MFA' MGHƐ NTHƏM 18

Nə tʉ̌ cu'tə pɔ Kristo Korinto

1Polo lə fɑ Atenya, gɔ Korinto. 2E lə ko ywə́ jɔ mu' yə Yudea tso tsyə́ pɑ Akilas, e pɑ nthəm Ponto, bɑwə tə fɑ m Italia pu jwǐ e Priska. Nə pa' a lə bɑ Klaudia yap mcò' gɑ guŋ pɑ Yudea awɛ təm Roma. Polo lə lɑ́ Akila pu Priska gə mso pyə̀. 3A piŋ bɑ̀ pa' pu a pú lə fa' pɑ ta' ywə a. Wap lə bɑ́ pɑ pa' dzə́ nə sǎm mnthap. Polo lə cwə wə pù biŋ bɑ fa'. 4A lə bɑ̀ nə guŋ msabat awɛ, Polo pɑ dɑ̀ ghɔm dyə sinagogə bɑ siŋ pɑ Yudea pu a pɑ Grikia nwə gɑ wap kwyəpnyə. 5Da' gɑ́ cwə yə Silas pu Timotio lə fɑ Makedonya sɔ' a, Polo cʉ' cwəlɔ bɑ jap guŋ yə cwə awɛ pɑ nə Ghɔm. Bɑ gɔm dzə pɑ Yudea gɑ Yeso bɑ Mesia. 6Pa' pɑ Yudea bɔ lə pɑ ŋkhəŋnyə biŋ bɑ shap Polo a, e lə cʉ' mdzə́ myə́, gɔm bi pu gɑ: Mcyə mɔ́ ko pɑ nə po; tə sɔ' m nə m̀, gɑ wə bɑ dɔlɔ̌. Tə fɑ cwəlɔ gɑ gɔ pɑ ghɔ pɑ wə pɑ tə pɑ pɑ Yudea. 7E lə lù tsʉ'u gɔ m ywə mu' Tito Zhusto biŋ Si, la' tsyə́ pɑ̀ bəŋ sinagogə. 8Krispo tadyə sinagogə lə piŋ Cyəpɔ pu a tuŋdyə e awɛ, ba shɑ pɑ Korinto tə jɔm yu' gi Polo, shʉ' pɑ piŋ, ŋkwi shyə́. 9A lə pɑ mu' mtsʉ' Cyəpɔ ghɔm bi Polo nthʉm nə yɔ m nthʉm zhwenyə gɑ: Kɑ pwɔk, ghɔm nə gɔ pɑ dzə, kɑ lɛ́tə. 10Nəpa' pu nə bəmtə bɑ́, bi a pɑ́ sɔmmo lə yap pu nə o nə lɑ o jɔgo', nə pa' pɔ pɑ̌ nthʉm tisuŋ yəŋ gɑ tə jɔ́m. 11Polo lə cwə wə ta' gu'dzʉ mkàm, bɑ̀ ji'tə wap ghɔm Si.

Nə fyɛ' Polo dzə̌ Galion

12A lə pɑ nə cwə yə Galion lə pɑ̀ gɛ sa' Akaya, guŋ pɑ Yudea awɛ pɑ́ ŋkwishwə nə cwɔ'mkwə Polo cwəpuŋ; wap piŋ dɑ e nə gɔ dyə fyɛ'. 13Gɔm gɑ: Bɛ yə̌ŋ gɑ bɑwə shəŋ nə lɑ pɔ̀ gɔ m nə mu' cu'tə pɑ piŋ Si yə mco' ka zhyə́ ya a. 14Polo lə pɑ̀ gɔ ghɔmnwə, Galion pa' bi pɑ Yudea gɑ: A la' bɑ nə́ hɔ mco' kɑ́ nwə kuso lɑ bɑ gɑ̌ yu' wɔ m pɑ Yudea dəŋdəŋ. 15Tə pa' shɛ́ yɔ bɑ́ pɑ́ nwə nə piŋ, pu a nwə mtso ba m nə mco' myə a bɑ́ pɑ́ mɔ a, yɑ nwə wə de pɑ wɔ. Bi a pɑ ŋ də ko nə mɑ mnwə nə fyɛ' pɑ. 16E lə ghɔm po'o, jəŋ wap dyə fyɛ'. 17A pɑ po'o guŋ yap awɛ ghəm Sostɛnə tadyə sinagogə, shwɔ e dzə̌ dyə fyɛ', da' gɑ la' Galion ko nə mnwə bɔ̌.

Polo ghɔ Antiokia

18Polo lə pǐŋ na' shwə́ Korinto biŋ nthəm cəcɑ̌ mfɑ̀mfɑ́, ŋkho kənu' gwyə nə gɔ m Siria, nə ghɔ po'o pu a Priska ba Akilas pəmtə bɑ̀. A lə nə pɑ bɑ ě kəm thə e Kɛnkrea, shyə̀ m nə shɑ̀ mka'nyə myə e lə ghə a. 19Wap lə ko Efeso, Polo pu a mso pyə hapnyə. E ghɔ sinagogə gɔm bi pɑ Yudea. 20Wap lə pɑ gɔm bi Polo gɑ pu a pu na' shwə́, e kəŋnyə. 21Da' gɑ́ nə ghɔ gɔ́m bi pu gɑ: Gɑ̌ gɔ la' piŋ sɔ' wə po mu' cʉ́m bi a Si piŋ a. E lə ko shyə lɑpʉə Efeso, 22nthəm Kaesarea, bʉɔ sha'tə cu'tə pɑ piŋ, dzəŋ gɔ Antiokia 23ŋkho wə na' shwə̀, biŋ gɔ ŋkhəka ghəŋ Galata ba m Frugia bɑ nyəŋ gʉ́' nə mghɛ zhi'nwə.

Apolos

24Mu' yə Yudea tso tsyə pɑ́ Apolos, nthəm m Aleksandria lə sɔ' Efeso. E lə́ bɑ mo bɑ e ghə Zhyənwə, bɑ e zhyə́ ŋwa'nyə Si. 25A lə bɑ bɑ̀ pu lě siŋ e Məjyə Cyəpɔ, e piŋ bɑ ŋkhaktʉ̀ɔ, bɑ siŋ biŋ bɑ ji'tə pɔmnəŋ nwə kwa' dəŋdəŋ nə Yeso da' gɑ bɑ e zhyə da' kwishyə Yohane. 26E lə to' nə cəŋtə gɔmnwə dyə Sinagogə. Da' gɑ Priska pu Akilas lə cwətə ju' pa' e gɔm nwə a, dɑ̀ é shəŋtə da'tə e məjyə Si. 27Pa' e lə pɑ̀ shəŋ nə ghɔ Akaya a, mfɑ̌mfɑ̀ piŋ, bvə ŋwa'nyə bi mghɛ zhi' nwə nə da'tə e bi pu gɑ wap lɑ̀ e pɑpúŋ. E lə cwətə ŋkho wə́, a cyə m nə gho' Si e cəŋtə ŋkwitə pɑ piŋ, 28nə pa' gʉ' ghɔm tsyə lə bɑ hya tsyə pɑ Yudea pɑ dəm sim nə cwə yə e lə bɑ shyə́ m nə ŋwa'nyə da'tə gɑ Yeso bɑ Mesia a.

Currently Selected:

MFA' MGHƐ NTHƏM 18: NTGomala

Highlight

Copy