Mako 14

Badiyi bakulu banolangana kubulaya Jesu

(Matewu 26:1-5; Luke 22:1-2; Johani 11:45-53)

1 # Kufuluka 12:1-27 Nzano we Kupinda pezhugwi* ne Nzano we Tjiwunga tjisina Mbidzo, wakabe wasaligwa nge mazhuba mabili koga. Ngono bapirisiti bakulu ne badiyi be nlayo bakabe beshaka zila ya bangabhata Jesu ngekwa kasumbikala, kuti bambulaye. 2Koga bakati, “Kusi nge tjibaka tje nzano, ngobe kungabe ne zhoba pakati kwe bathu.”

Jesu unozhodziwa ku Bhetani

(Matewu 26:6-13; Johani 12:1-8)

3 # Luke 7:37, 38 Kati ali mu Bhetani, ali gele eja mu ng'umba ya Simoni wakatongobe ne mapele, kukazha nkadzi akasenga iteme tje alabhasita tje mafuta anonuhwa zwinozipa, e nadi* mbuyanana, ana ntengo upezhugwi kwazo, kazwinunula iteme, kadila mafuta mu nsholo wa Jesu. 4Koga bamwe ipapo bakabe belebesana nge bushongola beti, “Apa mafuta iyawa anozanisigwani kene? 5Abe angatengesiwa, kukawanika mari anopinda mari e siliva ali mazana matatu (300), kapiwa bashayi.” Ndizo bakantjemela.

6Koga Jesu kabadwa kati, “Thubukanani naye. Apa mon'dziyidzilani kene? Kana wandiyitila tjithu tjikulu kulu kwazo. 7#Matama 15:11Bashayi munabo misi yose, mungabayitila bubuya pamada, koga imi amutowobe nami misi yose. 8Ihwoyu nkadzi wayita tjaangatubula, wadila mbili wangu mafuta, eululwamisila kubiganyiwa. 9Ndolebesa ndoti kumuli, kumwe ne kumwe kunowosumikigwa Ndebo mbuya iyeyi mu shango yose, tjashingwa nge nkadzi ihwoyu tjowolebgwabo, kuti libe gumbuludzo nge kukwe.”

Judasi unoduma kutengesa Jesu

(Matewu 26:14-16; Luke 22:3-6)

10Ipapo Judasi Isikariyoti, mmwe we bali gumi lina babili, kayenda ku bapirisiti bakulu kuti abawongele Jesu. 11Ngono bakati behwa ikoku bakashatha, bakan'gadzabgwe kuti banowompa mari. Kudwa ipapo wakatangisa kushaka tjibaka tjakalulwama tje kutengesa Jesu.

Jesu ne badiyiwa babe banoja zojiwa zwe Nzano we Kutjuluka

(Matewu 26:17-25; Luke 22:7-14, 21-23; Johani 13:21-30)

12Mu zhuba le kutanga le Nzano we Tjiwunga Tjisina Mbidzo, be bhaya pkhwizana ye tjibhayilo tje kupinda pezhugwi, badiyiwa babe bakati kunli, “Ndi ngayi kwamunoshaka kuti tinomululwamisila kujila Nzano we Kupinda pezhugwi?”

13Ngono Jesu katuma badiyiwa babe bali babili kati, “Nginani mu nzi nkulu, ngono mowoshangana ne nlume akasenga shabana ye vula, muntobele. 14Mudwe mweni we ng'umba yaanowongina muti, ‘N'diyi bakati ng'umba yangu ye bezi yandinowojila Nzano we Kupinda pezhugwi ne badiyiwa bangu ndi ipi?’ 15Unowomulakidza ng'umba hwulu itjapezhugwi kwe imwe, yakalongwa zwigalo ikalulwamisiwa, mutilulwamisile ipapo.”

16Badiyiwa ibabo bakamilika bakayenda ku nzi nkulu, bakanowana tjimwe ne tjimwe tjili sekwa aleba, ndizo bakalulwamisa.

17Kwakati madekwana Jesu kaswika ne bali gumi lina babili. 18#Njimbo 41:9Bakati bali pa tafuli beja, Jesu kati ku bali, “Ndolebesa ndoti, mmwe wenyu unowondiwonga, iye unoja nami.”

19Bakatangisa kungina buyendasi, ngono nge kutobedzana bakati, “Apa ndimi kene?”

20Jesu kabadwa kati, “Mmwe we bali gumi lina babili, iye unoseba tjiwunga tjitje mu ndilo nami. 21Iye Nkololo we Nthu unowofa sekwa kwakakwagwa nge kukwe, koga wapalala iwoyo nlume unowonga Nkololo we Nthu! Kwabe kungayita ha nlume iwoyo akabe asagala azwagwa.”

Tjilayilo tja She

(Matewu 26:26-30; Luke 22:14-20; 1 Bakorinta 11:23-25)

22Bakati beja, Jesu katola tjiwunga, kaboka Ndzimu, katjipemula kabapa, kati ku bali, “Tolani, mbili wangu ihwoyu.”

23Katola bhepe le nkumbi we zhambi kati aboka kabapa iwo, bakaung'wa bose. 24#Kufuluka 24:8; Jeremiya 31:31-34Kati ku bali, “Awa malopa angu anothama tjidumano tjitshwa, iwo anotebuligwa banji. 25Ndolebesa ndoti kumuli, anditowong'wa kakale nkumbi we ntjelo iwoyu we nzhambi kuswikila zhuba landinowoung'wa uli ntshwa mu bushe gwe Ndzimu.”

26Bakati bamba lumbo gunokudza Ndzimu, bakabhuda bakayenda ku Dombo le Mitoba.

Jesu unoleba kuti Pita unowonlandula

(Matewu 26:31-35; Luke 22:31-34; Johani 13:36-38)

27 # Zakhariya 13:7 Jesu kabadwa kati, “Mowondipalala mose, ngobe kwakakwagwa kukayi,

“ ‘Ndowoloba nlisi,

ngono pkhwizi dzowopalala.’

28 # Matewu 28:16 “Koga ha ndisinobe ndamusiwa mu bafi, ndowomutungamilila ku Galili.”

29Pita kan'dwa kati, “Nenguba bangapalala bose, imi andingamusiye.”

30Ngono Jesu kan'dwa kati, “Ndolebesa ndoti, busiku igogu, gukurume lowoti lisathu likalila kabili, unowobe wandizwilandula katatu.”

31Pita kan'dabila akasimisa eti, “Imi andingamuzwilandule, bukulu ndingafa namwi.” Bose bakaleba sa ikoko.

Jesu unotembezela mu thiba inodang'wa Getsemane

(Matewu 26:36-46; Luke 22:39-46)

32Bakayenda pathu panodang'wa Getsemane, kati ku badiyiwa, “Galani ipapa nditjatembezela.” 33Katola Pita na Jakubo na Johani, kayenda nabo, kangina buyendasi, kadziyidzika kwazo mu meya, 34kati ku bali, “Meya yangu izhele buyendasi kukulu kwandingafa. Salani pano makalinda.”

35Kayenda thambgwana, kawila pasi katembezela ekumbila kuti, ha kutubuka dzene itjetji tjibaka tjingampinda. 36Kati, “Tate bangu, akuna tjinomukona, dusani bhepe ileli le kudziyidzika pandili, nenguba kwakajalo, musiyite kuda kwangu, itani kuda kwenyu.”

37Kati ebuya kawana bakayizela, kati kuna Pita, “Simoni, apa wakayizela kene? Nokong'wa kulinda awara ing'ompela koga kene? 38Lindani mutembezele kuti ndizo musingine mu kulikiwa. Meya inoda tjose, koga nyama inokong'wa.”

39Kabgwilila kanotembezela kakale eleba matama iwo zwawo. 40Kabuya kakale ewana bakayizela, ngobe mesho abo akabe elema nge hwope. Ngono bakasizibe kuti bangan'dabila beyitini.

41Kabuya gwe butatu, ngono kabadwa kati, “Apa mutjakayizela, munyaluluka zwenyu kene? Kwagala, tjabe tjibaka, Nkololo we Nthu unowongegwa mu maboko e batjinyi. 42Mukani, ngatiyendeni, ngobe n'wongi wangu wabe pejo.”

Kubhakhwa kwa Jesu

(Matewu 26:47-56; Luke 22:47-53; Johani 18:3-12)

43Ipapo koga atjalebeleka, Judasi, iye mmwe we bali gumi lina babili, kazha ana mbunga we bathu bakasenga makanu ne swimbo, bedwa ku bapirisiti ne badiyi be nlayo ne bakulu. 44Ntengesi wakabe abapa tjilakidzo eti, “Iye wandinowoputa, ndiye, munsunge, muyende naye akalisiwa.”

45Kati ezha kayenda kunli tjinyolotjo, kati eswika pana Jesu kan'dwa kati, “N'diyi wangu,” kabe emputa. 46Bakambhata bakansunga. 47Mmwe we bakabe bali ipapo kashomola bukanu gugwe, katema mmwe nlanda we Ntungamili we bapirisiti, kanthubula zebe. 48Ngono Jesu kababhuzwa kati, “Apa mazha kuwogwisa tjigebeng'a kene, kwamunozha makabhata makanu ne swimbo kuwonditola? 49#Luke 19:47; 21:37Zhuba ne zhuba ndakabe ndi namwi mu Ng'umba ye Ndzimu ndidiya, ngono amuzotongo ndibhata. Koga matama e hwalo dze Ndzimu ngaazhadzisike.”

50Badiyiwa babe bose bakanfupatila bakatizha.

51Ngono mmwe nzhuzha kantobela akafuka ngubo yoga, na iye bakambhata, 52kasiya ngubo iye katizha ali mbujo.

Jesu mbeli kwe makulukota e Bajuta

(Matewu 26:57-68; Luke 22:54-55, 63-71; Johani 18:13-14, 19-24)

53Bakatola Jesu bakayenda naye ku Ntungamili we bapirisiti. Bapirisiti bakulu bose ne bakulu ne badiyi be nlayo bakabe bakakubungana. 54Pita wakabe akantobela ali thambgwana naye kunoti mu nsha we Ntungamili we bapirisiti, ngono kagala ne balindi edziya moto. 55Nge tjibaka itjetjo, bapirisiti ne makulukota wose bakashaka butendeki gungasungisa Jesu, kuti abulawe, koga bakasiguwane. 56Banji bakadusa butendeki gwe manyepkhwa nge kukwe, koga gwakabe gusingayendidzane.

57Bamwe bakamilika bepa butendeki gwe manyepkhwa nge kukwe beti, 58#Johani 2:19“Takahwa eti, ‘Ndowokolomodza ng'umba iyeyi ye Ndzimu yakabumbiwa nge maboko, koga mu mazhuba matatu ndowobaka imwe isakathamiwa nge maboko.’ ” 59Nenguba kwakajalo, butendeki gwabo gwakabe gusingawililane.

60Ntungamili we bapirisiti kama pakati kwe bathu, kabhuzwa Jesu eti, “Apa autodabila batendeki ibaba tjabanoleba ngekuko kene?”

61Jesu kanyalala, kasidabile tjimwe. Ntungamili we bapirisiti kambhuzwa kakale kati, “Apa ndiwe Mesiya, Nkololo we Ndzimu unokudziwa kene?”

62 # Daniyele 7:13 Jesu kati, “Ndimi. Ngono Nkololo we Nthu mowombona ali gele ku luboko gwe luji gwe Ndzimu Masimbawose, ezha nge makole e kudzimu.”

63Ntungamili we bapirisiti kapalula zwiambalo zwizwe kati, “Titjashakilani batendeki kene? 64#Zwipo 24:16Mazwihwigwa iye etuka Ndzimu. Moipedza tjini?”

Ngono bose bakantilika nlandu we kuti wakafanigwa nge lufu.

65Bamwe bakatangisa kunthwila mate bakanzwimba mesho benloba, ben'dwa beti, “Leba kuti ndiani wakuloba.” Balindi bakantibulanya.

Pita unozwilandula Jesu

(Matewu 26:69-75; Luke 22:56-62; Johani 18:15-18, 25-27)

66Pita kati atjigele pasi mu nsha, kukabe kuzha mmwe we balandakadzi be Ntungamili we bapirisiti; 67ngono kati ebona Pita edziya moto, kanlinga kan'dwa kati, “Nawebo wabe una Nnazareta#14:67 Nnazareta: Zina ilelo lakabe lishingisiwa muna Jesu lilakidza mamo awe, kakale lakabe lili zina lakapiwa Bakirisiti be kutanga (Mishingo 24:5). iwoyu, iye Jesu.”

68Pita kalandula kati, “Anditoziba naiko anditohwisisa kuti unoleba ngekweni.” Kamilika kayenda ku nkoba.

69Nlandakadzi kambona kakale, kadwa bathu bakabe bali pejo naye kati, “Iwoyu nlume mmwe wabo.” 70Pita kalandula kakale.

Kukati shule kwe tjibaka tjifutshwanana, bathu bakabe bali mile ipapo bakati kuna Pita, “Malebeswa, u mmwe wabo, ngobe u N'galili.”

71Pita katangisa kutuna ne kuzwilonga bhiso kati, “Iwoyu nlume wamunoleba nge kukwe anditonziba.”

72Ipapo gukurume likalila gwe bubili, Pita kakumbula matama akabe alebgwa ndi Jesu eti, “Gukurume lowoti lisathu likalila kabili, unowobe wandizwilandula katatu.” Pita kadila guwo.

Currently Selected:

Mako 14: KBTP

Highlight

Copy