzʉ́ shwɔppʉ́ə mghǎm, mcyə pɑ nthəm nə e. 26E lə́ bɑ e yɔgo' té' nə mbú mgəgɛ, sim guŋ ywə yə a lə bɑ ě ghə a awɛ, e lə yu' hwítə; gho e pɑ gɔ pɑ m dzə̀. 27Mɑmjwi bɔ lə yu' guŋ ywə awɛ yə pu lə gɔm nə Yeso a, sɔ̌' cəcɑ̌ pɔmnəŋ, nthəm m jʉ̀m, ŋkwak dzə e. 28Nə pa' e lə bɑwə sɛ gɑ: Ŋ da' gɔ ŋkwak bǎ da' mdzə myə́, bɑ gɑ gɔ vɔk. 29A lə wuŋ bɑ́ pɑ́ cwə o bɔ mcyə ya' nə təm nə é, e yu' nthʉ́m nɑ́ e gɑ́ ě yɛ̀ nə gho é. 30Yeso lə wuŋ ju' gɑ́ mu' gʉ' təm nə e. E lə fɛnyə̀ nɑ́ e cəcɑ̌ pɔmnəŋ biŋ gɔm gɑ: Wɑ̌ ŋkwak mdzə mə̌?

31Pɑkhʉ̌ pyə lə ghɔm bi e gɑ: O bɑwə jɔ vəŋ pɔ pu pɑwə nthənyə ó, o həŋtə gɑ wɑ kwak a m gɑ́ kɑ?

32Da' gɑ e lé giŋnyə e nə yɔ mo yə e lə ghə nwə bɔ a. 33A lə pɑ̌ po'o mjwǐ bɔ, pwɔk, səŋ gɑ taktak, bɑwə jyə́ ywə yə a lə təm nə e a, sɔ' bvʉ́ nə mkwə myə́, siŋ e guŋ nwə awɛ nyənyɔ. 34Tə́ Yeso ghɔm bi e gɑ:

Go a, piŋnthʉm o vɔk o; ghɔ nə hwítə̀, jɛ́ nə guŋ ghó o awɛ.

35E lə pɑ̌ gɔm po', shɑ́ pɔ fɑ́ ywə tadyə sinagogə sɔ' gɔm bi e gɑ: Gò o pfʉ́, o gɔ nəŋ piŋ paknyə́ Tá gɑ́ kɑ̀? 36Da' gɑ́ la' Yeso lɑ tsɔ ghɔm sɛ sɔmywə, gɔm bi tádyə̌ sinagogə gɑ: Kɑ́ pwɔk, piŋ piŋ. 37A lə piŋ bɑ po'o, e lə́ piŋ gɑ́ sɔmmo yap jʉm e tə ně da' Pɛtrɔ pu Yakop ba Yohane fɑ Yakop. 38Wap lə ŋwak dyə tadyə̌ sinagogə. Yeso yɔ mɛnyə̀, pɔmnəŋ pɑwə dɔ̌, biŋ bɑwə shwe tə́ thə́.

39E lə́ kǒdyə́ gɔm bi pu gɑ: Yəŋ mɛnyə pu a lɔ̀ bɑ gɑ́ kɑ̀? Mu bɑ e ka pfʉ́, e di ti. 40Wap pɑ jə̀mtə é. Da' gɑ́ e lə tě guŋ pɔ awɛ dyə́, dɑ da' tá mú pu map e, ba pɔ pyə wap lə bɑ jʉm e a, pu a pu ko tsʉ' yə mú lə́ bɑ nə a. 41E lə tɔm pǔ mú, gɔm bi e gɑ: Talita kumi, a pɑ́ nthútə́ gɑ: Mú go, gɑ̌ ghɔm bu, yǎm. 42Mú mjwǐ bɔ lə wuŋ dusi ntho' nə ghìŋtə, nə pa' a lə bɑ e ghə gu' shwɔppʉ́ə mghǎm. Nwə lə cyə̌ guŋ yap awɛ cwə o bɔ. 43Yeso piŋ shəŋtə́ sho' bi pu gɑ sɔmmo kɑ́ zhyə biŋ gɔm gɑ́ pu hɑ ywətsʉ bi mu mjwǐ.

Currently Selected:

MARKUSI 5: NTGomala

Highlight

Copy