1 SAMUEL 26
26
David ma'anic tsi' tsʌnsa Saúl ya' ti Zif
1Winicob loq'uemo' bʌ ti Zif tsa' tiliyob ba'an Saúl ti Gabaa. Tsi' subeyob: Ya'ix mucul David ti bujtʌl i c'aba' Haquila ti' tojel i tiquiñal pañimil ba' mi' pasel q'uin. 2Che' jini Saúl tsa' jubi majlel ya' ti' tiquiñal pañimil i c'aba' Zif. Tsi' pʌyʌ majlel uxp'ejl mil winicob yajcʌbilo' bʌ ti Israel cha'an mi' sʌclañob David ya' ti' tiquiñal pañimil. 3Tsa' jijli Saúl ti bujtʌl i c'aba' Haquila ti' t'ejl jini bij ya' ti' tojel i tiquiñal pañimil. Ya'an David ti' tiquiñal pañimil. Yujil wolix i sʌclan Saúl. 4Jini cha'an David tsi' choco majlel xq'uelojelob. Che' jini tsa' caji' ña'tan ti isujm lʌc'ʌlix an Saúl. 5Ti ora jach tsa' majli David ti jini wits ba' tsa' jijli Saúl. Tsi' q'uele baqui jijlemob Saúl yic'ot Abner i yalobil Ner. Jini Abner jiñʌch ñuc bʌ i yum soldadojob. Joyol Saúl ti' soldadojob ya' ba' wʌyʌlob.
6David tsi' sube Ahimelec jini heteo yic'ot Abisai (i yalobil Sarvia) i yʌscun Joab: ¿Majqui yom majlel quic'ot ya' ba' jijlem Saúl? che'en. Abisai tsi' yʌlʌ: Joñon, che'en. 7Ti ac'ʌlel tsa' ch'ojyiyob David yic'ot Abisai ya' ba' wʌyʌlob soldadojob. Wʌyʌl Saúl. Ts'ʌpʌl i cha'an i lanza ya' ti' t'ejl i jol. Ya' ñolol Abner ti' t'ejl i yum yic'ot pejtelel soldadojob ti' joytʌlel Saúl. 8Abisai tsi' sube David: Dios tsa'ix i yʌq'ueyet a contra. Jini cha'an la' c ts'ʌb jec' yic'ot jini lanza. Ti junyajl jach mi caj c jec'. Jasʌl junyajl. Ma'anic mi caj c jec' cha'yajl, che'en. 9David tsi' jac'be Abisai: Mach a tic'lan. Come jini mu' bʌ i tic'lan jini yajcʌbil bʌ i cha'an lac Yum mi caj i toj i mul, che'en. 10Tsi' cha' alʌ David: Isujm woli bʌ c subeñet che' bajche' cuxul lac Yum. Lac Yum mi caj i low. Machiqui, yʌlol jach mi' caj ti chʌmel che' i yorajlelix, o mi' caj ti chʌmel ti guerra. 11La' i tic'on lac Yum ame mic tic'lan jini yajcʌbil bʌ i cha'an. Pero ch'ʌmʌ jini lanza yic'ot jini ja' am bʌ ti' t'ejl. Conixla, che'en. 12David tsi' ch'ʌmʌ majlel jini lanza yic'ot jini ja' am bʌ ti' t'ejl i jol Saúl. Tsa' majliyob. Ma'anic majqui tsi' q'ueleyob. Ma'anic majqui cañal i wut. Ma'anic majqui tsi' ña'ta, come lac Yum tsi' yotsʌbeyob tam bʌ i wʌyel.
13Che' jini tsa' letsi majlel David ti yambʌ wits. Ñajt tsa' wa'le ti' pam jini bujtʌl. 14David tsi' yota jini soldadojob yic'ot Abner i yalobil Ner. Tsi' yʌlʌ: Abner, ¿mach ba anic ma' jac'? che'en. Che' jini Abner tsi' jac'ʌ: ¿Majquiyet mu' bʌ a wotan c rey? che'en. 15David tsi' jac'ʌ: ¿Mach ba jatetic jini ñuquet bʌ winic? ¿Mach ba cabʌlic a c'ʌjnibal ti Israel? ¿Chucoch ma'anic tsa' wen cʌnta jini rey? Come tsa' tili winic i tsʌnsan a yum, jini rey. 16Ili tsa' bʌ a mele mach uts'atic. Isujm woli bʌ c subeñet che' bajche' cuxul lac Yum. Mi caj a chʌmel, come ma'anic tsa' wen cʌnta jini rey yajcʌbil bʌ i cha'an lac Yum. Q'uele wʌ'an tij c'ʌb i lanza jini rey yic'ot i buxil i ya'al tsa' bʌ c chilbe. Che' tsi' yʌlʌ David.
17Saúl tsi' cʌmbe i t'an David. Tsi' yʌlʌ: ¿Mach ba jinic a t'an calobil David? che'en. David tsi' jac'ʌ: Joñon cu c yum, reyet bʌ c cha'an, che'en. 18Tsi' cha' alʌ: ¿Chucoch woli a wajñesañon? ¿Chuqui tsac tumbeyet? ¿Am ba chuqui jontol tsac melbeyet? 19Jini cha'an mij c'ajtibeñet ti wocol t'an, ñich'tʌbeñon. Mi jiñʌch lac Yum tsa' bʌ i chocoyet tilel tij contra, la' i ch'ʌm i majtan tic tojlel. Pero mi jiñobʌch winicob tsa' bʌ i chocoyet tilel cha'an ma' tsʌnsañon, la' chojquicob loq'uel cha'an lac Yum. Come woli' chocoñob loq'uel tic lum yic'ot ti' tojlel c pi'ʌlob i cha'año' bʌ lac Yum. Woli' xic'oñob cha'an mic majlel c ch'ujutesan yan tac bʌ dios. 20Mach yomic mic tsʌnsʌntel ti yambʌ lum ba' mach cʌmbilic lac Yum. I rey israelob wolix i sʌclan ñumel ch'ʌc yilal che' bajche' winicob mi' sʌclañob xchʌlʌl ti mate'el. Che' tsi' yʌlʌ David.
21Saúl tsi' jac'ʌ: Tsa'ix c cha'le mulil. Sujten, calobil David. Ma'anix mi caj c tic'lañet, come sajmʌl tsa' pʌsbeyon i yutslel a pusic'al. Tontojon. Ñucʌch c sajtemal, che'en. 22David tsi' jac'ʌ: Wʌ'an a lanza. La' tilic juntiquil a winic cha'an mi' ch'ʌmbeñet majlel. 23Lac Yum mi caj i yʌq'ueñob i majtan jini tojo' bʌ winicob xuc'ulo' bʌ i pusic'al. Sajmʌl lac Yum tsi' yʌc'ʌyet tij c'ʌb, pero joñon ma'anic tsac letsa j c'ʌb ti a contra, come yajcʌbilet i cha'an lac Yum. 24P'isi ti wenta chuqui tsac mele. Ma'anic tsac tsʌnsayet. La' i p'untañon c Yum che' bajche' tsac p'untayet cha'an chʌn cuxul mi cajñel. La' i yʌc'on ti colel ti pejtelel wocol, che'en David. 25Saúl tsi' sube: Tijicñayet, calobil David. Come ti isujm mi caj a cha'len ñuc bʌ a melbal. Mi caj i mʌjlel a cha'an, che'en. Che' jini David tsa' majli ti' bijlel. Saúl tsa' sujti ti' yotot.
Currently Selected:
1 SAMUEL 26: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.
