SALMOS 18
18
I c'ay David cha'an i coltʌntel ti' tojlel Saúl
(2 S. 22.1-51)
1C Yum, mic wen c'uxbiñet. Wen p'ʌtʌlet.
2Lajalʌch lac Yum bajche' ch'entun ba' mi lac puts'el.
Jiñʌch ts'ajcʌbil bʌ cotot. Jiñʌch caj Coltaya. C Diosʌch.
Lajalʌch bajche' wen xuc'ul bʌ xajlel.
Jiñʌch c mʌctʌjib, jini p'ʌtʌl bʌ mu' bʌ i coltañon.
Lajalʌch lac Yum bajche' chan bʌ ts'ajc ba' mi cochel.
3Mic pejcan lac Yum come uts'atax.
Mi' coltañon ti' tojlel j contrajob.
4Che' colel c chʌmel ñup'ulon yubil.
Yom i jisañon jini c'ax bʌbʌq'uen bʌ che' bajche' colem ja'.
5Che' colel c chʌmel tsa' cʌn chujquiyon yilal,
Jini yom bʌ i jisañon tsi' tajayon.
6Che' añon ti wocol tsac pejca c Yum.
Tsac cha'le oñel ti' tojlel Dios.
Tsi' yubibeñon c t'an ya' ti panchan.
7Che' jini tsi' ñijca i bʌ jini lum, tsa' tili yujquel lum,
Jini wits tac tsa' bujchi.
Tsi' ñijca i bʌ cha'an i mich'ajel Dios.
8Jusiña i ñi' Dios yilal cha'an i mich'ajel.
C'ajc woli bʌ ti lejmel tsa' loq'ui ti' yej yilal,
Tsi' tsuc'u xutunte'.
9Lac Yum tsi' ju'sa tilel tocal, tsi' pʌsʌ i p'ʌtʌlel.
Wen i'ic' ya' ti yebal i yoc.
10Tsa' wejli tilel yic'ot querubín,
Tsa' wejli tilel ti ic'.
11Joyol lac Yum ba' wen pim tocal.
Wen i'ic' jax, wen pim jini tocal cuchul bʌ i cha'an ja'al.
12Jini chajc tsi' yʌc'ʌ ti tsictiyel i sʌclel lac Yum ba' pim tocal.
Tsa' yajli tuñija' yic'ot abʌc woli bʌ ti lejmel.
13Lac Yum tsi' yʌq'ue i t'an chajc ya' ti panchan,
Jini C'ax Ñuc Bʌ tsi' yʌc'ʌ i t'an.
Tsa' yajli tuñija' yic'ot abʌc woli bʌ ti lejmel.
14Tsi' choco tac tilel chajc,
Tsi' yajñesa j contrajob.
Cabʌl tsa' tojmi chajc, tsi' pucuyob.
15Che' jini tsa' tsictiyi i bijlel tac ja'.
Tsa' tsictiyi i buchlib tac wits.
Che' bʌ tsi' cha'le tic'oñel lac Yum, tsilicña pañimil.
16Tsa' loq'ui lac Yum ti panchan.
Tsi' chucuyon, tsi' loc'oyon ti colem ja' yilal.
17Tsi' chucuyon loq'uel ti' p'ʌtʌlel j contra,
Ti' tojlel jini mu' bʌ i ts'a'leñon.
Cabʌl i p'ʌtʌlel j contrajob ñumen bajche' c cha'an bʌ.
18Tsa' tiliyob i contrajiñon ti' yorajlel c wocol,
Pero tsi' xuc'chocoyon lac Yum.
19Tsi' yʌc'ʌyon ti colel cha'an mi cajñel ti xuc'ul.
Tsi' pʌyʌyon loq'uel ti wocol,
Come c'ux mi' yubiñon.
20Lac Yum tsi' yʌq'ueyon c chobejtʌbal cha'an tojon, cha'an sʌc c melbal.
21Tsa'ix c tsajca majlel i bijlel lac Yum.
Ma'anic tsac cha'le mulil, ma'anic tsaj cʌyʌ Dios.
22Tsa'ix cʌc'ʌ tic pusic'al pejtel i meloñel.
Ma'anic tsac juch'teq'ue i mandar.
23Tsa' ajniyon ti toj ti' tojlel lac Yum.
Tsaj cʌnta c bʌ cha'an ma'anic mic cha'len mulil.
24Jini cha'an lac Yum tsi' yʌq'ueyon c chobejtʌbal cha'an tojon,
Cha'an toj c melbal ti' wut Dios.
25Ma' pʌsben a wutslel jini uts'at bʌ.
Ma' pʌsben i xuc'tilel a pusic'al jini xuc'ul bʌ i pusic'al.
26Jatet wola' wʌq'uen chuqui uts'at jini sʌc bʌ i pusic'al.
Pero mich' ma' pʌsben a bʌ jini jontol bʌ.
27Ma' coltan jini tic'lʌbilo' bʌ.
Ma' peq'uesan jini chan bʌ mi' mel i bʌ.
28C Yum Dios, ma' wʌq'ueñon j c'ʌc'al che' añon ti ic'ch'ipan bʌ pañimil,
Come jatet ma' wʌq'ueñon i ch'ejlel c pusic'al yic'ot c tijicñʌyel.
29Cha'an ti a p'ʌtʌlel mi' mʌjlel c cha'an anquese cabʌl j contrajob.
Cha'an ti jatet, c Dios, mi mejlel c tijp'el ñumel ti junwejl ts'ajc.
30Ts'ʌcʌlʌch chuqui ma' mel.
Isujmʌch i t'an lac Yum.
I mʌctʌjibʌch pejtel mu' bʌ i yʌc'ob i bʌ ti' wenta.
31¿Majqui Dios? ¿Mach ba jinic lac Yum?
¿Am ba yambʌ xuc'ul bʌ bajche' Dios?
32Jiñʌch Dios mu' bʌ i yʌq'ueñon c p'ʌtʌlel.
Mi' toj'esañon majlel tic bijlel.
33Sejb mi' mel coc che' bajche' i yoc me'.
Dios mi' cʌntañon ba' bʌbʌq'uen mic yajlel.
34Mi' cʌntesañon cha'an ch'ejl mic cha'len guerra,
Cha'an mic sʌts' p'ʌtʌl bʌ jalʌjb.
35C Yum, jatet tsa' coltayon. C mʌctʌjibet.
Ma' chucon ti a c'ʌb cha'an ma'anic mic yajlel.
Ma' ñuq'uesañon ti' yutslel a pusic'al.
36Tsa' chajpʌbeyon i yajñib coc.
Tsa' p'ʌtesa coc.
37Tsa cajñesa j contrajob, tsac tajayob.
Ma'anic tsa' sujtiyon jinto tsac laj jisayob.
38Tsac lowoyob. Ma'anic tsa' chʌn mejliyob ti tejchel.
Tsa' yajliyob ti' t'ejl coc.
39Tsa' wʌq'ueyon c p'ʌtʌlel ti guerra.
Tsa' jats'ʌ jini tsa' bʌ tejchiyob tij contra.
40Jatet tsa' wajñesa j contrajob.
Tsac jisayob tsa' bʌ i ts'a'leyon.
41Tsi' lon cha'leyob oñel. Ma'anic majch tsi' coltayob.
Tsi' pejcayob lac Yum, pero ma'anic tsi' jac'beyob.
42Tsac bic'tesa j contrajob che' bajche' ts'ubejn mu' bʌ i wujtan letsel ic'.
Tsac t'uchtayob che' bajche' i bibi'lel calle.
43Tsa'ix a coltayon loq'uel ti' tojlel jini woliyo' bʌ ti leto.
Tsa'ix a wotsayon ti yumʌl ti jujumpejt colem tejclum.
Winicob x'ixicob mach bʌ j cʌñʌyobic ti yambʌ ora wolix i melob que'tel.
44Che' mi' yubiñob c t'an, ti ora mi caj i jac'beñon.
Jini ñajt bʌ ch'oyolob mi caj i yumañon.
45Jini ñajt bʌ ch'oyolob mi' cajelob ti bʌq'uen.
Tsiltsilña mi' loq'uelob ti tejclum ba' joy ts'ajquibil.
46Cuxul lac Yum. Wocolix i yʌlʌ come jiñʌch xuc'ul bʌ xajlel yilal.
La' sujbic i ñuclel Dios mu' bʌ i coltañon.
47Diosʌch mu' bʌ i q'uextʌbeñob i mul j contrajob.
Mi' ju'sʌbeñob i pusic'al cha'an mi' jac'beñoñob.
48Jatet mu' bʌ a coltañon loq'uel ti' p'ʌtʌlel j contrajob,
Melel ma' loc'sañon ti' tojlelob mu' bʌ i tejchelob tij contra.
Tsa' pʌyʌyon loq'uel ti' p'ʌtʌlel jini jontolo' bʌ.
49C Yum, mux c sub a ñuclel ya' ti jujumpejt colem tejclum tac,
Mi caj j c'ʌyin i ñuclel a c'aba'.
50Cha'an ti jatet mi mʌjlel c cha'an,
Tsa' wa'chocoyon ti rey.
Ma' pʌsbeñon a wutslel, joñon quic'ot c p'olbalob ti pejtelel ora.
Currently Selected:
SALMOS 18: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.
