EZEQUIEL 9
9
Tsa' tsʌnsʌntiyob jini xch'ujutesa dioste'ob
1Ti c'am bʌ t'an lac Yum tsi' cha'le oñel: Pʌyʌ tilel i contrajob ili tejclum, come tsa'ix cʌq'ueyob jini wʌ' bʌ chumulob. La' i ch'ʌmob tilel i ye'tijib cha'an mi' tsʌnsañob, che'en. 2Awilan ya' ti' bijlel tejclum ti' ti' ts'ajc am bʌ ti' tojel norte woli' tilelob wʌctiquil winicob. Ti jujuntiquil an i yespada ti' c'ʌb cha'an mi' cha'len tsʌnsa. Juntiquil lʌpbil i cha'an lino bʌ i pislel, joc' cʌchbil i cha'an pluma yic'ot tinta ti' cajchiñʌc'. Tsa' laj ochiyob ti Templo ba' tsa' wa'leyob ti' tojel pulʌntib melbil bʌ ti bronce. 3Awilan i ñuclel lac Yum i Dios israelob tsi' cʌyʌ jini querubiñob ba' woli' yajñel. Tsa' letsi ti' chañelal i yochib jini Templo. Lac Yum tsi' pʌyʌ tilel jini winic lʌpbil bʌ i cha'an sʌsʌc bʌ i pislel, am bʌ i pluma yic'ot tinta ya' ti cajchiñʌc'. 4Tsi' sube: Yom ma' ñumel ti' yojlil Jerusalén cha'an ma' wʌq'ueñob i marcajlel ya' ti' pam jini winicob mu' bʌ i cha'leñob uq'uel yic'ot tsic pusic'al cha'an i jontolil i pi'ʌlob, che'en.
5Tsa cubibe i t'an lac Yum che' bʌ tsi' pejca jini jo'tiquil: Tsajcanla ñumel ti tejclum. Tsʌnsanla pejtel winicob x'ixicob mach bʌ anic i marcajlel ti' pam. Mach mi la' p'untañob. 6Laj tsʌnsanla jini xñoxob yic'ot ch'itoñob yic'ot xch'ocob yic'ot alobob yic'ot x'ixicob. Tsʌnsanla ti pejtelelob jinto mi' laj jilelob. Pejtelel jini año' bʌ i marcajlel ti' pam, mach yomic mi la' tic'lan. Techela ya' ti Templo, che'en. Jini cha'an ñaxan tsi' tsʌnsayob jini lujuntiquil i chʌnc'al (70) xñoxob año' bʌ ti Templo. 7Lac Yum tsi' subeyon: Bib'esanla jini Templo. Laj but'ula ti ch'ujlelʌl jini patio, che'en. Che' jini tsa' pam ñumiyob ti tejclum. Tsi' laj tsʌnsayob jini ya' bʌ chumulob che' bajche' tsa' subentiyob. 8Awilan che' woliyob ti tsʌnsa ñumel ti Jerusalén, c bajñel tsa' cʌleyon. Tsac pʌcchoco c bʌ. Tsac cha'le oñel yic'ot c'am bʌ t'an: ¡C Yum Dios! ¿Mu' ba caj a lu' jisan pejtelel jini cʌlemo' bʌ ti Israel cha'an ti' caj wola' mich'len jini año' bʌ ti Jerusalén? cho'on.
9Tsi' jac'beyon: Wen cabʌl i mul jini año' bʌ ti Jerusalén yic'ot jini año' bʌ ti Judá. But'ul jini pañimil ti tsʌnsa yic'ot leto, come mi' yʌlob: “Tsa'ix i cʌyʌ lac Yum jini pañimil. Ma'anix mi' q'uel chuqui mi lac mel”, lon che'ob. 10Jini cha'an ma'anix mi caj c chʌn ñusʌbeñob i mul. Ma'anix mi caj c chʌn coltañob. Ti pejtelelob mi caj cʌq'ueñob wocol che' bajche' c'amel an i jontolil, che'en. 11Awilan jini winic lʌpbil bʌ i cha'an lino bʌ i pislel, jini joc'cʌchbil bʌ i cha'an junwojl tinta ya' ti' cajchiñʌc', tsa' cha' tili i sub: Tsa'ix c laj mele jini tsa' bʌ a subeyon, che'en.
Currently Selected:
EZEQUIEL 9: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.
