1 SAMUEL 7
7
1Jini cha'an tsa' tiliyob jini año' bʌ ti Quiriat Jearim cha'an mi' ch'ʌmob majlel jini Arca i cha'an bʌ lac Yum. Tsi' yotsayob ti' yotot Abinadab ya' ti bujtʌl. Tsi' wa'chocoyob Eleazar i yalobil Abinadab cha'an mi' cʌntan jini Arca i cha'an bʌ lac Yum. 2Junc'al jab tsa' jal'a jini Arca ya' ti Quiriat Jearim. Wen ch'ijiyemob i pusic'al jini israelob cha'an tsi' yubiyob ñajt an i Yum.
Samuel jiñʌch xcoltaya ti' tojlel israelob
3Samuel tsi' pejca pejtelel jini israelob. Tsi' subeyob: Mi ti pejtelel la' pusic'al la' wom la' cha' tsajcan lac Yum, chocola loq'uel jini dios tac mu' bʌ i diosiñob sajtemo' bʌ, jini Astarot ja'el. Chajpan la' pusic'al cha'an mi la' ch'ujutesan lac Yum. Jini jach yom mi la' c'uxbin. Melela chuqui yom. Che' jini mux i coltañetla loq'uel ti' wenta jini filisteojob, che'en. 4Che'ʌch tsi' meleyob jini israelob. Tsi' chocoyob loq'uel jini Astarot yic'ot yan tac bʌ i diosob. Tsa' caji i melob chuqui yom lac Yum. Jini jach lac Yum tsi' c'uxbiyob.
5Jini cha'an Samuel tsi' subeyob: Yom mi la' tempan pejtelel israelob ya' ti Mizpa. Joñon mi caj c pejcan Dios ti oración cha'an mi' coltañetla, che'en. 6Che' bʌ tsi' tempayob i bʌ pejtelel israelob ya' ti Mizpa, tsi' luchuyob loq'uel ja'. Tsi' beq'ueyob ti' tojlel lac Yum. Jump'ejl q'uin tsi' cha'leyob ch'ajb. Tsi' subuyob i mul: Tsa'ix lac cha'le mulil ti' contra lac Yum, che'ob. Samuel tsi' cha'le meloñel ti' tojlel israelob ya' ti Mizpa.
7Tsi' yubiyob jini filisteojob cha'an ya' tempʌbilob israelob ya' ti Mizpa. Ti ora jach jini año' bʌ i ye'tel tsa' letsiyob majlel cha'an mi' contrajiñob. Jini israelob che' bʌ tsi' yubiyob woli' letselob tilel, tsi' cha'leyob bʌq'uen. 8Tsa' caji i subeñob Samuel ti wocol t'an: Chʌn pejcan lac Yum Dios cha'an mi' coltañonla, ame jiliconla ti' c'ʌb filisteojob, che'ob. 9Samuel tsi' yʌq'ue i majtan lac Yum. Tsi' pulbe juncojt alʌ tat tiñʌme' woli to bʌ ti chu'. Tsi' pejca lac Yum. Lac Yum tsi' yubibe i t'an Samuel. 10Che' woli to i yʌq'uen i majtan lac Yum, tsa' tiliyob jini filisteojob cha'an mi' tsʌnsañob israelob. Pero lac Yum tsi' yʌc'ʌ ti t'an chajc ya' ba' woli' tilelob filisteojob. Ti pejtelelob tsa' cajiyob ti bʌq'uen. Tsa' puts'iyob ti' tojlel israelob. Tsa' mʌjliyob i cha'an. 11Jini israelob año' bʌ ti Mizpa tsi' yajñesayob majlel filisteojob. Tsi' tsʌnsayob majlel c'ʌlʌl tsa' c'otiyob ti Betcar. 12Samuel tsi' ch'ʌmʌ jump'ejl xajlel. Tsi' wa'choco ti' yojlil jini bij am bʌ ti' tojel Mizpa yic'ot Sen. Tsi' yotsʌbe i c'aba' Ebenezer (Xajlel mu' bʌ i coltañonla), mu' bʌ i yʌl ti lac t'an: “C'ʌlʌl ilayi tsi' coltayonla lac Yum”. 13Lac Yum tsi' ju'sʌbeyob i pusic'al jini filisteojob. Ma'anix ba' ora tsa' chʌn ochiyob ti' lumal israelob che' cuxul to Samuel, come lac Yum tsi' chʌn contrajiyob. 14Jini israelob tsi' cha' ch'ʌmʌyob i tejclum tac tsa' bʌ i cʌn ch'ʌmbeyob filisteojob c'ʌlʌl ti Ecrón c'ʌlʌl ti Gat. Che' jini tsi' cha' tajayob i lumal tsa' bʌ chilbentiyob. Ñʌch'ʌl tsa' ajniyob israelob ti' tojlel jini amorreojob ja'el.
15Samuel tsa' joy ñumi ti' ye'tel ti pejtel i tejclum tac israelob che' cuxul to. 16Ti jujump'ejl jab tsi' cha'le i ye'tel ti juez ti' tojlel israelob ti Betel, yic'ot ti Gilgal, yic'ot ti Mizpa. 17Tsa' cha' sujti ti' yotot ti Ramá ya' ba' chumul. Ya' tsi' cha'le meloñel ja'el ti' tojlel israelob. Ya' tsi' wa'chocobe i pulʌntib i majtan lac Yum.
Currently Selected:
1 SAMUEL 7: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.