Saumu 38
38
Etuarimaryhtao otururu Ritonõpo a
Sero saumu tymerose Tawi a.
1Ritonõpo Jesemy, juãnohpyra exiko tohne awahtao!
Jupokara exiko yzehno awahtao!
2Tapurose ywy opyre a, jetuhxo ase;
oemary omoxĩ sã ya juãnopyryhtao oya.
3Yzehno oexiryke takuruhtase ywy yronymyryme.
Joko porehme kure pyra mana popyra jehtopõpyryke.
4Nerỹko ase zue aka samo, yyrypyry tõ zue aka;
omoxĩ sã toehse mã kehko, anarosaromepyra ase.
5Tuaro pyra exiketyme toehse jexiryke,
japurotopõpyry sũ ãko mana, motãko.
6Tapotũkehse ywy, tupuehme ase,
yxitary poko kohmãnõko ase.
7Takuruhtase ywy itamurume,
oxirohnõko ase yronymyryme.
8Jamihme pyra ase ipunaka,
taomipohtomase ywy;
torẽtyke ase ukurohtao, pusuh ãko ase sam karyke ya.
9Ritonõpo, ise jehtoh waro mase,
pusuhkatoh ya etaryke oya emero.
10Tuhtuhãko jeano axihxo, jamihme pyra ase,
jenuru zemime pyra toehse mana.
11Muretano hpe jexiryke jepe tõ oehpyra mã toto
upũtokoxi;
wekyry tõ roropa ameke rokẽ exĩko mã toto ywinoino.
12Apoitoh rĩko jetapary se exiketõ mana japoitohme;
japurory se exiketõ jenaroximãko mã toto,
yyryhmary poko osenetupuhkehpyra mã toto.
13Yrome otato pyra exikety poenohnõko ase
onetara sã jehtohme; tõtururu waro pyra exikety
poenohnõko ase oturupyra jehtohme.
14Onezuhpyra exikety sã ase otato pyra exikety samo.
15Yrome oenetupuhnõko ase, Ritonõpo;
omoro, Ritonõpo Jesemy, jezuhnõko mase.
16Jepetõkara anãkyemapopyra exiko
torẽse jehtopõpyryke;
tãkye toto onyripopyra exiko yporemãkatopõpyry poko.
17Epukasasaka ywy, jetuarimatoh enahpỹme samo.
18Popyra jehtoh ekarõko ase, yyrypyhpyry
roropa, morohne torẽtyke jyrĩko mã rahkene.
19Jepetõkara jamihme mã toto akuruhtara mã toto,
tuhke ahno yzehno mã toto katoh ke pyra.
20Mokaro imehnõ epehmãko mã toto popyra
ehtoh ke; yse pyra mã toto kure ehtoh riryke ya.
21Ritonõpo Jesemy, jurumekara exiko!
Ameke pyra exiko ywinoino, Jesemy!
22Kuakorehmako seromaroro, Jesemy,
Ypynanohneme oexiryke!
Currently Selected:
Saumu 38: apy
Highlight
Share
Copy
Want to have your highlights saved across all your devices? Sign up or sign in
©2017, Wycliffe Bible Translators, Inc.
