MFA' MGHƐ NTHƏM 14

Polo pu Barnabas Ikonya

1A lə ko Ikonya bɑ pɑ́ pa' a kɑ zhí bɑ a: Polo pu Barnabas ghɔ dyə Sinagogə pɑ Yudea, gɔm nwə tə pɑ Yudea ba pɑ Grikia pʉɔtʉm tsap shʉ' pɑ piŋ kwa' vəŋ e. 2Da' gɑ pɑ Yudea pyə wap la tə piŋ a nyəŋ bo nthʉm tʉm pɑ tə pɑ pɑ Yudea pyə wap lə piŋ a nə mfɑ̌mfɑ. 3Polo pu Barnabas la tə cyətə na' shwə́ wə́ pɑ; tʉm sap lɑ bɑwə shəŋtə jap nə Cyəpɔ yə e lə bɑwə ŋkwinthɛ̌ nə ghɔm gho' tsyə́, bɑ gə wap lɑ bu map gə mtiŋ ba msya. 4Pɑ tisuŋ lə ghap m ghə̌ŋ bʉə. Shɑ pɔ pɑ jʉ̀m pɑ Yudea, pyə shɑ pɔ pɑ jʉm mghɛ nthəm. 5Pɑ tə pɑ pɑ Yudea pu a pɑ Yudea lə yap gɑ wap gɔ lɑ gʉ' ko nə, lɑ mwɔ' tamtə mghɛ nthəm. 6Polo pu Barnabas lə zhyə ywə yə a si a, shəŋ tsʉ' tʉmnyə tisuŋ Likonya, ba m Listra, ba m Dɛrbe pu a m géŋnyə tsʉ'u. 7Ba m tsʉ'u bɔ wap pɑ siŋ Cuŋ pɑpuŋ.

Polo yɛ mu' ŋkhʉm

8Mu' mbɛ lə bɑ Listra bɔ bi a pɑ e lə tiŋnyə nə mkwə myə́, bɑ ŋkho'tə tə fɑ vam, bɑ e la m giŋ. 9E lə pɑ̀ mu' tyɛ'dzʉ bɑwə ju'nwə yə Polo lə bɑ̀wə́ gɔm a, Polo lé é dəŋdəŋ biŋ jɔ gɑ e ghə piŋnthʉm yə bi a pɑ a vɔ́k e a, 10gɔm bi e tɑ thə́ gɑ: Lusi nthiŋnyə dəŋdəŋ nə mkwə mu! Bɛ bɔ léŋ, giŋ.

11Pu lə nə yɔ ywə yə Polo gə a, shɑ pɔ cəcɑ̌ pɔmnəŋ ghɔm nə ghɔm pɑ Likonya gɑ: Msi sɑnyə shʉ' pa' pɔmnəŋ a, fi' sɔ' bəŋ pɑ. 12Wap lə ké Barnabas gɑ Zʉs, ŋkhe Polo gɑ Hɛrmɛs nə pa' yʉ nə lə bɑ gɔm nwə. 13Ŋkhamsi dyə Zʉs lə́ ghə pu lɑ mpɔp mhuŋ pu a co' fo nə sɔ' mshwə tisuŋ. Pu a pɔmnəŋ pɑ ŋkwishwə nə nuŋpwɔ'. 14Mghɛ nthəm, Barnabas pu Polo lə nə yu' mɔ mcuŋ ŋkhitə dzə nə pù, ntham jʉ̌m pɔmnəŋ shwé gɑ:

15Mso mso! Po gə kɑ pa' a? Ba wɔk yɔk, pyə̌ bɑ pɑ̀ pɔmnəŋ pa' wɔ a! Cúŋ pɑpuŋ yə pyə siŋ wɔ a, bɑ gɑ po tak tsə mzhʉm ba nəŋ, ŋkwyəpnyə, fɛ de m nə Cyəpɔ Si nthʉɔtʉɔ yə e lə nyaptə kɛ̀bəŋ, ba sicǎ', ba shyə́ lɑpʉə pu a guŋ tsə tsyə a bɑ nthʉm o a. 16E le nthak guŋ mguŋ awɛ nə mwɔdzʉ myə a lě shyə a, bǎ ya lə ghiŋ nə yə məjyə̀ nə piŋ. 17Da' gɑ nə ghə po'o bɑ da'tə nwə pɑpuŋ e bi pu, nə pa' e gə bə̀ŋ fɑ kɛbəŋ, gə tsə puŋ, e hɑ bi pó, mtʉm mɔ́ pɑ ŋwɛnyə.

18Mghɔm mɔ gɑ lə ghə pɔmnəŋ lɛtə cwəlɔ, nthak pwɔ' tsyə wap kɑ́ bɑ̀ gɔ nuŋ bi pu a nəŋ.

19Shɑ pɑ Yudea lə fɑ Antiokia ba m Ikonya sɔ' ŋkho cəcɑ̌ pɔmnəŋ, gə wap piŋ mkwɛnyə map. Pu lə lɑ̌ mwɔ' nthamtə Polo, fəŋ e nə nthəm tisuŋ ma' e pa' pfə mo a. 20Da' gɑ mghɛ zhi'nwə lə sɔ' shu'tə bəŋ e, e lusi cwəlɔ, biŋ ŋkho tisuŋ. Dzʉ lɔ, pu Barnabas lɑ m Dɛrbe.

Nə piŋjʉm Antiokia

21Wap lə kǒ wə siŋ Cuŋ pɑpuŋ. Gə mghɛ zhi'nwə jɔmyɔ̌m, wap lu, biŋ shyə m Listra, Ikonya, ba m Antiokia. 22Wap lə ko wə bɑ kwyətə́ piŋnthʉm mghɛ zhi'nwə, bɑ shwi'tə gɑ wap kaktʉɔ nthʉm piŋnthʉm bɑ gɔm gɑ: Pɑ gɔ cyə m nə mghəghʉɔ jɔmyɔ̌m tə ko nə̀ Nəfo Si.

23Wap lə ko bǎ nə ya cu'tə pɑ piŋ a, shwɔ' mghətso bi pù, shwə tə tsʉywə nə shwyɛ'nyə Si, tə nthak wap nə bǔ cyəpɔ yə wap lə piŋ e a.

24Wap lə cyə Pisidia, gɔ Pamfilia 25siŋ Ghɔm bi pɑ Pɛrge, dzəŋ m Atalea 26ŋwak wə ŋkho kənu' gwyə nə gɔ m Antiokia tsʉ' yə wap lə lu nə tə pu cyə m nə gho' Si hɑ fa' tsyə wap lə lu m nə fa' a bi pu a. 27Wap lə ŋwak wə cwəlɔ, shu'tə pɑ piŋ siŋ wap ywə yə Si lə ghə shyə m nə pu a, pa' e lə ghyɛ' jyədyə̌ piŋnthʉm bi pɑ tə pɑ pɑ Yudea a. 28Wap pu a mghɛ zhi'nwə lə na' shwə.

Currently Selected:

MFA' MGHƐ NTHƏM 14: NTGomala

Highlight

Copy