GENESIS 28

1Isaac tsi' pʌyʌ tilel Jacob. Tsi' yʌq'ue i wenlel i t'an. Tsi' yʌq'ue mandar: Mach a pʌy a wijñam ba'an i yalobilob Canaán. 2Chajpan a bʌ. Yom ma' majlel ya' ti Padanaram, ya' ti' yotot Betuel, i tat a ña'. C'ajtin a wijñam ya'i ba'an i yalobilob Labán a wichan. 3La' i yʌq'ueñet i yutslel i t'an Dios, jini Mach Bʌ Anic i P'isol i P'ʌtʌlel. La' i yʌq'ueñet cabʌl a walobilob. La' i p'olbeñet a walobilob ti mojt ti mojt. 4La' i yʌq'ueñet yic'ot a p'olbal i yutslel i t'an che' bajche' tsi' yʌq'ue Abraham, cha'an ma' ch'ʌm jini lum ba' woliyet ti poj chumtʌl, jini lum tsa' bʌ aq'uenti Abraham ti Dios, che'en. 5Che' jini Isaac tsi' choco majlel Jacob. Tsa' majli ti Padanaram ba'an Labán, i yalobil Betuel jini arameo. Labán i yʌscuñʌch Rebeca. Rebeca i ña'ʌch Jacob yic'ot Esaú.

6Tsa' caji i yubin Esaú chocbilix majlel Jacob ya' ti Padanaram cha'an mi' c'ajtin i yijñam ya'i. Che' bʌ tsi' yʌq'ue i yutslel i t'an i tat tsi' sube: Mach a pʌy a wijñam ba'an i yalobilob Canaán, che'en. 7-8Che' bʌ tsi' q'uele Esaú majlemix Jacob ti Padanaram cha'an ts'a' tsi' q'uele i yalobilob Canaán, 9tsa' majli Esaú ba'an Ismael. Tsi' pʌyʌ Mahalet i yalobil Ismael, i yalobil bʌ Abraham cha'an i yijñam. Che' añobix i yijñam, tsi' pʌyʌ yambʌ i c'aba' Mahalet i yijts'in Nebaiot.

Dios tsi' pʌsbe i bʌ Jacob

10Jacob tsa' loq'ui ti Beerseba. Tsa' c'oti ti Harán. 11Ya'i tsi' ñusa ac'ʌlel, come tsa' bʌjli q'uin. Tsi' ch'ʌmʌ jump'ejl xajlel cha'an i c'ʌnjol. Tsa' ñole ya'i. 12Tsi' cha'le ñajal. Tsi' q'uele chan bʌ tec'oñib wa'al bʌ ti lum. I jol jini tec'oñib tsi' taja panchan. I yángelob Dios woli' letsel i jubelob ya' ti tec'oñib. 13Ya' wa'al lac Yum ti' chañelal. Tsi' yʌlʌ: Joñon Yumʌlon, i Dioson Abraham a tat, i Dioson Isaac. Mi caj cʌq'ueñet yic'ot a p'olbal jini lum ba' ñololet. 14Lajal ti tsicol mi caj i yajñel a p'olbal che' bajche' ts'ubejn. Mi caj i pam pujquelob ba' mi' bʌjlel q'uin yic'ot ba' mi' pasel q'uin, yic'ot ti norte yic'ot ti sur. Cha'añet yic'ot cha'an a p'olbal mi caj i yʌq'uentelob i yutslel c t'an winicob x'ixicob ti jujunmojt. 15Añon quic'otet. Mi caj cʌntañet baqui jach ma' majlel. Mi caj c cha' pʌyet tilel ti ili lum. Ma'anic mi caj j cʌyet jinto mic mel jini tsa bʌ c subeyet, che'en. 16-17Jacob tsa' ch'ojyi ti wʌyel. Tsi' cha'le bʌq'uen. Tsi' yʌlʌ: Isujm, wʌ'an lac Yum ilayi. Ma'anic tsac ña'ta. Wʌ'an bʌbʌq'uen bʌ ilayi. Jiñʌch i yotot Dios. Jiñʌch i ti' panchan, che'en.

18Seb to tsa' ch'ojyi Jacob. Tsi' chʌmʌ jini xajlel tsa' bʌ i c'ʌnjola. Ts'ejel tsi' yʌc'ʌ. Tsi' mulu aceite ti' pam cha'an i ña'tʌntel i yutslel i pusic'al Dios tsa' bʌ pʌsbenti. 19Tsi' yotsʌbe i c'aba jini ajñibʌl Betel. I c'aba'ʌch Luz che' ti ñaxan. 20Jacob tsi' yʌc'ʌ i t'an ti' tojlel Dios. Tsi' yʌlʌ: Mi isujm añet quic'ot, mi mux a cʌntañon ti jini bij cha'an utsat mic majlel, mi mux a wʌq'ueñon waj cha'an mij c'ux yic'ot pisil cha'an mic lʌp, 21cha'an mic sujtel ti' yotot c tat ti' ñʌch'tilel c pusic'al, che' jini c Dioset, c Yumet. 22Ili xajlel tsa' bʌ c ts'ʌpʌ i wentajʌch a wotot. Ti pejtelel chuqui ma' wʌq'ueñon isujm mi caj cʌq'ueñet i diezmojlel. Che' tsi' yʌc'ʌ i t'an Jacob.

Currently Selected:

GENESIS 28: ctuBI

Highlight

Copy