JOSUE 4
4
Jini lajchʌmp'ejl xajlel
1Che' bʌ tsa'ix lu' c'axiyob ti Jordán ja' jini israelob, lac Yum tsi' sube Josué: 2Yajcan lajchʌntiquil winicob ti' tojlel israelob, jujuntiquil ti jujunmojt israelob. 3Yom ma' subeñob: Ch'ʌmʌla lajchʌmp'ejl xajlel loq'uem bʌ ti' yojlil Jordán ja' ya' ba' tsa' wa'leyob jini motomajob. Yom mi la' ch'ʌm majlel la' wic'ot c'ʌlʌl ba' mi caj la' jijlel ti ili ac'ʌlel, che'en. 4Josué tsi' pʌyʌ jini lajchʌntiquil israelob tsa' bʌ wa'chocontiyob, loq'uemo' bʌ ti jujunmojt israelob. 5Tsi' subeyob: Cucula ti ojlil Jordán ba'an jini Arca i cha'an lac Yum Dios. Q'uechela tilel jump'ejl xajlel ti jujuntiquiletla. Yom jump'ejl xajlel cha'an jujunmojt israelob. 6Jiñʌch i yejtal ti la' tojlel che' mi' c'ajtibeñetla la' walobilob: “¿Chuqui i wentʌjlel cha'añetla ili xajlel tac?” che'ob. 7Mi caj la' subeñob: “Tsi' t'oxo i bʌ jini Jordán ja' ti' tojel Arca che' bʌ tsa' c'axiyon lojon”, che'etla. Jini xajlel tac mi caj i yʌq'ueñob i chʌn ña'tan jini israelob ti pejtelel ora, che'en.
8Jini winicob tsi' meleyob che' bajche' Josué tsi' subeyob. Tsi' q'uecheyob loq'uel lajchʌmp'ejl xajlel ti' yojlil Jordán ja', jump'ejl xajlel cha'an jujunmojt israelob. Tsi' q'uecheyob tilel c'ʌlʌl ya' ba' tsa' c'otiyob ti jijlel. Ya' tsi' ju'sayob cʌytʌl. 9Josué tsi' lʌtsʌ cʌytʌl yambʌ ti' yojlil Jordán ja' ya' ba' tsa' wa'leyob motomajob q'uechel bʌ i cha'añob jini Arca ba' lotol jini Xuc'ul bʌ T'an. Ya'to an c'ʌlʌl wʌle.
10Jini motomajob q'uechel bʌ i cha'an Arca tsa' wa'leyob ti' yojlil Jordán ja' c'ʌlʌl jinto tsa' ts'ʌctiyi pejtel i t'an lac Yum che' bajche' tsi' sube Josué. Josué tsi' cha' subeyob winicob. Tsa' ts'ʌctiyi ti pejtelel che' bajche' Moisés tsi' sube Josué. Tsa' c'axiyob ti ora jini winicob x'ixicob. 11Che' bʌ tsa'ix ujti ti c'axel pejtelel israelob, tsa' c'axiyob jini motomajob yic'ot jini Arca i cha'an lac Yum. 12Jini rubeñob yic'ot gadob yic'ot junmojt manasésob ñaxan tsa' c'axiyob, chajpʌbilo' bʌ cha'an guerra. Wi'il tsa' c'axiyob yaño' bʌ israelob che' bajche' Moisés tsi' wʌn subeyob. 13Cha'c'al ti mil soldadojob tsolocña tsa' ñumiyob majlel ti mojt ti mojt. Tsa' c'otiyob ti jini joctʌl am bʌ ti' tojel Jericó.
14Ti jim bʌ ora lac Yum tsi' yʌq'ue i ñuclel Josué. Ñuc tsi' q'ueleyob winicob che' bajche' tsa' q'uejli ti ñuc Moisés che' anto ti pañimil. 15Lac Yum tsi' yʌq'ue Josué tsiji' bʌ i mandar: 16Subeñob motomajob q'uechel bʌ i cha'añob Arca: “Loq'uenla ti Jordán ja'”. Che'ʌch yom ma' subeñob, che'en lac Yum. 17Jini cha'an Josué tsi' yʌc'ʌ mandar: Loq'uenla ti Jordán ja', che'en. 18Jini motomajob tsa' cajiyob ti letsel loq'uel q'uechel bʌ i cha'añob jini Arca. Che' bʌ tsa' c'otiyob ba' tiquin lum, ti ora tsa' cha' caji ti bujt'el jini ja'. Tsa' cha' caji ti ajñel che' bajche' ti ñaxan.
19Che' ti 25 de marzo jini winicob x'ixicob tsi' cʌyʌyob jini Jordán ja'. Tsa' jijliyob ti Gilgal ti' tojel Jericó ba' mi' bʌjlel q'uin. 20Ya' ti Gilgal Josué tsi' lʌtsʌ cʌytʌl jini lajchʌmp'ejl xajlel tsa' bʌ i ch'ʌmʌ loq'uel ti Jordán ja'. 21Tsi' subeyob israelob: Tal i yorajlel mi caj i c'ajtibeñetla la' walobilob: “¿Chuqui i sujmlel ili xajlel tac?” che'ob. 22Che' jini mi cajel la' cʌntesañob: “Ya' ba' lʌtsʌl ili xajlel jini israelob tsa' c'axiyob ti Jordán ja' che' bajche' ti tiquin bʌ lum”, che'etla. 23Come lac Yum Dios tsi' tsʌc'mesa jini ja' ti' wut israelob c'ʌlʌl tsa' c'axiyob majlel, che' bajche' tsi' tsʌc'mesa jini Chʌchʌc bʌ Ñajb ti wajali che' bʌ tsa' c'axiyonla. 24Che' jini winicob x'ixicob ti pejtelel pañimil mi caj i ña'tañob wen p'ʌtʌl lac Yum. Mi caj i bʌc'ñañob lac Yum Dios ti pejtelel ora. Che' tsi' yʌlʌ Josué.
Currently Selected:
JOSUE 4: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.