EXODO 32
32
Jini alʌ tat wacax melbil bʌ ti oro
(Dt. 9.6-29)
1Che' baqui ora tsi' q'ueleyob jini israelob cha'an ma'anic tsiquil woli' se' jubel tilel Moisés ya' ti wits, pejtelel jini winicob tsa' tiliyob ba'an Aarón. Tsi' subeyob: Com lojon ma' melbeñon lojon c dios, mu' bʌ mejlel ti majlel ti ñaxan tic tojlel lojon, come Moisés jini winic tsa' bʌ i loc'sayonla ti' lumal Egipto, mach la cujilic chuqui tsi' cha'le. Che' tsi' yʌlʌyob. 2Aarón tsi' jac'ʌ: Loc'sanla jini oro tac am bʌ ti' chiquin la' wijñam, yic'ot i cha'an la' wa'lobilob, yic'ot i cha'an xch'oc bʌ la' wa'lobilob. Yom mi la' ch'ʌmbeñon tilel, che'en. 3Che' jini pejtelel winicob x'ixicob tsi' loc'sayob i yuya' an taco' bʌ ti' chiquin. Tsi' ch'ʌmʌyob c'otel ba'an Aarón. 4Aarón tsi' ch'ʌmʌ jini oro tac ti' c'ʌbob jini winicob x'ixicob. Tsi' c'ʌñʌ e'tijibʌl cha'an mi' mel juncojt alʌ wacax ti oro. Che' jini tsi' yʌlʌyob jini israelob: Jiñʌch lac Dios tsa' bʌ i loc'sayonla ti Egipto, che'ob.
5Che' bʌ tsi' q'uele Aarón ujtemix i mel, tsi' melbe jump'ejl pulʌntib ti' tojel jini alʌ tat wacax. Tsi' tsictesa: Ijc'ʌl jiñʌch i q'uinilel lac Yum, che'en. 6Isujm, che' ti yijc'ʌlal, ic'to tsa' ch'ojyiyob. Tsi' ch'ʌmʌyob c'otel majtañʌl tac. Tsi' yʌc'ʌyob pulbil bʌ majtañʌl tac, yic'ot i wentajlel cha'an i ñʌch'tʌlelob i pusic'al. Tsa' buchleyob pejtelel jini winicob x'ixicob. Tsa' cajiyob ti we'el yic'ot ti lembal. Tsa' cajiyob ti ts'i'lel.
7Lac Yum tsi' sube Moisés: Cucux ti jubel, come a tejclum tsa' bʌ a loc'sa ti' lumal Egipto tsa'ix sojquiyob. 8Ti ora jach tsa' sajtiyob ya' ti bij ba' tsac pʌsbeyob. Tsa'ix i meleyob juncojt alʌ wacax ti oro. Tsa'ix i ch'ujutesayob. Tsa'ix i yʌq'ueyob i majtan tac. Tsa'ix i yʌlʌyob israelob: “Jiñʌch iliyi lac dios tsa' bʌ i loc'sayonla ti' lumal Egipto”, che'ob. Che' tsi' yʌlʌ lac Yum.
9Lac Yum tsa' to i cha' sube Moisés: Tsa'ix j q'ueleyob ili winicob x'ixicob. Ti isujm, wen tsʌtsob i pusic'al. 10Wʌle, la' to c pʌsbeñob c mich'ajel. La' quisañob. Mi caj c mel ñuc bʌ c tejclum ti a tojlel, che'en lac Yum Dios.
11Pero ti wocol t'an Moisés tsi' pejca lac Yum Dios: C Yum, mach yomic ma' pʌs a mich'ajel ti' tojlel a tejclum tsa' bʌ a loc'sa ti' lumal Egipto ti a p'ʌtʌlel. 12Come mi caj i yʌlob jini egiptojob che' ma' jisañob: “Cha'an jach mi' yʌc'ob ti wocol tsi' loc'sayob, cha'an jach mi majlel i tsʌnsañob ya' ti wits. Tsa' jach majli i jisañob ya' ti jini lum”. Che' mi caj i yʌlob. Cha' jisan i mich'ajel a pusic'al. Yom ma' cʌy jini woli bʌ a ña'tan ti' contra a tejclum. 13Ña'tan Abraham yic'ot Isaac yic'ot Israel. Jiñʌch a winicob tsa bʌ a wʌq'ueyob a t'an che' bʌ tsa' wʌlʌ: “Joñon mi caj c p'ojlesan a p'olbal, che' lajal bajche ec' ti panchan. Mi caj cʌq'ueñob la' p'olbal ili lum baqui tsa' cʌlʌ. Mi caj i ch'ʌmob ti' wenta ti pejtelel ora”. Che' tsa' wʌlʌ, che'en Moisés. 14Che' jini lac Yum tsi' cha' mele i pusic'al cha'an jini tsa' bʌ i ña'ta i mel ti' tojlel i tejclum.
15Che' jini Moisés tsa'ix jubi sujtel ya' ti wits. Tsa' caji ti jubel yic'ot cha'wejl xajlel chucbil bʌ ti' c'ʌb ba' ts'ijbubil tac jini t'an. Ti jujunq'uejl jini xajlel an chuqui ts'ijbubil ti' cha'wejlel. 16Jini xajlel i melbalʌch Dios. Jini i ts'ijbal i ts'ijbubalʌch Dios. 17Che' bʌ woli' jubel jini Moisés tsi' taja Josué. Tsi' yubi Josué i t'an winicob che' woliyob ti oñel. Tsi' sube Moisés: Woliyob ti c'am bʌ oñel che' bajche' woliyob ti guerra ya' ba' tempʌbilob, che'en. 18Moisés tsi' jac'ʌ: Woli cubin mach i t'anic jini tsa' bʌ mʌjliyob i cha'an, mi i t'anic jini tsa' bʌ mʌlbentiyob. Woli cubin woliyob ti c'ay, che'en. 19Pero che' tsa' c'oti ya' ba' tempʌbilob, tsi' q'uele ya'an alʌ tat wacax. Woli' soñiñob. Tsa' mich'a Moisés. Ya' ti yebal jini wits tsi' choco jini cha'q'uejl xajlel am bʌ ti' c'ʌb. Tsi' top'o. 20Tsi' ch'ʌmʌ jini alʌ wacax tsa' bʌ i meleyob. Tsi' yotsa ti c'ajc. Tsi' chʌmen cuju jinto che' ts'ubucña tsa' cʌle. Tsi' yotsa ti ja'. Tsi' yʌq'ue i japob jini israelob.
21Moisés tsi' sube Aarón: ¿Chuqui tsi' melbeyetob ili tejclum cha'an tsa' ch'ʌmʌ tilel ti' tojlelob ñuc bʌ mulil? che'en. 22Aarón tsi' jac'ʌ: Mach mich'aquet. Cʌmbil a cha'an ili tejclum, wen jontolob. 23Come tsi' subeyoñob: “Melbeñon lojon c dios mu' bʌ i majlel ti ñaxan tic tojlel lojon. Come ili Moisés, jini winic tsa' bʌ i loc'sayonla ti' lumal Egipto, mach la cujilic chuqui tsi' cha'le”, che'ob. 24Che' jini tsac subeyob: “Majqui an i cha'an oro, ch'ʌmʌla tilel”, cho'on. Tsi' ch'ʌmbeyoñob tilel. Tsa cotsa ti c'ajc. Tsa' loq'ui ili alʌ wacax, che'en.
25Tsi' q'uele Moisés ma'anic tsa' mejli i tic'ob winicob jini Aarón, come ma'anic tsi' tiq'uiyob che' bʌ tsa' cajiyob i cha'leñob i ts'i'lel. Tsa' wajlentiyob cha'an i contrajob. 26Jini cha'an Moisés tsa' wa'le ti' tojlelob ya' ba' tempʌbilob. Tsi' yʌlʌ: ¿Majqui an ti' tojlel lac Yum? La' tilic ba' añon, che'en. Tsa' tiliyob ba'an Moisés pejtelel levíjob. 27Moisés tsi' subeyob: Woli' yʌl lac Yum i Dios israelob: “Cʌchʌla la' wespada ti la' ñʌc' ti jujuntiquil. Ñumenla ti pejtelel tejclum. Tsʌnsanla ti jujuntiquil i yeran yic'ot i pi'ʌlob yic'ot i cʌñʌyo' bʌ”, che'en.
28Che'ʌch tsi' meleyob levíjob bajche' tsi' subeyob Moisés. Ti jim bʌ q'uin tsa' jiliyob uxp'ejl mil winicob. 29Moisés tsi' yʌlʌ: Wʌle tsa'ix la' wʌc'ʌ la' bʌ ti' wenta lac Yum ti pejtelel la' pusic'al, come ti jujuntiquil tsa'ix la' contraji la' wa'lobil yic'ot la' weran. Jini cha'an wʌle mi mejlel la' wʌq'uentel bendición ti lac Yum, che'en,
30Che' ti yijc'ʌlal Moisés tsi' subeyob jini winicob x'ixicob: Tsa'ix la' cha'le ñuc bʌ mulil. Mi caj c cha' letsel majlel ba'an lac Yum Dios. Ya' tsiquil mi tsa' mejli j c'ajtin i ñusʌbentel la' mul, che'en. 31Che' jini Moisés tsa' cha' majli ba'an lac Yum. Tsi' yʌlʌ: A wocolic, ili tejclum tsa'ix i cha'leyob ñuc bʌ mulil. Tsa'ix i meleyob dios oro.
32Wʌle yom ma' ñusʌben i mul. Mi ma'anic, yʌpʌ j c'aba' ti jun ba' ts'ijbubil a cha'an, che'en. 33Lac Yum Dios tsi' jac'be Moisés: Majqui jach tsi' cha'le mulil tij contra, mi caj c yʌpben i c'aba' tic jun. 34Wʌle, cucu, pʌyʌ majlel jini winicob ba' tsac subeyet. A wilan, ñaxan mi caj i majlel cAngel ti a tojlel. Pero che' ti' yorajlel toj mulil, joñon mi caj cʌq'ueñob i tojol i mul, che'en lac Yum.
35Lac Yum tsi' yʌq'ueyob jini winicob x'ixicob wocol, come tsi' subeyob Aarón cha'an mi' melbeñob alʌ tat wacax.
Currently Selected:
EXODO 32: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.