LUKASI 24

Yeso yam nə vʉ̌

(Mt 28.1-9; Mk 16.1-8; Yhn 20.1-10)

1A lə pɑ̌ nə dəŋdzə tyɛ'dzʉ nə gapdzʉ, kwa' mɑfɔkdzʉ̌ pɑjwǐ bɔ ghɔ thəsì pu a mwɑ myə wap lə nyaptə a. 2Wap lə yɔ bɑ pu keŋnyə gwɔ' dzə thəsì, 3wap ko nthʉm o, da'gɑ la' wap yɔ pfə Cyəpɔ Yeso. 4Pa' nwə lə pɑ̌ shyə wap a, wap wuŋ nə yɔ jɔ pɔ pɑpʉə dzə pu bɑ wap kwa dzə dəŋnyələŋnyə. 5Wap lə pwɔk shʉ m sǐ; da' gɑ pɔ bɔ ghɔm bi pu gɑ: Nwə kɑ po cəŋ mo nthʉɔ cəcɑ̌ mpfə pɔ́? 6E tə tsɔ' pɑ, é bɑ e yam. Po kamtə nthi pa' e lə nə gɔm bi po cwə yə e lə jɑ Galilea a. 7Pa' e lə gɔm gɑ: A puŋ gɑ pu hɑ Mú mo nə bǔ mghɛ bo, pu kwé e thə́ bɛnyəpɛnyə, e yám nə batə tyɛ'dzʉ yɑtá.

8Wap lə kamtə mghɔm myə́. 9Wap lə fɑ̌ thəsì cwəlɔ, siŋ guŋ ywə awɛ bi pɔ shwɔp yɑmu' mgham ba m bi guŋ pyə shɑ pɔ awɛ. 10A lə bɑ Maria Makdala ba Yohana, bɑ Maria ma Yakop. Pyə shɑ mso pap lə ko siŋ mghɛ nthəm. 11Mghɔm bɔ lə pɑ nə mnyə́ map bɑwə hwə a tsə yɔjʉm, la' wap piŋ ywə yə pɑ jwǐ gɔm a. 12A lə pɑ po'o Pɛtrɔ lusi ŋkhʉdʉ gɔ thəsì bɔnyə jɔ pɑ mbak dzə́. Nə ghɔ nə yə ghəŋ nwə pɑ shyə é nə ywə yə a nthəm a.

Məjyə Emaʉs

(Mk 16.12-13)

13A lə piŋ bɑ pɑ tyɛ'dzʉ bɔ, shɑ pɔ pɑpʉ̌ə cəcɑ̌ pu pɑ gɔ m nə mu' guŋ yə pu ŋkhe gɑ Emaʉs nə nthə́ jyə mnam mɑbʉə nə ghɔ Yerusalɛm. 14Giŋ bɑ gɔm nwə nə mnwə bɔ myə a kɑ təm a cəcɑ̌ pu. 15Pa' wap lə pɑ gɔm lə fəŋnyə́ a, Yeso pɑ kwa' yʉ́ lə kwyatə wap, pu a pu pɑ cʉ̌m jyə. 16Da' gɑ bɑ mnyə map cɑnyə nə zhyə e. 17E lə ghɔm bi pu gɑ: Yə po giŋ fəŋnyə dəŋ po'o a bɑ kɑ? A lə pɑ̌ po'o wap tiŋnyə bɑwə shʉ cwəpuŋ. 18Mu' mo nə pú, tsó tsyə́ pɑ Kleopas pa' bi e gɑ: Ja o da' mo yə e Yerusalɛm nə tyɛ'dzʉ yəŋ gɑ, bɑ e ka zhyə́ mnwə myə a shyə a lə? 19E həŋtə wap gɑ: A kɑ? Wap pa' bi e gɑ: Nwə nə Yeso yə Nazarɛt yə e lə bɑ gɛ ghɔmnwə Si, bɑ e tʉɔ nə mfa' myə́, ba nə ghɔm tsyə dzə Si ba m dzə guŋ pɔ awɛ, 20pa' mkamsi pɔk pyə gwyə, ba mtadyə pɔk kɑ hɑ e nə vʉ̌, ŋkham e thə bɛnyəpɛnyə a. 21Bɑ pyə lə́ bɑwə ŋkwɛ gɑ e lə bɑ mo yə e lə́ bɑ gɔ kwi Israɛl a. A piŋ bɑ po'o bɑ pa' mnwə bɔ təm a a cwəlɔ mtyɛ'dzʉ mɑntha', 22bɑ shɑ pɑjwǐ pyə pyə a pu bɑ a kě sɔlam tsɔk, nə pa' wap kɑ ghɔ thəsì mɑfɔkdzʉ̌ 23biŋ ŋkho wap lə yɔ pfə e, sɔ' gɔm gɑ pɑ aŋgəle ŋwak bi pu, gɔm bi pu gɑ e bɑ pɑwə. 24Shɑ mso pɔk kɑ ghɔ yap thəsì, ŋkho jɔ ywə yə pɑjwǐ kɑ ghɔm a a pɑ́ nyənyɔ da' gɑ la' wap yɔ e.

25Yeso ghɔm bi pu gɑ: Pɑ tə ghə zhyənwə, tʉ̌m bɑ́ ǎ tsonyə nə piŋ nwə yə mghɛ ghɔm ghɔ̀m Si lə ghɔm a! 26Kristo la tə bɑ gɔ yɔgo' po'o tə ko nə ghu'tə e a? 27E lə piŋ ntho' nə Mosɛ, ba nə guŋ mghɛ ghɔm ghɔ̀m Si awɛ, bɑ nthutə ywə yə a lə bɑwə dé e a nthʉm gùŋ Mŋwa'nyə awɛ.

28Wap lə ghɔ̌ tə bɑ ŋkhəm bəŋ guŋ yə wap lə gɔ m nə a, Yeso ghə pa' e shyəcyə a, 29wap cwyɛ'nyə gɔm gɑ: Pɑ cwə, nə pa' bwadzʉ wə sɔ̌', bɑ ya'dzʉ̌ cyə. E lə ko nthʉm tisuŋ bɔ nə cwə. 30Cwə yə pu a pu lə pɑ tɑpe a, e pé msɛ, nyəŋ byanyə nə, bo' hɑ bi pu. 31Mnyə map ghyɛ', wap piŋ jyə́ e, e wuŋ bi dzə̌ pú. 32Wap ghɔm cəcɑ̌ pu gɑ: Tʉm tsɔk pu katə bɑwə ŋkhə nthʉm o məjyə cwə yə e la' bɑwə nthútə ŋwa'nyə bi pu a?

33Wap lə wuŋ gɔ pɑ cwə o bɔ, bɑnyə Yerusalɛm jɔ pyə shɑ pɔ shwɔp yɑ mu' mgham, bɑ wap cu'tə pu a pyə shɑ mso pap 34wap ghɔm bi pu gɑ: A bɑ nyənyɔ, Cyəpɔ bɑ e yam nə vʉ̌, nə pa' a bɑ e ŋwak bi Simon. 35Wap piŋ siŋ wap yap ywə yə a la' shyə məjyə a, ba pa' e la' bo' msɛ wap zhyə́ e a.

Yeso ŋwak bi pɔ shwɔp yɑmu' mghǎm

(Mt 28.16-20; Mk 16.14-18; Yhn 20.19-23; Mfa' 1.6-8)

36Wap lə pɑ̌ gɔm po'o, kwa' yʉ́ ŋwak bi pu gɔm gɑ: Hwitə pɑ́ bi po. 37Wap cwɔ', ŋkwɛ gɑ wap yɔ ghɛnyə́ mo. 38E ghɔm bi pu gɑ: Nwə kɑ́ nwə va' wɔ̌? Nwə kɑ po kwɛ yɑ nthi nwə nthʉm tʉm pǒ? 39Po yɔ bu mə̌ pu a mkwə mə̌. A bɑ pɑ kwa' myə̀. Po kwak a, po le a tə́ jɔ, zhwenyə tə bɑ ě ghə bapnɑ pu a mkwě pa' po wə jɔ bɑ gɑ̌ ghə a pɑ́. 40E lə nə ghɔm po'o da'tə bu myə́ pu a mkwə myə́ bi pu. 41Pa' ŋwɛnyə lə́ bɑ nə pu tə la' wap wuŋ biŋ a, nwə yɑwə shyə wap cyə a, e lɑ ghɔm bi pu gɑ: Po ghə ywə pfɑpfɑ̀ si tsɔ' a? 42Wap lə hɑ po' bapgu nthoto bi e, 43e lə kwǐ pfɑ pɑ dzə̌ pu.

44Biŋ gɔm bi pu gɑ: Yə̌ŋ bɑ ywə yə ŋ də ghɔm bi po cwə yə pɑ lə bəmtə bɑ a: Ywə yə pu lə və nə m̀ nthʉm mco' Mosɛ, nthʉm ŋwa'nyə mghɔm ghɔm Si, ba nthʉm mzhwɔp dɔlɔ̌ a pəmtə. 45A lə pɑ po'o e ghyɛ' zhyə̌nwə yap nə́ nə̀ ju' ywə yə pu lə və a. 46Biŋ gɔm bi pu gɑ: A bɑ pa' pu lə və a: Kristo gɔ sɔ' yɔgo', yam nə vʉ nə batə tyɛ'dzʉ yɑtá. 47Pu pɑ dɑ tso tsyə́ gɔm nwə pʉɔtʉm ba nwə nə lɑ mhɔnwə pɔmnəŋ shwyɛ' wap bi guŋ mguŋ awɛ tə ntho' fɑ Yerusalɛm. 48Po nə̌ŋ bɑ mkwinthɛ nə. 49Sɔ' m nə m, gɑ gɔ təm ywə yə Tá a lə ka'nyə a bi po. Sɔ' m nə po, po cwə pɑ nthʉm tisuŋ tɑ̌ tʉɔ fɑ́ thə́ kɛbəŋ ŋkho nə po.

Yeso kwɔ' kɛbə̀ŋ

(Mk 16.19-20; Mfa' 1.9-11)

50E lə lɑ̌ wap gɔ tə ŋkho Betanya, bʉ' bu myə́ thə́, nyəŋ byanyə nə pu. 51Cwə yə e lə pɑ nyəŋ byanyə nə pu a, hap nə pu, ŋkwɔ' m kɛbəŋ. 52Sɔ' m nə pu, cwə yə wap lə ghamtə e a, bɑnyə m Yerusalɛm, nthʉm ŋwɛnyə. 53Wap lə biŋ bɑ guŋ mcwə awɛ bɑ pɑ Dyə Si bɑ gamtə Si.

Currently Selected:

LUKASI 24: NTGomala

Highlight

Copy