Saumu 35
35
Kuakorehmako Ritonõpo, katopõpyry Tawi a
Tawi nymerohpyry.
1Ritonõpo Jesemy, atatapoiko yyryhmary se
exiketõ maro, yporemãkary se exiketõ iporemãkapoko!
2Okyryry osewomatoh apoiko, oupõ kurimene
risẽ maro, mame osehko jakorehmase.
3Awaratã apoiko, kaparu roropa yyryhmananõ
poremãkatohme.
Õmiry etapoko ya ypynanopyry poko oya rahkene.
4Ah mokaro jetapary se exiketõ typoremãkase
nexĩ toto! Ah toehxirose nexĩ toto!
Ah nepã toto otupĩko rokẽ rahkene,
yyryhmary se aexityamo!
5Ah tiriiku pihpyry sã nexĩ toto
tarose tyryrykane a, tokahmase toto ahtao
Ritonõpo nenyokyhpyry a!
6Ah toto esemary xinukutumehme sã nexino,
tykohmãse samo, piserehkatoh sã roropa toto
ekahmaryhtao Ritonõpo nenyokyhpyry a!
7Ahno apoitoh tyrise exiryke eya xine japoitohme
zae rokẽ jahtao eya xine;
eutary tahkase eya xine japoitohme.
8Yrome, zuaro pyra toto ahtao,
tonahkasẽme exĩko mã toto.
Tynyrihpyrykõ ao tapoisẽme exĩko mã toto;
epukãko mã toto zaka, osenahkãko mã toto.
9Mame atãkyemãko ase Ritonõpo
Jesẽ nyrihpyry poko; tãkye exĩko ase
typynanohse jexiryke eya, joorihtoh winoino.
10Yronymyryme ynara ãko ase: “Omoro rokẽ mase,
Ritonõpo, imepỹ pyra mana asã exikety!
Jamihme pyra exiketõ ewomãko mase,
toto poko pyra jamihmãkõ ehtohme,
tymõkomokãkara ewomãko mase
omise exiketõ roropa iiryhmananõ winoino.”
11Popyra exiketõ ykerekeremãko mã toto;
jyhxirõko mã toto popyra ehtoh poko
ipoko pyra jahtao.
12Kurãkõ riryhtao ya jepehmãko mã toto
popyra ehtoh ke, morara exiryke ihtomãko ase.
13Yrome kure pyra toehse mokaro ahtao
upo tamuruse ya jemynyhmatoh ke,
otuhpyra roropa exiase. Tupue jupuhpyry yriase,
oturuase Ritonõpo a toto poko.
14Oturuase Ritonõpo a jepe poko jotururu samo,
jakorõ poko sã roropa.
Toytoytose ywy tupuehme samo, jemynyhmaryke,
xitakety sã tyse poko.
15Yrome tyhtomase jahtao,
mokaro tãkye toehse mã toto,
oximõme tooehse toh nexiase jomye, jeunohtohme.
Typipohse exiase imehnomo a, zuaro pyra exiketomo a,
tapurose ywy eya xine toiro rokẽ pyra.
16Pakaihkapỹ poihtory ahno a, moro sã jeunohnõko
mokaro nexiase. Xihpyryme jenẽko toh nexiase,
yse pyra sã ipunaka.
17Otãto ise ro hma, Ritonõpo, enẽko rokẽ mahno?
Kuewomako mokaro winoino
atatapoiryhtao yporemãkatohme.
Kypynanohko mokaro reão tomo a jesekaryino.
18Mame “Kure mase,” ãko ase jarao, ahno netaryme;
oeahmãko ase imoihmãkõ rãnao.
19Tãkye jepetõkara onyripopyra exiko
yporemãkary poko; ajohpãkõ mokaro.
Yzehno mã toto, popyra toto onyripyra jahtao.
Tãkye mokaro onyripopyra exiko,
aexianarykõino typoremãkapose jahtao oya.
20Aotururuhtao osepemãkõ sã pyra mã toto;
yrome ajohpe rokẽ mã toto, imehnõ zae ehtoh
se exiketõ kerekeremãko mã toto.
21Jyhxirõko mã toto, kohtãko mã toto:
“Onyrihpyry ynanenease!”
22Yrome, Ritonõpo Jesemy, emero tonese oya.
Naeroro mynyhme pyra exiko, Ritonõpo,
ameke pyra exiko ywino!
23Apakako, Ritonõpo, jewomatohme!
Owõko, Jesemy, zuruko toto zae ynyriry poko!
24Ritonõpo Jesemy, zae rokẽ mase.
Naeroro mokaro zuruko zae jehtoh poko.
Tãkye jepetõkara onyripopyra exiko
yporemãkapory poko!
25Ynara kamexipopyra exiko oseya xine:
“Mokyro tonahkase kyya xine. Moro se rokẽ sexiatose.”
26Mokaro, atãkyemaketõ jetuarimary poko,
iporemãkapory se ase oya, toto ehxirotohme ipunaka!
Mokaro ehxirory se ase,
ymotye kure tõsekarose ynaroro exiryke.
27Yrome atãkyemãko kohtãko roropa mokaro
mana zae jehtoh ekary etary se exiketomo!
Ynara kakehpyra ase eya xine:
“Imehxo kuhse Ritonõpo mana!
Jamaro mana kure rokẽ emero toehse ahtao
ipoetory maro.”
28Mame anamonohpyra oehtoh poko
imehnõ zurũko ase, oeahmãko ase,
kure rokẽ oriry poko kohmãnõko ase.
Currently Selected:
Saumu 35: apy
Highlight
Share
Copy
Want to have your highlights saved across all your devices? Sign up or sign in
©2017, Wycliffe Bible Translators, Inc.
