EXODO 33
33
Lac Yum tsi' yʌlʌ cha'an mi' loq'uelob majlel
1Lac Yum tsi' sube Moisés: Cucu, letsen ilayi, jatet yic'ot ili tejclum tsa' bʌ a loc'sa ti' lumal Egipto. Cucu ba'an jini lum tsa' bʌ c wʌn sube Abraham yic'ot Isaac yic'ot Jacob che' tsac subeyob: “Mi caj cʌq'uen la' p'olbal jini lum”, cho'on. 2Joñon mi caj c chocbeñetla majlel jini ángel ti ñaxan ti la' tojlel. Mi caj c loc'sʌbeñetla jini cananeojob, yic'ot amorreojob, yic'ot hetejob, yic'ot fereseojob, yic'ot heveojob, yic'ot jebuseojob. 3Mi caj c pʌyetla ochel ti jini lum ba' yujil colel pejtelel pʌc'ʌbʌl, pero joñon ma'anic mi caj c tem letsel la' wic'ot, come wen tsʌtsob jax i pusic'al jini israelob, ame mic junyajlel jisañetla ya' ti bij, che'en.
4Che' bʌ tsi' yubiyob ili t'an winicob x'ixicob, wen ch'ijiyem tsa' cʌleyob. Ma'anic majqui lʌpbil i ch'ʌjlil come 5lac Yum tsa'ix i sube Moisés: Yom ma' subeñob jini israelob: “Wen tsʌts la' pusic'al. Muq'uic c majlel quic'otetla ti bij mic jisañetla ti ora jach. Wʌle loc'san la' ch'ʌjlil cha'an mic ña'tan chuqui mi caj c melbeñetla”, che'en. 6Jini israelob tsi' laj loc'sayob i ch'ʌjlil ya' ti wits i c'aba' Horeb.
Jini Tabernáculo
7Baqui jach tsa' c'otiyob Moisés tsi' wa'choco jini Tabernáculo ti' junwejlel tejclum tac. Ñajt tsi' ch'ʌmʌ tac majlel. Tsi' yotsʌbe i c'aba', Jini Tabernáculo ba' mi lac Tempan lac bʌ yic'ot Dios, che'en. Majqui jach mi' sʌclan lac Yum mi' majlel ti' junwejlel tejclum ba' mi' tempañob i bʌ. 8Che' baqui ora tsa' majli Moisés ya' ti Tabernáculo, ti' pejtelelob jini winicob tsa' wa'leyob ti jujuntiquil ya' ti' ti'ob i yotot cha'an mi' q'uelob Moisés jinto tsa' c'ʌlʌ ochi ya' ti Tabernáculo. 9Che' wolix ti ochel Moisés ya' ti otot, tsa' jubi ti wa'tʌl ya' ti' tojel i ti' jini Tabernáculo, jump'ejl wa'al bʌ Tocal, cha'an mi' pejcañob i bʌ lac Yum yic'ot Moisés. 10Che' jini pejtelel jini winicob tsi' q'ueleyob jini wa'al bʌ Tocal ya' bʌ an ti' jini Tabernáculo. Ti pejtelel ora che' mi' q'uelob jini, mi' tejchelob ti' ti' i yotot cha'an mi' ch'ujutesañob lac Yum. 11Lac Yum tsi' pejca Moisés ti' wut che' bajche' juntiquil winic mi' pejcan jini cʌñʌl bʌ i cha'an. Che' jini tsa' cha' sujti Moisés ya' ti tejclum. Pero jini ch'iton Josué (i yalobil Nun), jini x'e'tel i cha'an, ma'anic tsa' sujti. Ya' tsa' cʌle ti Tabernáculo.
Lac Yum mi caj i yajñelob yic'ot
12Moisés tsi' sube lac Yum: Awilan jatet ma' subeñon: “Pʌyʌ majlel ili winicob x'ixicob”, che'et. Pero maxto anic tsa' subeyon majqui mi' majlel quic'ot. Jatet ma' wʌl: “Jatet cʌmbilet c cha'an. Wolix j q'uelet ti' yutslel c pusic'al”, che'et. 13Awilan, mi tsac taja i yutslel a pusic'al, mij c'ajtibeñet cha'an ma' pʌsbeñon a bijlel, cha'an mij cʌñet, cha'an mic taj i yutslel a pusic'al ti pejtelel ora. Ña'tan ja'el jini tejclum a cha'añʌch, che'en Moisés. 14Lac Yum tsi' jac'ʌ: Joñon mi caj c majlel a wic'ot cha'an ma' c'aj a wo, che'en. 15Moisés tsi' yʌlʌ: Mi ma'anic mi caj a majlel quic'ot, mach a loc'sañon lojon ilayi. 16Mi ma'anic tsa' majliyet quic'ot lojon, ¿bajche' mi caj i ña'tañob yaño' bʌ mi tsa' pʌsbeyon lojon i yutslel a pusic'al? Mi tsa' majliyon lojon a wic'ot, che' jini tsiquil mach lajalonic lojon che' bajche' yambʌ winicob x'ixicob ti pañimil, che'en.
17Lac Yum tsi' sube Moisés: Mi caj c mel ja'el ili tsa' bʌ a subeyon, come tsa'ix c pʌsbeyet i yutslel c pusic'al. Mij cʌñet ti a c'aba', che'en. 18Moisés tsi' sube: Pʌsbeñon a ñuclel, che'en. 19Lac Yum tsi' jac'ʌ: Pejtelel cutslel mi caj i tsictiyel ti a wut. Mi caj c tsictesan j C'aba' ti a tojlel, Joñoñʌch a Yumon. Mi caj c p'untan majqui com c p'untan. Uts mi caj j q'uel jini com bʌ j q'uel ti uts'at. 20Mach mejlic a q'uel c wut, come ma'anic mi mejlel i q'uelon winic. Mi tsi' q'ueleyon juntiquil mux i chʌmel, che'en. 21Tsi' yʌlʌ ja'el: Q'uele jump'ejl ajñibʌl tic tojlel. Jatet mi caj a wajñel ya' ti' pam xajlel tic t'ejl. 22Che' mi' c'axel c ñuclel, joñon mi caj cambeñet jini xajlel. Mi caj c moset tij c'ʌb c'ʌlʌl jinto mic ñumel. 23Ti wi'il mi caj c loc'san j c'ʌb. Mi caj a q'uel c pat, pero ma'anic mi caj a q'uel c wut, che'en jini lac Yum Dios.
Currently Selected:
EXODO 33: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.
