San Mateo 24

Midi'zh Jesús, lë' yado' Jerusalén bil

(Mr. 13:1-2; Lc. 21:5-6)

1Or nzharo' Jesús le'n yado', nguzubi pla rë men che'n Me lo Me, nzhab bixa', tatu chul yado' re', kun más rë yo' che'ne, 2per nzhab Jesús:

―¿Chi niwi' go por chule? Walika kwa'n nin, lë' zhë zhin, ni tu rë ke kwa'n nakxao'we re', naya'nte tich weche; rëi bil.

Rë señ kwa'n gak or jwaltra' lox yizhyuo

(Mr. 13:3-23; Lc. 21:7-24; 17:22-24)

3Or nzha bixa' yek lom kwa'n lë Olivos, dub nzob Jesús ze', lë'chi nguzubi nab rë men che'n Me lo Me, par nzhab bixa' lo Me:

―Bine go lo no, ¿pok gak rë kwa'n midi'zh go ba'?, no, ¿kwan pa' yo yizhyuo or nzhazhin la yë'd go xtu wëlt yizhyuo?, mbaino, ¿kwan pa' gak yizhyuo or nzhazhin la loxe?

4Orze' nzhab Jesús:

―Neu nakide men go, 5lë' nayax men yo xa' di'zh: “Na nak Krist”, no nayax men kide bixa'. 6Rë plo gon go kidil men, per yent kwan zheb go, lë' rë kure' naki'n gak per jwalt ra' lox yizhyuo. 7Lë' tu gubier dil kun xtu gubier, no tu yezh kun xtu yezh dil, mbaino rë plo yo yalwin no win xo. 8Per laore lo yalne re', kwa'n yo yizhyuo re', nela yalne kwa'n nine tu una' gal xin ga'.

9’Lë' men zen go no wei' bixa' go lo rë gustis; lë' bixa' gut go, mbaino rë men yi' ne go por nak go men da. 10Le'n rë zhë ze', nayax men da nayilat ra' bixa' da, mis lë' bixa' chi más bixa' par gut rë xa' nak zhi'n bixa', mbaino yi' bixa' ne bixa' wech bixa'. 11No nu yo nayax men, xa' chigab walika tu profet xa' nidi'zh por Dios, mbaino kide bixa' nayax men. 12No por dox yar rë xa' la' ley che'n Dios tu lad, por nayi'lazh bixa', kuze' nayax men la' nazinet ra' laxto' bixa' men. 13Per xa' zo naye lo kwa'n ñila xa' Da dub nzhak rë kure', xa' re' gap yalnaban dubta' kun Dios, 14no dub yizhyuo, yadi'zh men xmod yo men plo nile' Dios mandad, nes par gon rë lo ben mene, orze' lox yizhyuo.

Or gak kure', ñal kë' men karre

15No nu nzhab Jesús:

—Se' mizobni' profet Daniel. Tu ngubizh lë' men yala' tu gon dox gat nambet le'n yado' che'n Dios plo más nazhon. Xa' go'l kure' naki'n zobyek xa'i. 16Orze' rë men xa' nzho lazh men Judea, naki'n kë' bixa' karre, bi bixa' dan, 17no rë xa' nikë yek yo' le'n rë ngubizh ze', naza't la bixa' par ko' bixa' rë che'n bixa' le'n yo'; 18no rë xa' nzo dan, naza't yubre bixa' lizh bixa' yaka' bixa' xab bixa'; 19mbaino rë una' nakxin no rë una' naka' më'do' rë zhë ze', zhe'b nalats nzha bixa'. 20Bina'b go lo Dios par nagak kure' rë mbëo' nayag, no ni zhë kwa'n nayi' kë men zhi'n, 21porke dox nazhe'b kwa'n ne men rë zhë ze', rë kwa'n lalta' nagat ne men dizde nguiuxkwa' yizhyuo, no ni nayora' ne mene. 22Chi lë' Dios nakwë'zt ra' rë kure', rë zhë ze', orze' yot men le' gan loi; per lë' Dios le' kwë'ze, por rë xa' ngule Dios, nak men che'n Me.

23’No chi cho ne lo go, le'n rë ngubizh ze': “Biwi' go; lë' Krist nzo re'”, o “Lë' Krist ba'”, nayilat goi. 24Lë' nayax men yo, kide bixa' men, gab bixa' lë' bixa' Krist, no nu gab bixa', nidi'zh bixa' por Dios; haxta le' bixa' nayax rë kwa'n chigab nazhon par kide bixa' men, no haxta nu rë men xa' ngule Dios gak men che'n Me, nzho rriez kide bixa'. 25Biwi' go, nes par or gak rë kure', non la goi (nane la goi). 26Kuze', chi cho ne lo go: “Biwi'u, lë' Krist nzo le'n yuo bizh”, nayilat goi; o chi ne bixa' lo go: “Biwi' go, lë' Me nzo le'n yo' re'”, nayilat ska goi, 27porke nela or nine men nzha' tu do'zi', niziniy tu lad no xtu lad lo yibë', se'ta' ne rë men or yala. 28Nela or nine men tu plo nidal ngulbech, ze' sigur ka nax tu ma ngut.

Or yë'd Krist xtu wëlt yizhyuo

(Mr. 13:24-37; Lc. 21:25-33; 17:26-30, 34-36)

29’Or lox rë yalzi kwa'n yo yizhyuo, orze' tuli ka kao lo ngubizh, no nazinit ra' mbëo', mbaino rë mbël lo yibë' gab; no haxta xiz rë kwa'n nzho lo yibë'. 30Orze' luxo'b señ che'n Xga'n Dios Me nu nak tu men yizhyuo, rë ben men yizhyuo go'n di zheb or ne bixa' yala le'n xkao par len mandad lo rëi, kun biani ro che'n yalnazhon da. 31No or yen kwezh tu trompet nayë, xëla rë ganj Da par kan rë men ngulen dap lad lo yizhyuo, dizde tu ro' haxta xtu ro'.

32’Or niwi' go lo ya nzhao' nzë bixiche, nane la go, lë' mbëo' nëi' nzhazhin. 33No se'ga', or ne go kiyak rë kwa'n yizhyuo; lë' go nane la, lë'da nzhazhin la yal; nzo la ro' yo'. 34Walika kwa'n nin lo go, rë kure' gak antis dike gat rë men xa' nzho orze'. 35Yibë' no yizhyuo lë'i lox; per widi'zh da, par dubta' yoi. 36Per rë ngubizh or gak rë kwa'n yizhyuo, yent cho nanei; ni rë ganj yibë', no ni Na; tugaka Xuza nane poke.

37’No nela rë zhë or miban Noé, se'ta' gak zhë or yala. 38Le'n rë zhë ze', or naga la yiu nazhe'b, ndao men, ngu' men, ngok jwandang che'n men, no miza' men xcha'p men ngok jwandang che'n haxta zhë or nguio Noé le'n yo'ya, 39no ni xigab nangale' bixa', lë'chi ngula yiu nazhe'b, milo'xe rë nak bixa'; se'ska rë men nal re', ni xigab nale' bixa', lë'chi ne bixa' ruxo'ba. 40Le'n rë zhë ze', chop miyi' nzo dan; tu miyi' wë̱i̱ñ, lë' xtu miyi' ya'n; 41o chop una' kiyo; tu una' wë̱i̱ñ, lë' xtu una' ya'n.

42’Kuze' bikina go go, porke nanet go, zhë or yala. 43Per nane ka go, chi tu xa' nak lizh tu yo', nzhon xa' cho or yo wa'n lizh xa' yë'l, lë' xa' kina par yent cho liwa'n lizh xa'. 44Kuze' bikina go go, porke lë'da yal zhë nale't go xigab.

Mos wen no mos nakap

(Lc. 12:41-48)

45’Lë' go nane ka, tu mos nzhon di'zh no natsin; or nizo xa' nile' mandad mos re' par kina lizh xa', no za' mos re' kwa'n gao más tsa' mos xa', 46wen nzha mos re', or yëk xa' nile' mandad xa', lë' xa' ne, kile' ka mos re' kwa'n ñal le' xa'. 47Walika nin lo go, lë' xa' la' rë nak kwa'n kinu xa' lizh xa' ya' mos. 48Per chi lë' mos re' gak tu mos nakap, gab mos: “Lë' xa' nile' mandad da nayë'd gat”, 49orze' zublo mos za' lao' más rë tsa' mos xa', mbaino zo xa' xid rë nguy par gao xa' no go xa' kun rë nguy, 50no xa' nile' mandad ze' yë'd or nale't mos re' xigab, 51orze' dox zakzi xa' mos re', no xë'l xa' mos plo nzho rë men nikide men; ze' go'n mos di yalne, haxta kwezh lëi mos.

Currently Selected:

San Mateo 24: zca

Highlight

Copy