Maku 5

Jorokohpã kurãkatopõpyry poko Jezu a

(Mateu 8.28-34; Ruka 8.26-39)

1Morarame toeporehkase toto Keraza pona, ikuhpo mõpozakoxi. 2Morarame kanawae Jezu towõse. Mame mokyro jorokohpã tooehse okepỹpo tõ poe. 3Moroto okepỹpo tõ po esary kynexine. Pake mokyro jorokohpã emyhpopyra ehse. 4Osemazuhme tymytymyhse repe keti ke. Yrome tymyhtoh kurimene risẽ tamohmohse eya.

— Sukurematatose, tykase imehnõ repe. Yrome onukuremasaromepyra toh kynexine. 5Nyhpyra ehse ynororo. Okepỹpo tõ zonẽtopõpyry rãnaka ytoytose ynororo somohmã poro. Kui kakehpyra ehse, topu ke tõtokotokose roropa ynororo. 6Morarame Jezu eneryke tyya, moe ahtao ro tururume toytose ynororo eya. Tosekumuru po typorohse ynororo Jezu ẽpataka. 7Opore ynara tykase:

— Oty se hma, Jezu, ya? Ritonõpo Kapuaõ mũkuru mase, Imehxo Exikety mũkuru. Ajohpãme sã josanumara ke exiko, tykase ynororo opore.

8Osemazuhme Jezu ynara tykase exiryke:

— Mose ae otũtako ropa joroko kahpyry, tykase Jezu exiryke.

9Mame:

— Onoky oesety? tykase ropa Jezu eya.

— Ekuhpỹme yna esety nase, tuhke yna exiryke, tykase ynororo Jezu a.

10— Yna onenyohpyra exiko mya, tykase jorokohpã Jezu a.

11Mame moroto tuhke poinokoimo kynexine otyro ẽtuhkãko ypy emory po.

12— Yna enyohko yna omõtohme poinokoimo aka. Ah ynanomõxi, tykase toto otuhparo Jezu a.

13Morarame torekohmaryke tonyohse toto Jezu a. Orutua ae tutũtase ropa toto. Poinokoimo aka tomõse toto, joroko tomo. Morarame tururume toytose toto poinokoimo emero porehme. Tyhtose toto ypy emory poe nakuaka. Tyneryse toto emero. Asakoro miume tyneryse poinokoimo.

14Mame inahpahpõkõ toepase pata põkõ zuruse, pata moinõkõ zuruse roropa. Morarame tuhke panatase tooehse toto Jezu a osenuhmase. 15Jorokohpanõpo tonese toto a typorohse. Upo tamuruse eya. Zae oturũko kynexine Jezu maro. Mame tõserehse toto. 16Morarame morotõkõ ynara tykase toto mokyro enese aehtyamo a:

— Mose jorokohpanõpo. Joroko tõ tũtanohpo ropa Jezu, tuhke zae. Mame tyneryse poinokoimo tõ emero, tykase toto mokaro a oehsenãkomo a. 17Morarame Jezu a ynara tykase poinokoimo esamõpyamo:

— Ytoko ropa oesaka, tykase toto. Otuhparo tonyohse ropa Jezu eya xine tosae xine.

18Morarame kanawa aka Jezu aotyriryhtao, mokyro jorokohpanõpo tõturuse imaro:

— Tuisa, amaro ytoxi ajohpãme samo, tykase ynororo eya repe.

19— Arypyra. Atapyĩ taka rokẽ ytoko ropa. Oepe tõ maro oturuta. Kure ke oturuko okurãkatopõpyry ropa poko, opyno jexiry poko roropa, ypoetoryme oexiry poko, enara, tykase Jezu eya.

20Morarame toytose ropa jorokohpanõpo osekarose Omame Osetoro pata tõ nonory poro. Moroto tõturuse ynororo, tukurãkatopõpyry ropa poko. Mame emero tãtãkyemase toto: “Emese kure Jezu mana,” tykase toto.

Jairu ytotopõpyry Jezu a

(Mateu 9.18-19; Ruka 8.40-42)

21Morarame tãtakuohse ropa Jezu kanawae mõpozakoxi. Ahno imoihmãkõ tooehse ropa eya morotona, ikuhpo ehpikoxi. 22Morarame juteu tõ atamorepatoh esẽ tooehse, esety Jairu. Jezu pupuru myhtokoxi typorohse ynororo.

23— Tuisa, kuakorehmako ajohpãme samo. Jẽxiry orihnõko mana. Ymaro eropa ajohpãme samo. Oemary tyrikose epona aekurãkatohme ropa, orihpyra aehtohme, tykase ynororo eya.

24Mame imaro toytose Jezu. Yrome ahno imoihmãkõ Jezu maro toytose. Ytopyra sã kynexine tuhke ahno exiryke.

Jezu zupõ apotopõpyry nohpo a

(Mateu 9.20-22; Ruka 8.43-48)

25Morarame nohpo moroto kynexine munuimohpano. Pake ro kure pyra toehse ynororo. 12me jeimamyry taropose kure pyra toexiry poko rokene. 26Toanahtose eya itamurume. Tuhke opi warõkomo a tukuhse roropa repe, yrome epona pyra, kure pyra itamurume exiryke. Tytinerukehse roropa ynororo. 27Jezu ekary totase tyya exiryke, ĩkapo toytose ynororo tuhkãkõ rãtakuroko.

28— Jezu zupõ temuhmaryhtao rokẽ ya ekurãkãko ropa ase, tykase ynororo tukurohtao. 29Morarame zupõ tytemuhmase eya. Axĩ imunuru tymynyhpãse, kure toehse ropa ynororo. Mame toekurãkary ropa waro toehse ynororo. 30Jezu roropa tunukurãkahpyry waro kynexine. Tõsenuhmase ynororo tỹkakoxi.

— Onoky jupõ temuhmano? tykase ynororo.

31Morarame ipoetory tomo a tozuhse. Ynara tykase toto:

— Imoihmãkõ enẽko mase. Epuepurohmãko rokẽ toh mana. Oty katoh: “Onoky ytemuhmano?” ãko mahno? tykase toh Jezu a repe.

32Yrome Jezu tõsenuhmase ropa tỹkakoxi tytemuhmahpõ enetohme. 33Mame mokyro tõserehse. Tykytyky tykase ynororo tukurãkase ropa toexiryke. Jezu ẽpataka tooehse. Tosekumuru po typorohse. Emero kure turuse tunukurãkahpyry a. 34Morarame ynara tykase Jezu:

— Kuku, jupõ mytemuhmano okurãkatohme. Kuenetupuhno. Morara exiryke kure ytoko ropa. Tukurãkase ropa mase, tykase Jezu eya.

Jairu ẽxiry ẽsemãkatopõpyry ropa Jezu a

(Mateu 9.23-26; Ruka 8.49-56)

35Morara kary rohtao Jairu tapyĩ tae tooehse toto.

— Oẽxiry norihno. Amorepatõ onerekohmara exiko, tykase toto aorikyhpyry zumy a.

36Yrome mokaro otururu totase Jezu a:

— Oserehpyra exiko. Ãkorehmary enetupuhko ya, tykase Jezu aorikyhpyry zumy a.

37Morarame typoetory tõ rokẽ tarose eya, Peturu, Tiaku, João, enara rokene. Tiaku akorõ João kynexine. 38Morarame toeporehkase toto Jairu tapyĩ taka. Tuhke ahno moroto kynexine xitaketomo, aorikyhpyry hnamonanomo, enara. 39Morarame tapyi taka tomomyryhtao ynara tykase ynororo eya xine:

— Oty katoh panaikato matou, xitãko? Xitara ehtoko. Mose orihpyra nase. Nyhnõko rokẽ nase, tykase Jezu eya xine.

40Morarame tounohse eya xine. Mame emero Jezu a tutũtanohpose ropa toto tapyi tae. Jũ maro rokẽ tomõse toto, jumy, jeny, typoetory tõ oseruao. Enara toh tomõse aorikyhpyry enese. 41Morarame emary tapoise Jezu a.

— Tarita kumi, tykase ynororo aomiry ae. “Orymo, owõko ty,” katopo.

42Morara kaxĩpo sã rokẽ tõsemãse ropa ynororo. Towõse ropa, toytoytose ropa tukurãkase ropa exiryke. 12me ikonopory nae kynexine ynororo. Tãkye toehse ropa jũ tomo. 43Morarame ynara tykase Jezu eya xine:

— Jekãtopyra ke ehtoko. Mose kure autuhmatoko, tykase Jezu eya xine.

Currently Selected:

Maku 5: apy

Highlight

Copy