Exutu 4

Moeze tyjamihtanohse Ritonõpo a

1Morarame ynara tykase Moeze Ritonõpo a:

— Yrome otarame zae jehtoh onenetupuhpyra Izyraeu tõ tamuximãkõ exĩko mana. Otarame jomiry etary se pyra exĩko mã toto. Otarame, “Ajohpe, Ritonõpo osenepopyra nase oya,” ãko mã toto.

2Naeroro ynara tykase Ritonõpo:

— Oty moro oemahpo?

— Ymyxiry, tykase Moeze.

3— Emako nono pona, tykase Ritonõpo.

Tomase ahtao eya okoime tanyhtase imyxiry. Toepase Moeze okoi kurũke.

4Mame ynara tykase Ritonõpo Moeze a:

— Arokyry poko apoiko oemary ke.

Morarame okoi tapoise Moeze a arokyry poko. Tanyhtase ropa imyxiryme ropa emahpo.

5Mame ynara tykase Ritonõpo:

— Morara tyriko Izyraeu tõ neneryme tuaro toto ehtohme Ritonõpo itamurukõ Esẽkõ, Aparão Esemy te, Izake te, Jako enara Esẽkõ nosenepoase oya.

6Ynara tykase ropa Ritonõpo Moeze a:

— Seromaroro oemary tyriko opuroh pokoxi.

Aomi poe morara tyrise Moeze a. Mame tomary touse ropa ahtao eya orukoimo panõ toehse emary poko. Ekurãkapỹme sã toehse.

7— Oemary tyriko ropa opuroh pokoxi, tykase Ritonõpo.

Tyrise eya. Mame touse ropa ahtao eya, emary kure ropa toehse tupũ osemazuhme aexihpyry samo.

8Mame ynara tykase Ritonõpo eya:

— Onyrihpyry yjamitunuru ke apitorymã eneryhtao Izyraeu tomo a, oenetupuhpyra toto ahtao zakorõ tyriko. Oenetupuhnõko mã toto. 9Yrome moro asakoro onyrityã yjamitunuru ke eneryhtao eya xine, onenetupuhpyra ro toto ahtao, õmiry etary se pyra roropa toto ahtao, tuna anỹko Niro kuae aekuãtohme nono pokoxi. Munume anyhtãko moro tuna mana.

10Ynara tykase Moeze Ritonõpo a:

— Ritonõpo, moino ro tupime jotururu ya. Seromaroro oturũko mase ya. Yrome morararo ywy, tupime ro ya jotururu. Otupĩko ywy jotururuhtao.

11Yrome ynara tykase Ritonõpo eya:

— Onoky myta ekarõko ahno a? Onoky ahno tyripõko otato pyra te, sekere kara roropa? Onoky imehnõ rĩko tonure te, tonurẽkara roropa? Ywy ase Ritonõpo Oesẽkomo. 12Naeroro ytoko. Ãkorehmãko ase õtururu poko. Õturutoh ekarõko ase oya.

13Yrome Moeze a tozuhse. Ynara tykase:

— Arypyra, Ritonõpo. Ajohpãme sã imepỹ aropoko.

14Tohne toehse Ritonõpo Moeze poko. Ynara tykase eya:

— Otara ãko mah orui Arão poko, Rewi parỹpyry? Otupipyra ynororo tõtururuhtao. Zuaro ase. Oehnõko mana oenese seromaroro. Tãkye exĩko mana oeneryhtao. 15Oturũko mase Arão maro. Zurũko mase aoturutohme. Ãkorehmatorỹko ase õtururukõ poko te, ãmorepatorỹko ase onyrirykõ poko. 16Mame õmiry ekarõko mã ynororo ahno netaryme. Ritonõpo sã exĩko mase, õmiry ekarory poko eya, ahno zurutohme. 17Sero omyxiry aroko amaro. Ike yjamitunuru enepõko mase.

Ejitu pona Moeze ytory ropa

18Mame toytose Moeze tymeretamuru, Jetoro tapyĩ taka. Ynara tykase:

— Ytoxi Ejitu pona ropa wekyry tõ enese. Toto enery se ase isene ro toto ahtao.

— Ỹ, kure rokẽ ytoko, tykase Jetoro.

19Mitiã nonory po Moeze ahtao ro, morara tykase Ritonõpo eya:

— Ytoko ropa Ejitu pona. Mokaro, oetapary se aehtyã toorihse mã toto.

20Mame typyty tyrise Moeze a jumẽtu pona, tumũkuru tõ roropa. Toytopitose ropa toto Ejitu pona. Tymyxiry tarose Moeze a tomahpo, Ritonõpo naropohpyry.

21Tõturuzomose ropa Ritonõpo Moeze a. Ynara tykase:

— Yjamitunuru ekaroase oya enepotohme te, enetupuhpotohme. Toeporehkase awahtao Ejitu pona yjamitunuru enepõko mase morotõkõ tuisary ẽpataka. Yrome mokyro ripõko ase aosenetupuhtoh tũpore. Ypoetory tõ Izyraeu anaropopyra exĩko mã ynororo moro poe. 22Mame mokyro zurũko mase, ynara ãko ywy, Ritonõpo oya: “Izyraeu tõ umũkurume mana, apitorymano. 23Kuuruase, ah umũkuru nytono jeahmase. Yrome anaropopyra mexino. Morara exiryke omũkuru apitorymã etapãko ase.”

24Mame aytoryhtao Ejitu pona, totypohse Moeze tytapyĩ taõkõ maro moroto ẽmehtohme. Mame tõseporyse Ritonõpo Moeze etapatohme repe. 25Mame topu taere exikety tapoise ipyty Zipora a. Tumũkuru aĩpotapihpyry tysahkase eya. Moro tomase eya Moeze pupuru pona, ynara tykase ynororo:

— Ynio mã munuhpe exiketyme mase ya.

26Morara tykase eya aĩpotapihpyry sahkary pokoino. Naeroro Moeze typynanohse Ritonõpo a, iseneme ehtohme.

27Morarame ynara tykase Ritonõpo Arão a:

— Ytoko osẽpatakamase Moeze maro ona pona.

Toytose ynororo. Tõsẽpatakamase toto ypy Xinai po. Typohse ynororo eya. 28Mame Arão turuse Moeze a Ritonõpo omihpyry emero, taropose tahtao Ejitu pona toytotohme ropa. Turuse roropa eya Ritonõpo nyripohpyry poko tyjamitunuru ke. 29Mame Arão maro toytose Moeze Ejitu pona. Tõximõse toto Izyraeu tõ tamuximãkõ maro emero. 30Mame toto turuse Arão a, Ritonõpo omihpyry Moeze a. Mame Ritonõpo nyripohpyry tyrise Moeze a Ritonõpo jamitunuru enepotohme eya xine. 31Tonetupuhse eya xine. Mame tuaro toehse toto ahtao Ritonõpo oepyry poko tyya xine toetuarimarykõ eneryke eya, toepuise toto Ritonõpo eahmaryme eya xine.

Currently Selected:

Exutu 4: apy

Highlight

Copy