LUKASI 20

Nə́ tʉɔ Yeso

(Mt 21.23-27; Mk 11.27-33)

1A lə pɑ nə mu' tyɛ'dzʉ nə mtyɛ'dzʉ myə e lə bɑwə ji'tə pɔmnəŋ ywə Dyə Si bɑ siŋ wap Cuŋ pɑpuŋ a, mtadyə mkamsi pu a pɑ zhyə mco', ba mghətso ŋwak. 2Gɔm bi e gɑ: Siŋ wɔk tʉɔ yə o nə gə mɔ mnwə a, kə mo yə e hɑ tʉɔ bɔ bu a lə. 3E ghɔm bi pu gɑ: Ba myə gɑ̌ gɔ həŋtə wɔ nwə: 4Po siŋ a: Kwǐshyə Yohane lə fɑ m kɛbəŋ kɑ bi pɔmnəŋ? 5Wap lə sɛ cəcɑ̌ pu gɑ: Pɑ ghɔm gɑ a lə fɑ m kɛbəŋ, bɑ e gɔ ghɔm gɑ: tə nwə kɑ bɑ po lě tə piŋ e? 6Pɑ nəŋ gɔm gɑ a lə fɑ m bi pɔmnəŋ, bɑ pu gɔ lɑ mwɔ' tamtə wɔk pɑ nə pa' a bɑ pu zhyə gɑ Yohane lə bɑ gɔm ghɔm Si. 7Wap lə pa' gɑ wap ka zhyə tsʉ yə a lə fɑ m nə a. 8Yeso piŋ gɔm yə́ bi pu gɑ: Bi a pɑ́ ba myə̀ lə siŋ wɔ tʉɔ yə gɑ̌ nə gə mnwə bɔ a.

Nwə́ pɑ nu' mlu' pɑ zhwə pɔ

(Mt 21.33-46; Mk 12.1-12)

9Yeso lə ghɔm po'o biŋ dɑ ghɔm tə tutə gɔm bi pɔmnəŋ gɑ: Mu' mo lə tsə̌ mthə nə nu' mlu' pe e, jo' bi pɑ nu' mlu', nthəm nthʉm guŋ gɔ m nə́ mu' tsʉ'. 10Cwə lə ku'u e təm mu' gɛfa' e bi pɑ nu' mlu' gɑ e ghɔ kwi ywə yə a nthəm pe a. Pɑ nu' mlu' lə ko shwɔ e, jəŋ e tə hɑ sɔmywə bi e. 11E lə piŋ nthəm mu' gɛfa' e bi pu. Wap ko ŋkwi' shwɔ bɑ yʉ́, jəmtə e, jəŋ e tə hɑ sɔmywə bi e. 12E lə piŋ ŋkwi' nthəm mu' mo batə yɑtá, wap ko bo' fiŋ nə e, tə jəŋ e. 13Gɛ pě sɛ gɑ: Gɑ̌ gɔ ghə gɑ kɑ? Gɑ̌ gɔ təm mú a yə gɑ ŋkhuŋ e té' a; bǎ yʉ́, wap gɔ ko ghə mku' myə́. 14Da' gɑ pɑ nu' mlu' lə nə yɔ mú é sɛ cəcɑ̌ pu gɑ: E bɑ dzʉdyə̌; pɑ zhwə e, a tsə mcʉ́' cʉ́' tsɔk pɑ. 15Wap lə lɑ e nthəm pé cwəlɔ, jwə e.

Gɛ pe gɔ po'o ghə m gɑ kɑ nə pú? 16E gɔ sɔ' sɔ' zhwətə pɑ nu' mlu' bɔ pyə a bɑ wap ka ku' nə sɔmywə a; hɑ pe bi shɑ pɔ. Wap lə nə yu' po'o gɔm gɑ: Bi a lə pɑ pa' a. 17Yeso lə lě wap dəŋdəŋ, həŋtə wap gɑ: Ghɔm tsɔ tsyə pu lə və nthʉm ŋwa'nyə Si a nthutə gɑ́ kɑ̀?

Gwɔ' yə pɑ pəm pa' lə wa' a lě dí

ji gwɔ' phə pa'.

18Bǎ ya mo lə yə e vʉ nə gwɔ' bɔ a, gɔ po'tə nɑ́ e, mo yə gwɔ' bɔ vʉ nə e a, a tsa'tə e.

Nə ma' shwɔp bi kasa

(Mt 22.15-22; Mk 12.13-17)

19A lə pɑ po'o mtadyə mkamsi pu a pɑ zhyə́ mco' cəŋ nə ghəm e pɑ cwə o bɔ, da' gɑ biŋ bɑwə bwɔk pɔmnəŋ. Nə pa' a lə bɑ wap zhyə gɑ Yeso lə gɔm ghɔm tə tutə bɔ pɑ nə́ pú.

20Wap lə to' nə na' Yeso, nthəm mjuŋ gɑ wap ghɔ dəŋtə e dɑ pɑ ghɔm tsyə nə gəm e, tə hɑ e bi pɑ sa' guŋ pu a bi gɔpna'. 21Wap lə ghɔ gɔm bi e gɑ: Ta pyə zhyə gɑ ghɔm tsǔ ba nwə yə o da'tə a bɑ dəŋdəŋ. O bɑ nyənyɔ nə guŋ pɔ awɛ. O da'tə məjyə Si nyənyɔ. 22A po'o bi a pɑ pyə ma' shwɔp bi kasa kɑ gɛ̌? 23Yeso lə zhyə yo' yə wap lə bɑ wap tʉ' nə e a gɔm bi pú gɑ: Po la'tə a bɛ ŋkhǎp. Wap la'tə e. 24E həŋtə wap gɑ: Thə́ mo ba ywə bvəvə yə a nə a bɑ yə wɑ? Wap pa' gɑ yə kasa. 25Yeso ghɔm bi pú gɑ: Po pa' ywə kasa bi kasa, ba' yə Si bi Si. 26Wap lə yu' po'o la' wap zhyə nə lɑ ghɔm tsyə gəm e, nwə cyə wap, mshwə map cɑ.

Nwə nə yam nə vʉ̌

(Mt 22.23-33; Mk 12.18-27)

27Shɑ pɑ Sadukai, pɔ pyə wap gɔm gɑ nə yam nə vʉ̌ tə bɑ wə a pɑ lə sɔ' yap bəŋ Yeso nə həŋtə e shɑ mnwə. 28Wap lə ghɔm bi e gɑ: Ta, Mosɛ lə və bi pyə gɑ. Mbɛ pɑ bɑ e ghə mumap e yə mbɛ bɑ e lɔmdyə̌, pfʉ tə tsə mú, e sɔk npfɔk e, pu e ghə yə gwya fɑ e bɔ. 29A nəŋ bɑ po'o bɑ mu' mɑmjwi lə ghə pwabɛ sɔmbʉə. Dəŋdzə lɔmdyə pfʉ tə tsə́, 30ba batə yɑpʉə 31batə yɑtá sɔk npfɔk; pɑ po'o nə pɔ sɔmbʉə; sɔm lə nə pfʉ dzə́ mú. 32Mjwi ti pfʉ yə. 33Wap nə́ miŋ həŋtə Yeso gɑ: A gɔ sɔ' pɑ́ nə tyɛ' nə yam nə vʉ̌ mjwǐ bɔ pɑ yə wɑ nə pú? Nə pa' guŋ yap sɔmbʉə lə lɔm e dyə.

34Yeso ghɔm bi pu gɑ: Pɔ pyə wap bɑ m nə yəŋ wɔ dzʉ a, dɔmdyə. 35Da' gɑ pɔ pyə wap bɑ wap ku'nyə nə sɔ' bɑ nə yə wɔ dzʉ yə a gɔ tə sɔ' a, piŋ pɑ ba m nə yam nə vʉ̌ a tə dɔmdyə pɑ. 36Vʉ̌ tə jɑ nə pu pɑ, nə pa' wap bɑ wap cʉ' m pá' pɑ aŋgəle a, shʉ' po Si, pǒ nə yam nə vʉ̌. 37Nə pa' mpfəsi gɔ sɔ' yam nə vʉ̌, nə pa' Mosɛ bɑ e le da'tə yá nə cwə cu' mghé mɔk tə khə tsʉ' yə e ŋkhe Cyəpɔ gɑ Si Abraham, Si Isak, Si Yakop a. 38Si tə bɑ Si mpfə pɔ pɑ, e bɑ Si pɔmtʉɔ pyə wap bɑ pyə a. 39Shɑ pɑ zhyə́ mco' ghɔm gɔm gɑ: Ta o ghɔm a puŋ 40nə pa' wap la tə ku' nə piŋ həŋtə e sɔmywə a.

Mesia bɑ mú biŋ bɑ Cyəpɔ David

(Mt 22.41-46; Mk 12.35-37)

41Yeso lə kwi' gɔm bi pu gɑ: Pu gɔm gɑ Kristo bɑ mu David m gɑ kɑ? 42Nə pa' ba David yə gɔm nthʉm ŋwa'nyə mzhwɔp gɑ: Cyəpɔ ghɔm bi Cyəpɔ a gɑ: Cwə nə ghəŋ pu tʉɔ a 43tə gə o ghiŋ də̌m mghɛ bo pǔ. 44David ŋkhe e gɑ Cyəpɔ e, e piŋ bɑ mú e m gɑ kɑ?

Nə pwɔk pɑ zhyə mco'

(Mt 23.1-36; Mk 12.38-40)

45Yeso lə piŋ gɔm bi pɑkhʉ pyə dzə guŋ pɔ awɛ gɑ: 46Po pɔm pɑ zhyə́ mco' pyə wap ŋkwa nsʉə dzə nə giŋ, bɑ shəŋ gɑ pu ca'tə wap dəm sim, ba ŋkho sinagogə shwə nə dəŋdzə kwɔ', biŋ bɑ tsʉ la'nwə shwə pɑ nə dəŋ dzə tsʉ' a. 47Wap pyə wap mitə tsə mpfɔk ndyə map, biŋ bɑ gə msʉəsʉə mcwyɛ'nyə nə fʉtə wap a. Pu gɔ sɔ' nyəŋ shɛ yə ǎ cyə a thə' pú.

Currently Selected:

LUKASI 20: NTGomala

Highlight

Copy