1 KEE ƁƏ 14
14
Yeɓ David mo joŋ yaŋ Jerusalem
(2 Sa 5:11-16)
1Hiram goŋ sǝr Tirus pee za wo David ne kpuu bahre, ne za zyeɓ tǝsalle tǝkine za zyeɓ kpuu, ka vuura yaŋ nyi David. 2David tǝ ɓe, Dǝɓlii kan goŋ ɓo ne ki tǝ za Israel, so yii goŋ ah ɓo pǝyǝk mor zan ah Israel.
3Ne cok David mo yaŋ Jerusalem, kan ŋwǝǝ ge gŋ pǝpãare, bem wee mawǝǝ ne wee maŋwǝǝ daŋ. 4Tǝɗii wee ah mai mo bem ra yaŋ Jerusalem a naiko: Syimea, Sobaɓ, Natan, Salomo, 5Jibar, Elisua, Elpelet, 6Noga, Nefeg, Jafia, 7Elisama, Beeliada, ne Elifelet.
David ik Filistien
(2 Sa 5:17-25)
8Ne cok Filistien mo laara ɓaŋra David kan goŋ ɓo ne tǝ sǝr Israel daŋ, za sal ɓǝǝ kalra ge ka gban ko. David mo laa ɓǝ ah o, so ge ka zyaŋ ne ra. 9Filistien gera, ge ɗǝrra pǝ cok tǝforoŋ Refaim. 10David fii Dǝɓlii faa: Me ge ruu sal ne Filistien o ne? Mo ga soɓ ra ga mor jol ɓe no ne? Dǝɓlii faa nyi David: Mo gyo, me ga soɓ ra ga jol ɓo. 11So David ruu sal ne ra pǝ cok Ba'al-Perasim, ik ra gŋ. David so faa: Masǝŋ ŋgǝ̃ǝ za sal za syiŋ ɓe pel ɓe tǝgbana bii moo ŋgǝ̃ǝ cokki, mor ah ɗiira cok ah ne Ba'al-Perasim. 12Filistien soɓra masǝŋ ɓǝǝ myah gŋ, so David faa nyi zan ah mo woora ɓaa wii nyi.
13Filistien so pǝ̃ǝra sal kpǝ, ge ɗǝrra pǝ cok tǝforoŋ Refaim. 14David so fii Dǝɓlii faɗa, so Dǝɓlii zyii zah ah faa: Mo ge ruu sal ne ra nǝfah kǝi ka, amma mo kiŋ nǝfah kǝfal ɓǝǝra, ka mo zoo ge tǝ ɓǝǝ jaŋjaŋ ne kpuu foore. 15Ne cok mo laa cii fan tǝgbana cii ɓal tǝ syee tǝ kpuu foo sǝŋ ɓe, ka mo hǝǝ ruu sal ne ra o, mor ka ame ye kal ɓo pel ɓo ka ik za sal Filistien. 16David joŋ tǝgbana mai Masǝŋ mo faa nyi ko. Ik za sal Filistien daga Gibeon ŋhaa ge dai Gezar. 17Kacii David zoo cok daŋ, Dǝɓlii joŋ za sǝr daŋ ɗuura gal ahe.
Currently Selected:
1 KEE ƁƏ 14: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
