Jenexi 48

Kure rokẽ Joze tõ tyripose Jako a

1Morarame Joze turuse jumy kure pyra ehtoh poko. Naeroro toytose Joze tumy enese, tumũkuru tõ asakorõkõ tarose eya, Manase te, Eparaĩ, enara. 2Mame Jako turuse imepyny a:

— Omũkuru Joze noehno oenese.

Tyjamihtase ropa pitiko sẽpe towõse ynororo tynyhtoh po. 3Ynara tykase ynororo Joze a:

— Ritonõpo Jamihmehxo Exikety a, tõsenepose ya pata Ruze po, Kanaã nonory po. Kure rokẽ tyripose ywy eya moroto. 4Ynara tykase ynororo ya: “Tuhke opoenõ rĩko ase; apakomotyã roropa. Sero nono ekarõko ase apakomotyamo a toto esaryme ehtohme jũme.”

5Mame ynara tykase roropa Jako Joze a:

— Seromaroro omũkuru tõ Eparaĩ te, Manase maro, taro Ejitu po aenurutyamo oehpyra ro jahtao, umũkurume mã toto. Eparaĩ te, Manase maro umũkurume mã toto, umũkuru Rupẽ ehtoh samo te, Ximeão sã roropa. 6Toemũkuase ropa awahtao mokyro omũkurume mana. Mame atakorõme toto exiryke Eparaĩ maro, Manase maro tumykõ mõkomohpyry apiakãko mã toto tymõkomorykõme. 7Moro sã tyrĩko ase, asa Rakeu pokoino. Joepyry ropa ahtao Mesopotamia poe sam tykase ywy, asa toorihse ahtao Kanaã po eporehkasasaka kuahtao xine Epyrata pona. Moroto ekepyry tonẽse ya osema ehpio. (Seromaroro Epyrata Perẽme toehse.)

8Mame Joze mũkuru tõ tonese ahtao Jako a, tõturupose ynororo:

— Onokãkõ moxiamo?

9— Moxiã umũkuru tomo, Ritonõpo nekarotyã ya Ejitu po, tykase Joze.

— Enehko toto xiaro ya, tykase Jako, — kure rokẽ toto ripotohme Ritonõpo a.

10Tamuhpõme Jako toehse exiryke jamihme pyra enuru toehse kynexine. Popyrahme sã tõsenuhmase ynororo. Tumũkuru tõ tarose Joze a eya. Toahmase toto Jako a. Typohse toto eya. 11Ynara tykase Jako Joze a:

— Oenepyra ropa ekaroase jũme repe, yrome seromaroro Ritonõpo poe opoenõ enẽko ase roropa.

12Mame tumũkuru tõ tapoise Joze a tumy enaino. Morotoino tosekumuru po typorohse ynororo tõmyty tyrise nono pokoxi. 13Mame tumũkuru Eparaĩ tapoise tapotunuru wino exikety ke Jako pozery winakoxi tyritohme. Tumũkuru Manase tapoise eya typozery wino Jako emary apotunuru wino pũtokoxi tyritohme. 14Mame Jako a tomary tapotunuru wino exikety tyrise Eparaĩ zupuhpyry pona, poetomehxo ynororo ahtao ro. Tomary typozery wino tyrise eya Manase zupuhpyry pona, osemazupume ahtao ro. 15Morarame kure rokẽ Joze tyripose eya Ritonõpo a. Ynara tykase ynororo:

“Ritonõpo, tam Aparão Esemy,

papa Izake Esẽ roropa,

kure rokẽ moxiã aimo tõ tyriko.

Jesemary eneponeme mase, Ritonõpo,

moe poetome jehtopõpyry poe

tarona tamuhpõme jehtoh pona ro.

16Kure rokẽ toto tyripoko onenyokyhpyry a,

ypynanohtopõpyry samo,

moro sã moxiã ewomako.

Ypoko wenikehpyra tyripoko toto,

tam Aparão poko te,

papa Izake poko roropa

wenikehpyra toto ehtohme.

Tumũkue tuhke tyriko toto,

typakõke roropa sero nono po,”

tykase ynororo.

17Joze zamaro pyra Jako nyrihpyry, tomary apotunuru wino riryhtao eya Eparaĩ zupuhpyry pona. Naeroro tumy emary tapoise eya toutohme Eparaĩ zupuhpyry poe tyritohme Manase zupuhpyry pona.

18— Arypyra, papa, tykase Joze. — Moro sã pyra exiko. Mose osemazupu seino, ãpotunuru winõ oemary tyriko zupuhpyry pona.

19Moro sã se pyra Jako kynexine. Ynara tykase ynororo:

— Zuaro ase, aimo. Zuaro ase. Manase pakomotyã tuhkãkõme exĩko roropa. Yrome zakorõ tuisamehxo exĩko mana, ipakomotyã tuhkehxo exĩko, tuhke imoihmãkõme exĩko mana.

20Kure rokẽ toto tyripose Jako a, ynara tykase:

— Oesetykõ ae kure imehnõ tyripõko Izyraeu tomo a. Ynara ãko mã toto: “Kure rokẽ oripõko ase Ritonõpo a, inyrihpyry sã Eparaĩ poko, Manase poko roropa.”

Morara Eparaĩ tyrise Jako a osemazuhme, imeĩpo Manase. 21Tumũkuru Joze a ynara tykase ynororo:

— Jenẽko mase tamuhpõme, orihnõko ase. Yrome Ritonõpo amaro xine exikehpyra mana. Aarotorỹko ropa mana atamuru tõ nonory pona ropa. 22Xikẽ nonory ekarõko ase oya, orui tomo a pyra. Xikẽ tõ nonory tapoise ya amoreu tõ wino, atatapoiry ke ya ypyre ke, taky ke te, tapema ke, enara.

Currently Selected:

Jenexi 48: apy

Highlight

Copy