MFA' MGHƐ NTHƏM 8

Dəŋdzə nə cwɔ'mkwə cu'tə pɔ Kristo

1Saulo lə bɑ mo nə pɔ pyə wap lə bɑwə biŋ vʉ Etiennə a. A lə to' pɑ̌ nə tyɛ'dzʉ bɔ, pu to' nə cwɔ' mkwə cwəpuŋ Yerusalɛm. Guŋ pɔ awɛ tə ně da' mghɛ nthəm lə sɛtə́ gɔ m jyə̀ Yudea pu a m Samaria. 2Shɑ pɑ bɛ pɑ lɑ mku' biŋ lə tə̌ŋ Etiennə biŋ dɔ e kwa' pɑpuŋ. 3Nəŋ sɔ' m nə Saulo e pɑ sa'tə Cu'tə pɔ Kristo, bɑ ŋkho dyə dyə̌, nthé pɑ bɛ pu a pɑ jwǐ, ma'tə wap dyəcɛ̌. 4Pɔ pyə pu lə sɛtə wap a lə́ bɑ gɔ jyə́ jyə̀, giŋ bɑ siŋ Cuŋ pɑpúŋ Ghɔm.

5A lə pɑ po'o Filipo, pa' e lə tsəŋ gɔ nə mu' tisuŋ Samaria a, ko wə́ shyanyə Kristo. 6Du pɔ pɑ ŋkwishwə, nthɔm ghɔm Filipo nə pa' pu lə bɑwə ju' nwə msya myə e lə gə á, biŋ bɑwə jɔ má. 7A pɑ po'o bo'gwyə mzhwenyə cwəpuŋ pɑ nthəm nə pɔ pyə a lə bɑ ǎ ko nə pu a, nə təm bɑ shwé. Ba bo'gwyə mkhʉm pu a ŋkho'tə pɑ jɛ. 8Kwa' mɑ ŋwɛ́nyə lə pɑ̀ nthʉm tisuŋ bɔ.

9A lə́ nə pɑ po'o mu' mbɛ tsə pɑ nthʉm tisuŋ bɔ tso tsyə̀ pɑ́ Simon, e pɑ gə kɛ, a pɑ̀ sya pɔmnəŋ nthʉm guŋ Samaria awɛ. E lə gə po'o bɑ ŋkwɛ gɑ e bɑ kwa' gha' mo. 10Guŋ pɔ awɛ pɑ jʉm e tə fɑ nə pɑkhʉ̌ gɔ ŋkhəm nə mghətso lɑ bɑ gɔm gɑ: Bɛ yəŋ gɑ bɑ gʉ' Si yə pu ŋkhe gɑ Gʉ' gwyə a. 11A pɑ gɑ́ wap lə bɑ́ jʉ̌m é po'o, bɑ a lə du gɑ e lə dɑ kɛ tsyə́ nə sya wap tə fɑ́ tə́ tyɛ'. 12Da' gɑ wap lə cwə̌ tə biŋ Cùŋ pɑpùŋ nə Nəfo Si ba nə tsǒ Yeso Kristo yə Filipo lə bɑwə gɔm a, guŋ yap awɛ kwishyə, pɑ bɛ ba pɑ jwǐ. 13Ba Simon lə cʉ' yə biŋ Si, ŋkwi yə shyə, bɑ pɑ jʉm Filipo, bɑ jɔ mtiŋ gwyəgwyə pu a msya myə a lə bɑwə nthəm a, nwə pɑ shyə e.

14Mghɛ nthəm pyə wap lə bɑ Yerusalɛm a lə nə yu' gɑ pɑ Samaria piŋ ghɔm Si, nthəm Pɛtrɔ pu Yohane wə. 15Wap lə cwə tə ŋwak wə, shwyɛ'nyə Si nə pɑ Samaria gɑ wap kwi Zhwenyə Dɔlɔ̌. 16Nə pa' Zhwenyə Dɔlɔ̌ lə jɑ́ tə wuŋ ŋkho nə sɔmmo yap, a lə bɑ wap kwi da' shyə nə tso Cyəpɔ Yeso. 17Pɛtrɔ pu Yohane lə to' nə yap bǔ nə pɑ Samaria, wap pɑ ŋkwi Zhwenyə Dɔlɔ̌.

18Da' gɑ Simon lə cwə tə jɔ̀ pa' mghɛ nthəm wə jap bu nə pɔ̀, wap kwi Zhwenyə Dɔlɔ̌ a, bhə́ ŋkhap bi pu gɔm gɑ: 19Po hɑ tʉɔ bǎ bəm po'o gɑ pɔ pyə gɑ̌ yap bu nə pu a, wap kwi Zhwenyə Dɔlɔ̌. 20Pɛtrɔ ghɔm bi e gɑ: Tə la' po ŋkhàp o pəmtə pfʉ́, nə pa' o ŋkwɛ gɑ bi a pɑ pu lɑ ŋkhàp jò ywə yə Si hɑ bi mo tə kwǐ ŋkhap nə a. 21Yu tsʉ' kɑ yu ywə lɑ tə̌ nə ywə yə a wə shyə tsɔ' a pɑ́, nə pa' tʉm tsǔ tə dəŋdəŋ dzə̌ Si a. 22Kwyəpnyə nə tʉm shɔkcɔk tsǔ, biŋ shwyɛ'nyə Si. Mu'cwə e lɑ mkwɛnyə cwəpuŋ myə a sɔ' nthʉm tʉm o a nə shwyɛ' o. 23Nə pa' gɑ wə jɔ gɑ́ o nthʉm bɔkbɔk nwə dzəzə ba m̀ nthʉm mgwɑ mnwə cwəpuŋ. 24Simon piŋ ba' gɑ: Pɑ kwa' wɔ nə cwyɛ'nyə Cyəpɔ nə m̀ po'o gɑ sɔmywə yə po gɔm a kɑ sɔ' nə m̀.

25Pɛtrɔ pu Yohane lə cwətə hɑ ŋkwinthɛ̌, biŋ gɔm ghɔm Cyəpɔ cwəlɔ, bɑnyə Yerusalɛm giŋ bɑ siŋ Cúŋ pɑpuŋ bi mpfə́ la' jɔmyɔ̌m Samaria.

Filipo pu ŋkho nthɛ fo Etiopia

26Aŋgəle Cyəpɔ ghɔm bi Filipo gɑ: Lusi gɔ m mto dzʉ nə məjyə yə a dzəŋ fɑ Yerusalɛm gɔ Gaza a, a wə bɑ a ghaknyə cwəlɔ. 27Filipo lə wuŋ dusi gɔ. A nə pɑ̌ po'o, mu' sʉ̌ mo yə́ Etiopia gɛfa' Kandakos Mɑfo Etiopia, ŋkho nthɛ Mɑfo yə e lə̀ bɑ e ghɔ Yerusalɛm nə ghiŋ piŋnthʉm 28pɑ məjyə bɑnyə m la' e, bɑ e cwə dəm kɑlik bɑwə ŋkhe ŋwa'nyə gɔm ghɔm Si Esaya. 29Zhwenyə ghɔm bi Filipo gɑ: Ghɔ ŋkwyatə́ kɑlik yɑ. 30Filipo khʉdʉ̌ ŋkwɔ' nə, ju' pa' sʉ̌ mo bɔ wə ŋkhe ŋwa'nyə gɔm ghɔm Si Esaya a, biŋ gɔm bi e gɑ: Tə́ o bɑwə ju' ywə yə o wə ŋkhe a kwa' pɑpuŋ lə? 31E pa' bi e gɑ, gɑ gɔ yu' m gɑ́ kɑ̀, bi a pɑ gɑ́ ŋ ka ghə mo yə e gɔ tutə bəm a? E lə ghɔm po'o cwəlɔ ŋkhe Filipo gɑ e kwɔ' shwə bəŋ é. 32Tsʉ' ŋwa'nyə yə e lə bɑwə ŋkhe a bɑ gɑ:

Dəŋdəŋ pa' jʉ̀jʉ̀ yə pu wə dɑ e

gɔ m nə wa é a

dəŋdəŋ pa' mu jʉ̀jʉ̀ tə gi

dzə̌ pɔ pyə wap wə ŋkhəm é a

a bɑ dəŋdəŋ po'o tɑ e tə ŋa' shwə e pɑ.

33Yə nə fi' nɑ hɑ si lě gə e pi shɛ́.

Wɑ̌ gɔ la' ghɔmnwə nə pɔ nə yə́ wɔdzʉ́?

Nə pa' bɑ pu le nthé vɔk e nə dəmca' a.

34Sʉ̌ mo lə piŋ gɔm bi Filipo gɑ: Sə́só, gɔm ghɔ̀m Si gɔm po'o nə wɑ? Pɑ nə é kɑ nə mu' mǒ. 35Filipo cwɔ' shwə é, ntho' nə tsʉ' ŋwa'nyə bɔ nə siŋ e Cuŋ pɑpuŋ Yeso. 36Pu a pu lə pəmtə gɔ̌ tə ŋkhəm nə mu' kəŋ shyə, Sʉ̌ mo piŋ gɔm gɑ: Yɔ shyə̌ yəŋ gɑ; kɑ wə ŋkhɔ pa' gɑ kwishyə a? 37-38E lə ghɔm gɑ pu lɑ kɑlik e nthiŋnyə wap pɑpʉə tsəŋ shyə, Filipo pu Sʉ̌ mo. Filipo nu' e shyə. 39Wap lə cwə tə nthəm shyə, Zhwenyə Cyəpɔ kwa Filipo nə gɔ la' Sʉ̌ mo piŋ jɔ e, da' gɑ nə ghɔ cwəlɔ giŋ bɑ ŋwɛnyə. 40Sɔ' m nə Filipo, e lə yɔ bɑ m Azoto, biŋ bɑ giŋ bɑ siŋ Cuŋ pɑpúŋ nthʉm guŋ mtisuŋ awɛ, biŋ gɔ m Kaesarea.

Currently Selected:

MFA' MGHƐ NTHƏM 8: NTGomala

Highlight

Copy