MFA' MGHƐ NTHƏM 12

Nə nə zhwə Yakop ba nə ghə́m Pɛtrɔ

1A lə pɑ nə wɔ̌dzʉ bɔ, fo Herode to' nə lɑ shɑ pɔ pyə wap lə bɑ nthʉm cu'tə pɔ Kristo a jɔgo'. 2E lə ghə̌ pu wà Yakop fɑ Yohane. 3E lə nə yɔ gɑ ǎ puŋ pɑ Yudea, gə pu kwi' gəm Pɛtrɔ, a lə bɑ nə tyɛ' msɛ́ tə kwɔ'msɛ̌. 4E lə ghə tə pu kyəp e cwəlɔ, e nyəŋ e dyəcɛ̌, jap gɑ msəŋwi mkam pfʉə pɔ pfʉə pɔ pfʉ̀ə pɑ dé e. E lə bɑwə shəŋ gɑ Paska cyə tə e putə e bi pɔmnəŋ. 5Cwə yə Pɛtrɔ lə bɑ dyəcɛ̌ a, mcwyɛ'nyə Si tə pwa nthʉm mcu'tə pɔ Kristo pɑ ŋkwɔ' gùŋ mcwə awɛ bəŋ Si nə tso tsyə.

6Herode lə pɑ gɔ ghə pu fyɛ' e. A pɑ mtsʉ', Pɛtrɔ pɑ dyəcɛ̌, tuŋ msəŋwi pɑpʉ̌ə bɑ e nuŋ bɑwə di, bɑ pu lɑ mgwɑ mtʉ̌ɔ məbʉə shəŋ e, shɑ msəŋwi pɑ jyədyə̌ bɑwə byap. 7Da' gɑ aŋgəle Cyəpɔ lə wuŋ ŋwak, ŋkha' lo dyə̌. Aŋgəle pu'tə bhə be Pɛtrɔ nə jam e, gɔm bi e gɑ: Lusi m gʉ̌'. Mgwɑ mtʉɔ lə kyɛ́' nə bu myə́. 8Aŋgəle piŋ gɔm bi e gɑ: Zhwé tap o, biŋ ŋkwɑ ŋkhə̀ mthap mǔ e ghə po'o, e piŋ ŋkwi' gɑ ŋkwa dzə o yə jʉm dzʉ̌ jap jʉ̌m m̀. 9Pɛtrɔ yap jʉ̀m e nthəm. E la tə bɑwə jyə nyənyɔ gɑ aŋgəle nə lə́ bɑwə bvɔk e pɑ, é bɑwə ŋkwɛ gɑ e jɔ pɑ nə yɔ m nthʉ̌m zhwenyə. 10Wap lə twɔk dəŋdzə nthap pyap, ba bátə nthap pyap yɑpʉə. Ŋwak nə jyədyə̌ mtʉ̌ɔ yə a de m tisuŋ a, a hé pɑ dǒ e dzə̌ pú; wap lə ko dzʉ cwəlɔ, gɔ tə ŋkhəm nə dhə təŋjyə gwyə, aŋgəle wuŋ fiŋ Pɛtrɔ gɔ tsyə. 11E zhyə nɑ e, gɔm gɑ: cwəlɔ gɑ wə ju' kwa' nyənyɔ gɑ Cyəpɔ təm aŋgəle e, e sɔ' bvɔk a nə bǔ Herode pu a nə ywə yə pɑ Yudea kɑ bɑwə byap a. 12E lə́ lə̌ŋtə jyə cwəlɔ, ŋkhəm wə Maria ma Yohane yə pu ŋkhe e gɑ Markusi a. Pɔ tə jɔm lə bɑ wə bɑwə shwyɛ'nyə Si. 13E lə ko'tə vi' pù', mu' mú go, gɛfa', tso tsyə pɑ Rode sɔ' de. 14E lə tǐŋ gi Pɛtrɔ, ŋwɛnyə, ŋthak nə he pù' nəŋ ŋkhʉdʉ́ bɑnyə gɔm gɑ Pɛtrɔ shwə pú'. 15Pu ghɔm bi e gɑ o wə bʉə, da' gɑ e lə nə fʉ' m jʉ̀m. Wap ghɔm gɑ a aŋgəle e. 16Pɛtrɔ lə bɑ pɑ shwə pu' bo ŋkho'tə, wap cwɔ' cwəlɔ, jɔ a pɑ yʉ́. Nwə cyə wáp. 17Pɛtrɔ ma'tə pǔ gɑ wap lɛtə. Siŋ wap pa' Cyəpɔ bvɔk e á, nə mìŋ gɔm gɑ:

Po ghɔ siŋ Yakop ba mfɑ̌mfɑ́. Biŋ ntham məjyə cwəlɔ gɔ m nə mu' tsʉ'.

18Dzʉ lə lɔ̌, va' ko cəcɑ̌ msəŋwi nə ywə yə Pɛtrɔ zhi ya a. 19Herode ghə gɑ pu cəŋ e, da' gɑ mo lə yɔ e. E ghə pu cəŋtə fyɛ' pɑ pyap cɛ́, e piŋ gɔm gɑ pu lə wap gɔ jwətə wap. Pɛtrɔ lə pǐŋ fɑ Yudea cwəlɔ dzəŋ gɔ Kaesarea na' shwə wə́.

Vʉ́ Herode

20Shɛ́ lə bɑ cəcɑ̌ Herode pu a pɑ Tiro ba pɑ Sidon. Wap lə cɔ̌m bɑ ŋkwishwə gɔ dzə e, Wap lə cyə̌ m nə yə nə ghiŋkǎm Blasto gɛfa' nthʉm twɔ'dyə̌ fò yə e lə bɑ nə yap jʉm a, gɔm gɑ pu a pu nyaptə pɑ tə nə gə shɛ. Nə pa' ywətsʉ lə fɑ m guŋ fò Herode tə sɔ' gǔŋ pu. 21A lə kǔ' tyɛ' mka'nyə, fo Herode kwadzə fo nə e, shwə dzə, sa' la'. 22Cwə yə pɔmnəŋ lə pɑ̌ bu' bu gɑ a gi Si, a tə gi monəŋ pɑ̀! 23Aŋgəle Cyəpɔ wuŋ dzɔp Herode nə pa' e ka hɑ ghu'tə bi Si a, mcwəcwə tsʉnyə e, e pfʉ.

24Da' gɑ ghɔm Si pɑ ŋkwyə, bɑ sé. 25Sɔ' m nə Barnabas pu Saulo, wap fɑ Yerusalɛm gɔ nə lɑ fa' tsap gɔ dzə̀; wap lə nə pɑnyə dɑ Yohane yə pu lə ŋkhe e gɑ Markusi a.

Currently Selected:

MFA' MGHƐ NTHƏM 12: NTGomala

Highlight

Copy