1 KEE ƁƏ 11

David kaa goŋ tǝ za Israel ne za Yuda daŋ

(2 Sa 5:1-10)

1Za Israel daŋ taira ge wo David yaŋ Hebron, faara nyi ko: Mo ẽe ɗǝ, aru ye syim ɓo. 2Koo ne cok mai Saul mo yea kaa goŋ ɓuu ɓo laŋ, amo yee pǝ̃ǝ sal ne za Israel. Dǝɓlii Masǝŋ ɓo faa, amo ye ga gbǝ zan ah mo kaa goŋ ɓǝǝra. 3So zaluu Israel daŋ gera wo goŋ David yaŋ Hebron. David gbǝ zah ne ra gŋ pel Dǝɓlii, so syeera nǝm tǝl ah kan goŋ ne tǝgbana mai Dǝɓlii mo faa ɓo ne zah profeto Samuel.

4Goŋ David ne za Israel daŋ urra kal ge ka ruu sal ne yaŋ Jerusalem (pǝtãa yaŋ ah yea tǝ ɗii ne Jebus, mor Jebusien ye kaara ɓo pǝ sǝr ahe).#Jos 15:63; ZaL 1:21 5Jebusien faara nyi David: Mo ka dan ge tǝgǝǝ yaŋ ya. Amma David so nyiŋ yaŋ Sion mai mo ne ɓaale ko, so ɗiira ne yaŋ David. 6So David faa: Koo zune mo nĩi Filistien kǝpel daŋ, dǝɓ ah ga ciŋ swah salle. Joaɓ we Seruja ye pǝ̃ǝ sal kǝpelle, so ciŋ swah salle.

7Mor David 'yah ka kaa pǝ yaŋ ma ne ɓaale, mor ah so ɗiira yaŋ ah ne yaŋ David. 8David vuu yaŋ ge pel ŋhaa ryaŋ ɓoo cyõ. Tǝŋ daga Millo ŋhaa zyaŋni. So Joaɓ zyeɓ tǝcoŋ yaŋ ah o. 9Yǝk David ge pel zah'nan daŋ, mor Dǝɓlii ma ne swah daŋ no ne ki.

Sooje David maswah ah ra

(2 Sa 23:8-39)

10Marai tǝɗii sooje David maswah ah ra yo, tǝkine za Israel mai mo gbahra jol ah ka mo kaako goŋ tǝgbana Dǝɓlii mo faa ɓo. 11Patǝ vaŋno ah ako ye Jaskobeam, Hakmoniyo yo, ako ye dǝɓlii za matǝ sai kŋ, ruu sal ne za temere sai, ik ra ge lal pǝ wul tǝɗe'. 12Fahfal ah dǝɓ maswah kǝsyil za matǝ sai ako ye Eleasar we Dodo, daga morsǝ̃ǝ Akoki, 13a no ne David pǝ cok Pas-Damim, ne cok Filistien mo taira ɓo ka ruu sal ne za Israel, so ne cok za Israel mo tǝŋra ɗuu pel Filistien, ka mǝ ah uu ɓo pǝ 'wah zyemĩirĩ. 14Ako ne zan ah daŋ ge uura kǝsyil 'wahe, ruura sal ne Filistien. Dǝɓlii nyi swah nyi ko, kaa kacella.

15Comki za sai kǝsyil zaluu sooje matǝ jemma sai kalra ge tǝgǝǝ waa pǝ cok mai David mo kaa ɓo gŋ kah yii Adullam, ka Filistien laŋ pǝ̃ǝra sal ge gbah jul sal ɓo pǝ cok ma tǝforoŋ Refaim. 16Ne cok ah ka David no ɓǝr ɓaale, ka Filistien manyeeki ah nyiŋra yaŋ Betlehem ɓe. 17David no ne fan 'yah pǝ zahzyil ahe, so faa: Azu ye ga bee bii pǝ lak bii ma zahfah yaŋ Betlehem ŋhaa nyi me ka zwan ne? 18Za sooje maswah matǝ sai, ɓaŋra fahlii kalra ge zahjul sal Filistien, ge beara bii pǝ lak bii gŋ gera nyi David ne ko. Amma David zyii ka zwan bii ah ya, ɓaŋ sǝǝ ge tǝ sǝr joŋ syiŋ ne pel Dǝɓlii. 19So faa: Masǝŋ ɓe mo cak me ne joŋ fan na morãiko, me ga zwǝ syim za mai mo gera pǝ wul ne nahnǝn suu ɗǝne? So zyii zwan a. Sooje maswah matǝ sai joŋra yeɓ naiko.

20Abisai naa mah Joaɓ ako ye dǝɓlii za maswah matǝ jemma sai. Comki ruu sal ik za temere sai ne zǝǝ pǝ wul gŋ, so lwaa tǝɗii kǝsyil za matǝ sai. 21A pǝyǝk kal za matǝ jemma sai ɓe, so ciŋ dǝɓlii ɓǝǝra, amma ne daŋ laŋ ka zahki ne za ma kǝpel matǝ sai ya. 22Benaja we Jehojada ma Kabzeel joŋ yeɓ maswah ah camcam. Comki ik za swah sal Moabien gwa pǝ wulli. Comki laŋ ɗǝr ge ik ɓol mai mo lwaa ɓo pǝ lak bii, ne cok ah laŋ ka syaŋ tǝ ge ɓo sǝŋ pǝlli. 23So comki i dǝɓ sǝr Egiɓ pǝ wulli, dǝɓ ah pǝbǝ̃ǝ no cam, wah ah i jol dappe, a ne zǝǝ jolle, kǝ̃r zǝǝ ah a na kpuu kaŋ mbǝro, amma ne daŋ laŋ Benaja tǝ ge tǝl ah ne kǝndaŋne, so nyiŋ zǝǝ ah jol ah i ko ne soo sǝŋ. 24Benaja joŋ swah naiko, so lwaa tǝɗii kǝsyil za matǝ jemma sai. 25A pǝyǝk kal za matǝ jemma sai ɓe, amma ne daŋ laŋ ka zahki ne za ma kǝpel matǝ sai ya. David ɓaŋ ko kan dǝɓlii ne tǝ za mai moo byakra ko.

Marai sooje maswah ah ra yo

26-47Asayel naa mah Joaɓ, Elkanan we Dodo ma Betlehem, Sammot ma Haror, Helet ma Palon, Ira we Ikkes ma Tekoa, Abiezar ma Anatot, Sibbekai ma Huska, Ilai ma morsǝ̃ǝ Akoki, Maharai ma Netofa, Heled we Baana ma Netofa ta, Itai we Ribai daga Gibea mǝ Benyaamin, Benaja ma Piraton, Hurai ma pǝ cok tǝforoŋ Gaas, Abiel ma Arba, Asmavet ma Bakurim, Eliaba ma Saalbon, Hasem ma Gizon, Yunatan we Sage ma Harar, Akiam we Sakar ma Harar, Elifal we Ur, Hefer ma Mikera, Ahija ma Palon, Hesro ma Karmel, Naarai we Esbai, Joel naa mah Natan, Mibar we Hagri, Zelek ma Ammon, Naharai ma Beerot, (ako ye pa ɓaŋ paŋzǝǝ Joaɓ we Seruja), Ira ma Yeter, Gareɓ ma Yeter ta, Urias Hetiyo, Zabad we Alai, Adina we Siza, (ako ye dǝɓ ma pel za zahban Ruben, a ne sooje mǝ ah jemma sai), Hanan we Maaka, Josafat ma Mitan, Osias ma Astarte, Sama ne Jehiel wee Hotam ma Aroyer, Jediel ne Joka wee Simri ma Tis, Eliel ma Makavin, Jeribai ne Josavia wee Elnaam, Itma ma sǝr Moab, Eliel, Obed, ne Jasiel ma Zoba.

Currently Selected:

1 KEE ƁƏ 11: MUAR

Highlight

Copy