MATTHIEU 1

Tugun pɛ́r-nàm ko Jesu

(Zɔk Lk 3.23-38)

1Tugun pɛ́r-nàm ko Jesu Krist, bem ko David, bem ko Abraham nɛ́ mɔ'ɔ: 2Abraham koo Izak, Izak koo Jakob, ɓɛɛ Jakob ko Juda in o nya-a̧. 3Juda koo Farɛs in Zara, nàà kɔ-wa nɛ́ Tamar. Farɛs koo Ɛsrɔm, ɓɛɛ Ɛsrɔm ko Aram. 4Aram koo Aminadab, Aminadab koo Nasɔŋ, ɓɛɛ Nasɔŋ ko Salmɔŋ. 5Salmɔŋ koo Boaz, nàà kɔ̧-a̧ nɛ́ Rahab, ɓɛɛ Boaz ko Obɛd, nàà kɔ̧-a̧ nɛ́ Ruth, ɓɛɛ Obɛd ko Jɛse. 6Nɛ́ mɔ'ɔ nɛ̀ Jɛse koo wannu David.

David baa kóò ko Urii ko nɛ̀ Salomɔŋ. 7Salomɔŋ koo Roboam, Roboam koo Abia, ɓɛɛ Abia ko Asa. 8Asa koo Jozafat, Jozafat koo Yoram, ɓɛɛ Yoram ko Ozias. 9Ozias koo Joatam, Joatam koo Ahaz, ɓɛɛ Ahaz ko Ezɛkias. 10Ezɛkias koo Manase, Manase koo Amɔŋ, ɓɛɛ Amɔŋ ko Jozias. 11Jozias koo Jekonias in o nya-a̧, ŋgimbi nɛ wa kaia nɛ̀ wa nɛ̀ bara si Babilɔŋ mɛ.#2 Wan 24.14-15; 2 Kal Ny 36.10; Jer 27.20

12Ŋgimbi nɛ wa kaia wa si Babilɔŋ kaɗi, Jekonias koo Salatiɛl, ɓɛɛ Salatiɛl ko Zorobabɛl. 13Zorobabɛl koo Abiud, Abiud koo Eliakim, ɓɛɛ Eliakim ko Azɔr. 14Azɔr koo Sadɔk, Sadɔk koo Akim, ɓɛɛ Akim ko Eliud. 15Eliud koo Eleazar, Eleazar koo Matan, ɓɛɛ Matan ko Jakob. 16Nɛ́ mɔ'ɔ nɛ̀ Jakob koo Jozɛf, wíì ko Marii, ɓɛɛ Marii ko Jesu nɛ̀‘i sa'e Mɛsii.

17Tɛ́ Abraham hɔ nɛnɛ tɛ David, o bezaŋ nɛ̀ gboo ɗoŋ ŋmaa dee nɛ́ ɓu-zua-naar; tɛ́ David hɔ nɛnɛ ŋgimbi nɛ wa kaia nɛ̀ wa nɛ̀ bara-biro si Babilɔŋ, o bezaŋ dee nɛ́ ɓu-zua-naar; ɓɛɛ tɛ̀ kaia wa si Babilɔŋ hɔ nɛnɛ tɛ Mɛsii, o bezaŋ dee nɛ́ ɓu-zua-naar mbɛt.

Marii baa zaŋ Jesu

(Zɔk Lk 2.1-7)

18Wen koa Jesu Krist nɛ́ mɔ'ɔ. Marii nàà kɔ̧-a̧ duka so nɛ́ kóò nɛ̀ Jozɛf hara, ɓɛɛ nɛti ha̧ wa mɛ ba ŋmaa, Marii baa zaŋ nɛ̀ ŋgai ko Sa̧a̧ Ɔmi.#Lk 1.27 19Wíì kɔ̧-a̧ Jozɛf duka so nɛ́ ŋma wi-de-mɔ nɛ̀ yuwar-a nɛ̀ kɔ̧ mɛ gbar a̧ ha̧ bíí mɛ iŋ na, ɓɛɛ a̧ ta mɔ mɛ bɛ̧ a̧ nɛ̀ hu̧sa̧-a̧. 20Ŋgimbi n'aa a̧a̧ tɛ taa mɔ hegɔ, ŋma betom ko Gasa Wan hɔɔ zu ha̧ a̧, ɓɛɛ tɔ̧ ha̧ a̧: «Jozɛf, bem ko David, ká mɛ́ dé kíì baa Marii nɛ̀ kóò na, wen zaŋ nɛ̀ duk tɛ-a'i, a̧ baa nɛ̀ ŋgai ko Sa̧a̧ Ɔmi. 21A̧ tɛ́ ko nɛ̀ be-wiwii, ɓɛɛ mɛ tɛ a nin-a'e Jesu; wen mɛ̀ nɛ́ a̧ a̧ tɛ kpasi dukbíí kɔ̧-a̧ tɛ ɗaŋmɔ kɔ-wa.»#Lk 1.31

22Ɓɛɛ mɔ‘i lɛŋ hɔa ha̧ wen nɛ̀ Gasa Wan tɔ̧ɔ̧ so nɛ̀ nú wi-tɔ̧-wen oi nú Sɔ̧ mɛ hɔ gba̧a̧:

23«Ŋma be-zɔŋa tɛ́ ba zaŋ,

a̧ tɛ ko nɛ̀ be-wiwii,

ɓɛɛ wa tɛ a nin bem’ɛi nɛ́ Emanuɛl.»

(Nɛ́ wen nɛ̀ tɔ̧, «Sɔ̧ a̧a̧ in yɛɛ».)#Es 7.14

24Ɗoŋ nɛ Jozɛf tuna, a̧ dee hee mɔ'ɔ nɛ̀ betom ko Gasa Wan tɔ̧ɔ̧ ha̧ a̧ ga. A̧ mgbɔɔ Marii si tɛ kɔ̧-a̧, 25ɓɛɛ a̧ iŋ a̧ na hegɔɔ hɔ wese nɛ̀ Marii koo nɛ̀ be-wiwii, ɓɛɛ Jozɛf a nin bem’ɛi'e Jesu.#Lk 2.21

Currently Selected:

MATTHIEU 1: GB11

Highlight

Copy