ECLESIASTES 2

1Tsa cʌlʌ tic pusic'al: Quila la jini tijicña bʌ. La' ñuc'ac c pusic'al, lon cho'on. 2Jini tse'tse'ña bʌ jiñʌch lac tontojlel. Jini alas, ¿chuqui i ye'tel? 3Pejtel chuqui tsi' ña'ta c pusic'al jiñʌch tsa' bʌ c taja. Tsac japʌ vino cha'an mij cʌmben i p'ʌtʌlel tic bʌc'tal. Tsac ñopo alas cha'an mic ña'tan mi che'ʌch yom melol ti yebal panchan che' cuxulon to la. 4Tsac mele ñuc tac bʌ. Tsa cʌc'ʌ ti melol cabʌl otot cha'an ya' mi cajñel quic'ot c pi'ʌlob. Tsac pʌc'ʌ ts'usub cha'an mic japben i ya'lel. 5Tsac mele parque ba' tsac pʌc'ʌ te' yic'ot nichim. Jini te' tac mi' yʌc' i wut ti chajp ti chajp. 6Tsac ts'ajquibe i yajñib ja'. Tsac melbe i bijlel cha'an mi' mujl te'. 7Tsac mʌñʌ tilel x'e'telob, winicob yic'ot x'ixicob, cha'an mi' melbeñon que'tel. Tsa' p'ojliyob i yalobilob ochemo' bʌ tic wenta. Tsa' p'ojli cʌlac' ja'el, yic'ot c wacax yic'ot c tiñʌme'. Ñumen ñucon bajche' pejtel c pi'ʌlob tsa' bʌ i cha'leyob yumʌl ti Jerusalén ti oniyi. 8Tsac tempa plata yic'ot oro yic'ot chubʌ'añʌl c'uxbibil bʌ i cha'an yumʌlob. Tsa' ch'ʌjmi tilel ti ñajtʌl. Tsac pʌyʌ tilel xc'ayob, winicob yic'ot x'ixicob. Tsac pʌyʌ ti cotot i t'ojol jax bʌ x'ixicob che' bajche' jaytiquil com. 9Che' jini tsa' ñuc'ayon. Ñumen ñucon yic'ot ñumen cabʌl c chubʌ'an bajche' pejtel jini ñuco' bʌ ti Jerusalén c'ʌlʌl ti oniyi. Chʌn yʌxʌl co, tsac p'isi ti wenta pejtel iliyi. 10Pejtel chuqui tsac mula tsac taja. Ma'anic tsac tiq'ui c bʌ che' an chuqui com. Tijicñayon ja'el che' bʌ tsac cha'le e'tel. Ma'anic yambʌ c chobejtʌbal cha'an pejtel que'tel, jini jach tsa' bʌ c taja ti' melol que'tel. 11Tsa' caji j q'uel pejtel c melbal yic'ot pejtel jini wocol tsa' bʌ c ñusa cha'an mi' joloñel que'tel. ¿Chuqui i ye'tel ti yebal panchan? To'ol ic' jach woli cʌsin.

12Tsa' caji j q'uel an uxchajp winicob: jini am bʌ i pusic'al, yic'ot jini tonto bʌ, yic'ot jini sajtem bʌ. Che' mi' chʌmel yumʌl, ¿chuqui mi caj i mel i q'uexol mu' bʌ i ch'ʌmben i ye'tel? Jini jach tsa' bʌ i mele jini chʌmenix bʌ. 13Tsa' caji c ña'tan, uts'at i sʌclel pañimil. Mach uts'atic ic'ch'ipan bʌ pañimil. Uts'at ja'el che' an lac pusic'al. Mach uts'atic che' tontojonla. 14Jini am bʌ i pusic'al mi' pam q'uel chuqui woli' yujtel. Pero jini tonto bʌ mi' cha'len xʌmbal ti ic'ch'ipan bʌ pañimil. Pero cujil ja'el, junlajal mi' yujtelob ti cha'ticlel. Mi' cajelob ti chʌmel. 15Tsa cʌlʌ tic pusic'al: Jini jach bʌ mu' bʌ i yujtel ti' tojel tonto bʌ mi' yujtel tic tojlel ja'el. ¿Chucoch tsac lon mele c pusic'al cha'an mic taj cabʌl c ñatibal? cho'on. Tsa cʌlʌ ja'el: Lolom jach pejtel jini. 16Come mi' lon jilel jini am bʌ i pusic'al lajal bajche' jini tonto bʌ. Junlajal mi caj i ñajʌyelob i cha'an winicob. Jini am bʌ i pusic'al mi' chʌmel che' bajche' jini tonto bʌ. 17Tsa' caji c mel c pusic'al. Lon cuxulon, cho'on. La' chʌmicon. Come ¿chuqui i ye'tel pejtel chuqui mi lac mel ti yebal panchan? To'ol ic' jach woli la cʌsin.

18Jini cha'an tsac ts'a'le pejtel c melbal tsa' bʌ c taja ti wocol e'tel ti yebal panchan, come wersa mi caj j cʌyben ti' wenta j q'uexol mu' bʌ caj i yochel ti cajñib. 19Mach c ña'tayic bajche' an i pusic'al jini winic mu' bʌ caj i laj ch'ʌm, mi cabʌl i pusic'al o mi tonto. Pero mi caj i yochel ti' yum pejtel c chubʌ'an tsa' bʌ c taja ti que'tel yic'ot tic ña'tibal ti yebal panchan. Lolom jach jini. 20Jini cha'an tsa' c'ojyiyon ti' melol jini que'tel. ¿Chuqui i c'ʌjñibal pejtel que'tel tsa' bʌ c cha'le ti yebal panchan? 21Come wʌ'an winic am bʌ i ña'tibal, wen yujil bʌ e'tel. Tsi' cha'le e'tel ti pejtelel i pusic'al. Tal yambʌ winic mach bʌ anic tsi' wis cha'le e'tel mu' bʌ caj i to'ol aq'uentel pejtel i chubʌ'an. Wocol jax jini. Lolom jach. 22¿Chuqui mi' tajob winicob cha'an pejtel jini wocol mu' bʌ i ñusañob ti e'tel? Mi' lon cha'leñob e'tel ti pejtelel i pusic'al ti yebal panchan. Lolom jach mi' chʌn cha'leñob che' lujbeñobix. 23Cabʌl i wocol ti jujump'ejl q'uin. Mi' melob i pusic'al cha'an wocol. Ti ac'ʌlel ja'el mi' chʌn cha'leñob tsic pusic'al. ¿Chuqui i ye'tel pejtel jini? Lolom jach.

24¿Chuqui yom mi lac mel che' jini? Yom mi lac cha'len we'el yic'ot uch'el. Yom mi' ñuc'an lac pusic'al ti la que'tel. ¿Am ba yambʌ tijicña bʌ? Tilem ti Dios pejtel jini. 25Come Diosʌch mu' bʌ i yʌq'ueñonla i tijicñʌyel lac pusic'al yic'ot i bʌl lac ñʌc'. 26Dios mi' yʌq'uen cabʌl i pusic'al yic'ot i ña'tibal yic'ot i tijicñʌyel i pusic'al majqui jach mi' q'uel ti uts'at. Pero ¿chuqui mi' yʌq'uen xmulil? Mi' yʌq'uen i ye'tel cha'an mi' tempʌben i chubʌ'an yaño' bʌ mu' bʌ i q'uejlelob ti uts'at ti Dios. ¿Chuqui mi' taj jini xmulil? To'ol ic' jach.

Currently Selected:

ECLESIASTES 2: ctuBI

Highlight

Copy