MATA 14

1A ɔ̧tɔ ge waar gbɔɔl bɔ Hirudus a Galile yɔ lag hi book Yeesu nuŋgɔ lɛl sɛwi, 2raa walɛsɛrɛ ɔ̧ɔ̧ wɔ

a Yohana Bɛtmɛm Hotingoya bɔ ga! Rɛml a wɔrkɛ tees du! Hinɔ gii tɛŋk wɛrɛ hi midig lab a gi naan du.

3Yɔ anbɔ, Hirudus da raa nɛ dood hi wa̧a̧ Yohana hi wɔge hi yaage a luknɔ du a yɛ̧ɛ̧tɔ Filib nistɔ Hiruduya dɔŋgɔ, 4anyɔ da Yohana raa Hirudus

a rı̄ı̄ an mɔ loo yɛ̧ɛ̧ mɔ nisɔ an nis mɔ gɛ.

5Yɔ Hirudus ha̧a̧g nɛ an gi gbɔm Yohana be, yɔ mɛɛ a dood hi gig seek an Bɛtya̧a̧kɛŋkya yɔ hoobha̧a̧gha̧ naan yaak gi muulɛ. 6Yɔ Hirudus naab wɛlɔ yɔ hi mɔɔg gedu tuurɔ, nis bɔ Hiruduya waasiŋ zaa nabhin a dood rɔ̀bɛ wɔ hi lɔlgbar sɛw. Yɔ Hirudus gbɛn anbɔ kpoosɔ gi harige, 7raa hi hindɛŋgliki

a be gaag hinyɔ gɔ gi warib sɛw.

8An hinyɔ nɔɔtɔ sɔmbinge wawa bɔ rek warige

a gaabe Yohana zulɔ bɔ gii a hɛb du.

9Yɔ waar bɔ lag anbɔ kpoosɔ ɗɔɔbɔ; hɔnɛ a hinyɔ dɛŋgl geha sɛwi, hi a dood rɔ̀bɛ wɔ hi dɔŋgo, raa dood an hi gaage. 10Yaa doo za rek dɛ̧ɛ̧z Yohana zulɔ bɔ a luknɔ du, 11hi kamz hɛb du hi zaa hi gaa wawa bɔ kam a nɔɔtɔ ge. 12Yɔ Yohana walɛsɛrɛ ɔ̧ɔ̧ wɔ hi lag anbɔ hi zaa hi loo Yohana wɔrkɔ bɔ hi rek hi i̧i̧ gɔ. Hi rek hi raas Yeesu dɔglɔ be.

13Yɔ Yeesu kɛm dɔgl bɔrɔ ɗun hɔdi rek a mɛmbalya̧, da kar lɛmb du rek lɛlza dɔɔmi gi gbunu. Hɔnɛyɔ dood saal wɔ hi kɛm anbɔ hi tuuz a waal gbɔlɛ wɔ hi du hi ren dɔɔ hi daa gbɔnɔ a mɛmbalya̧ hi fɔ Yeesu. 14Yɔ sil a lɛmb du gi gbɛn saal kitɛ wɔrɔ, mɛɛsihi ya̧a̧rɛ za̧a̧s gumtilya̧ wɔ hi kamsig nɛ be. 15Yɔ ɔ̧t legɔ, walɛsɛrɛ wɔ hi zaa Yeesu ge hi raage

a nɛ lɛl gi bulik be, wɛɛ lɛlyɔ di hɛtdɔŋ be, yaam dood saal wɛrɛ hi rek a raat dɛɛt wɔ du an hi zebz leesɛ.

16Yeesu raahi

a taa an hi rekɔ; nɛɛ hi zul nɛ gaanɛhi leesɛ.

17Wɔrɔ hi wɛɛ hi googe

a gɛ wi gin kok kiml nɔɔn dihɛ hi dut eerɛ.

18Yeesu wɛɛ raahi

a kamsinbe kok bɔ hi dut bɔ hɛdi.

19Wɛɛ raa dood saal wɔ hi ɗɔɔt a hɛtyɛ̧s ha. Wɛɛ loo kok kiml nɔɔn wɔ hi dut eerɛ wɔ pɛɛ lɔl wɛɛha baan Bɛto. Ɓɛɛl kok kiml wɔ gaa walɛsɛrɛ ɔ̧ɔ̧ wɔ hi gɛ̧ɛ̧s dood saal wɔ. 20Dood wɔ sɛw hi le kok wɔ hi hi̧i̧. Walɛsɛrɛ wɔ hi mɔks kok ɓɛɛkil wɔ hi zɛ̧ɛ̧r dɛl koobl daa eerɛ. 21Walɛ wɔ hi le kok wɔ sɛw kitigya̧ gi an duk nɔɔnɛ. Nɛɛd wɔ hi waat wɔ hi ɓɛrihi gɛ.

22Kuudu Yeesu wɛɛ fɛ̧ɛ̧ walɛsɛrɛ ɔ̧ɔ̧ wɔ hi kar lɛmb du hi dor a mɛmbal kasiŋ zaa bɔ ge an gii gi yaak saal wɔ kuudu be. 23Yɔ yaa saal wɔ gi da̧a̧, gii wɛɛ da dɔɔ a ga̧a̧t ha gi gbunu an gi zɔ̧ Bɛto. Yɔ yɛ̧ms bulɔ gi a ga̧a̧t bɔ hage gi gbunu. 24Lɛmb bɔ hɛmlɔ gi a mɛmbal teesdu, yɔ zɛk gi fɛko, gi a̧a̧nik lɛmb rekɔ doosɛ, mɛmɗukil wɔ hi gig zɛksig be.

25A bi̧i̧l ɗɔbt du Yeesu ɛmz a mɛm bɔ hage zaa a walɛsɛrɛ ɔ̧ɔ̧ wɔ hi a lɛmb du. 26Yɔ walɛsɛrɛ ɔ̧ɔ̧ wɔ hi gbɛnig gi zaak a mɛm bɔ hage kol tuuhitu, hi raa a ɗoodyɔ. Yɔ hoobha̧a̧hi ha̧a̧ltɔnɔ, hi ɓoo kaalɛ. 27Hɔnɛ ɓɔrbɔ Yeesu raahi

a beya, ɓaasin kpoos nɛ, bɔ hoob gi ha̧a̧nɛ!

28Piyɛr wɛɛ raage

a Waar i, gid mɔya, raabe be re be dagumɔ a mɛm bɔ hage.

29Yeesu ta̧a̧

a nɛ zaamɔ.

Piyɛr sil a lɛmb bɔ gedu ɛmb rek a Yeesu ge a mɛm bɔ hage. 30Hɔnɛyɔ gbɛn zɛk gi fɛk ha̧a̧ltɔnɔ hoobha̧a̧gha̧, wɛɛ baar iŋk a mɛm du, ɓoo kaalɛ

a Waar i, za̧a̧sibe!

31Ɓɔrbɔ Yeesu yɔd naanɔ wa̧a̧ge raage

a hey! mɔɔ doo ɗɔbsigkaasiya, nɔ mɔ faa nɔ?

32Hi wɛɛ hi kar a lɛmb du hi eer sɛw zɛk bɔ wɛɛ erɔ. 33Yɔ anbɔ walɛsɛrɛ zaadɛ wɔ hi gi a lɛmb bɔ gedu hi wɛɛ hi zagl a Yeesu muutdu hi ɗɔbsige hi raage

a hi rɔbo mɔ gi Bɛt Waayɔ!

34Yɔ Yeesu hi walɛsɛrɛ ɔ̧ɔ̧ wɔ hi kar mɛmbal bɔ gi da̧a̧ hi tuur a Gerezanɛ hɛbt du, hi silɔ. 35Dood wɔ hi gi a lɛl bɔ ge hi bɛɛ Yeesu gbɛnik hi mɛɛge, hi rek hi raam ramsɔ a lɛl sɛw. Yɔ dood wɔ hi lag anbɔ hi kamsig gumtil kit wɔ, 36hi zɔ̧ge an gi ɔɔhi hi ki̧i̧ gbandilɔ tɔlya̧ bɔ mɔɔti an hi za̧a̧. Dood wɔ hi gig ki̧i̧k sɛw hi za̧a̧za̧.

Currently Selected:

MATA 14: NTD

Highlight

Copy