1 KEE ƁƏ 13
13
Ɓaŋra sunduku Dǝɓlii gin yaŋ Jearim
(2 Sa 6:1-11)
1David faa ɓǝ ne zaluu sooje ah ra mai mo lwaara za ɓo ujenere ujenere, ne mai mo lwaara za ɓo temere temere. 2So faa ɓǝ nyi za Israel mai mo taira ɓo gŋ faa: We kwo ɓǝ ah ɓo pǝsãh ɓe, so mo na 'yah Dǝɓlii Masǝŋ man ta ɓe, na pepee ge wo tǝcoŋ za sǝr man daŋ ne wo za joŋzahsyiŋ ne Lewitien pǝ yaŋ mai mo kaara ɓo gŋ camcam daŋ, ka faa nyi ra mo ge taira nyee ne na. 3So ka na ge ɓaŋ sunduku Masǝŋ man mai ne cok Saul mo yea kaa goŋ ɓo na ɓaŋ syiŋ ah ya ge ne ko. 4Za daŋ laara ɓǝ ah pǝ'nyahre, zyiira ɓǝ ahe.
5So David tai za Israel daŋ, daga zahsyee sǝr Egiɓ nǝfah morkǝsǝŋ, ŋhaa ge dai pǝ cok ma ga Hamat nǝfah kǝsǝŋ.#1 Sa 7:1-2 6David ne za Israel mo ne ki daŋ ur kalra ge yaŋ Ba'ala, mai ako ye mo yaŋ Jearim pǝ sǝr Yuda, mor ka ga ɓaŋ sunduku Masǝŋ mai mo cuu cok kal Dǝɓlii ɓo.#Pǝ̃ǝ 25:22 7Ɓaŋra sunduku Masǝŋ yaŋ Abinadaɓ kan ge tǝ muŋta dǝǝ mafuu ahe. Wee Abinadaɓ Uzza ne Akiijo ye syeera ne muŋta dǝǝ ahe. 8David ne za Israel daŋ a dǝra daa pel Dǝɓlii ne swah suu ɓǝǝ daŋ yii Masǝŋ ne ko. Joŋra zah fakyẽm camcam mai mo zyeɓra ɓo, ɗǝǝra lǝŋni, woŋra tǝnjuŋ ɗaŋ, tǝnjuŋ zahrãani, yuŋni, koŋkeere tǝkine kokõorĩi.
9Ne cok mo ge daira pǝ cok ɗuu sor Kidon, Uzza nyen jol gbǝ sunduku Dǝɓlii, mor dǝǝ soɓ ee ɓo nǝkahe. 10So Dǝɓlii ɓaŋ kpãh ne Uzza pǝ'manne, i ko pǝ wulli, mor nyen jol juu sunduku Masǝŋ, wǝ kah sunduku Dǝɓlii ŋhoo sǝ. 11David ɓaŋ kpãh tǝ ɓǝ mai Dǝɓlii mo ɓaŋ kpãh i Uzza ne pǝ wulli. So a ɗiira cok ah ne Peres-Uzza ŋhaa tǝ'nahko. 12Ne cok ah David ɗuu gal Dǝɓlii faa: Me gak ɓaŋ ɗah sunduku Dǝɓlii ga yaŋ ɓe ne suu ɗǝne? 13David zyii ka ɓaŋ sunduku Dǝɓlii ga wol ah yaŋ Jerusalem ne ya. So cak ne ge kan yaŋ dǝɓ ma ɗii ne Obed-Edom, dǝɓ ah dǝɓ yaŋ Gat yo. 14Sunduku Dǝɓlii nǝn gŋ fĩi sai, so Dǝɓlii ẽe Obed-Edom ne za yaŋ ah tǝkine fan ah daŋ.#1 KeeƁ 26:4-5
Currently Selected:
1 KEE ƁƏ 13: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
