MARKUS 5

Yésus a Ezuʼu

(Mt 8:28-34; Lk 8:26-39)

1Ane be nga dañ e kindiʼi mañe ya yat, e si bôte ya Gérasa. 2Wôna a ngenane foʼo a suse éfunga, été été ane môt éziñ a nga zu tôbane nye a beʼe mbia nsisim , a soʼo mesoñ. 3E ne a nga bili étabaʼa e mebôm mesoñ été wé, a teke avale ngôkob môt a mbe ngule ya tiñeti nye, 4amu na, biyoñe biyoñ, be nga tiñeti nye a minkole bityé a bengôkop, ane a nga mane té bengôkob a tyiʼi minkole bityé, teke foʼo fe môt éziñ a nga bili abime ngul a ne teʼe nye. 5Nté alu a nté môs a mbe a kele a bam e mesoñ a minkô, a kele a tene nyôle jé a balé émien meveñ a mekok . 6Eyoñ a yeneya Yésus a zaʼa ôyap, ane a nga bumu mbil a ke kute nye meboñe si, 7e nde a nga bôé angônda mvam , nye na: Bia wo bi ne za ajôô, a Yésus Mone Zambe a dañe nkôñe yôp? ma vu wo soñ, e jôé Zambe, te wo nembane ndeñele ma. 8Ane Yésus a nga jô nye na: A mbia nsisim Kôlôʼô be môte nyô! 9Yésus a sili fe nye na: O ne jôé ne za? ane a nga yalane nye na: Ezuʼu, e nye a ne jôé dam, amu bi ne abui! 10E nde nsisime te ô nga yeʼelane nye abui abui na a bo te titane be na be kôlô afôla si te. 11Nde beta mbame bengôé ki a mbe valé, a kele a di mfaʼa nkôl ô mbe. 12E nde be nga yeʼelane nye, a jô na: Lôme njaʼa bia e mbame bengôé, bi ke nyiine été. 13Ane a nga meʼete; mimbia minsisim ve mane kui atan, mi ke nyiin e bengôé. E nde mbame bengôé ô nga yôô édoʼo yee été a ke ku e mañ, tañe bengôé toyini ébaé, ane be nga mane wu e mendime me mañ été. 14E nde bôte be mbe be baʼaleʼe bengôé be nga mane tup, be ke kate foé éte e tison, a minlam minlam. Ane bôte be nga ke yene jam ebien e nga boban. 15Ane be nga ke be Yésus, be yene fe môta mimbia minsisim a to tôtoo, a beʼe ngômesan, a mbili fek, e môt a nga beʼe ézuʼu minsisim! Ane be nga ko woñ. 16E bôte be nga yene jame te a mis, be nga kañete be étua jam é nga bo môta mimbia minsisim a bengôé. 17E nde be nga yeʼelane Yésus na a ke ôyap, a dañe minné mi si miap. 18Eyoñ a dañeya éfunga été, ane môta mimbia minsisim a nga yeʼelane nye na baa nye be ke. 19Ve Yésus a nji kañese. Ane a nga viane jô nye na: Kele nda jôé, e be bôte bôé, ô kate be foé ya bitua bi mame Nti a nga bo wo, a abim a nga wôʼô wo éngôngo. 20Eyoñ a keya, a tebe ñhe na a ke a kañete e si ya Dékapôl, bitua bi mam Yésus a nga bo nye, ane bôte bese be nga dañe foʼo semé.

Yésus a saé minga a wômôlô fe ngone Yairus

(Mt 9:18-26; Lk 8:40-56)

21Eyoñ Yésus a dañeya éfunga été a ke kindiʼi ôsôé ya yat, ane ndulu bôt a nga zu tôkan e vôm a mbe e nsaʼa mañ. 22E nde njôô nnene wua ya aba Zambe a nga zu, a to jôé na Yairus, ayen a nga yene nye, ane a nga ku nye mebo si, 23a nga yeʼelane nye abui a jôʼô na: Ngo jam é ne abé abé, zaʼak, ô beté nye mo, a bo mvoʼé , a nyiñ. 24Ane baa nye be nga ke. Bizuʼu bi bôt ve ke bia tôñe nye, be boʼo nye yemeyeme a bametane nye. 25Nde minga éziñe kik a nga to été a kone nlôte metyi, nté mimbu awôm a mibaé, 26a juʼuya a mintaé ya ke a saéban e be besaé bôt abui, moné wé ase a maneya foé, teke foʼo yene mone mvolan, ôkon ve viane yaʼa yak. 27Eyoñ a wôʼôtaneya Yésus, nde a nga ke nkunda bôt été, ve ke kuu Yésus mfaʼa ya mvus, a nambe nye ngômesan. 28Amu a mbe a jôʼô na: Nge ma nambe nye jaʼane ve mengômesan étam, ma ye bo mvoʼé . 29Ane nlôte metyi ô nga tyiʼi nye été été, a émien a nga wôʼôtan e nyôl jé été na a yeteya mfaʼa ya ébubua ôkone jé. 30Eyoñe te Yésus a nga wôʼôtan été été na ngul éziñ é ne nkôlan e be nye, a nga tyiñelan ñhe e bôt été, a sili na: Za nye a te nambe mengômesane mam? 31Ane beyéʼé bé be nga jô nye na: Ye abime bôt wo yen e bametaʼane wo di, éyoñe te wo jô na: Za nye a te nambe ma? 32A nga ke a fombô mbômaʼane na a yene minga a ne mboone jame té. 33Minga a nga ko ñhe woñ, a fôʼôbaʼan a benyeñenyeñ, éyoñ a yemeya jam e nga boban e be nye. Ane a nga zu a kute meboñe si asu Yésus a mane kate nye bebela ase. 34Ane Yésus nga jô nye na: A ngo jam e mbunane wôé ô nyiiya wo; kele ñhe mvoʼé , ébubua ôkone jôé é yeteya. 35A ngenan a kobôʼô nalé, bôte be nga so e be njôô nnen ya aba Zambe a jô na: Ke ngo jôé é wuya, jé foʼo wo beta zu ndeñele Ñyeʼele? 36Eyoñe Yésus a wôʼôya jam be nga bo be kobôʼô, e nde a jô njôô nnen ya aba Zambe na: Te ko woñ éziñ, ô bi jôme jia ve mbunan. 37E nde a nga bo teke kañese na baa môt éziñ be ke, vengevenge ve Pierre baa Yakob, a Yôanes, monyañe Yakob. 38Eyoñ be nga ke kui e nda be njôô nnen ya aba Zambe, a nlôô abui éngôngôm: A bôt ba yi du, a ba ba yôn tyiñ e yôb été abui; 39ane a nga nyiine nda été a jô be na: Jé mia bo abim éngôngôme di, jé ke mia yôn? mongô a nji bo ñwuan, a ke zezé ôyo. 40Ane bôt be nga kpweʼele nye a bo nye éwoé vioé. E nde a mane titane bôte bese a nyoñe ve ésaa mongô baa nyia, a bôt ya nsamba wé, a tulane vôme mongô a nga bôô. 41Ane a nga bi mongô e wo a jô nye na: Talitha koumi nalé a tinane na: A mona minga, wo ma jôô nye, veʼe ôyo! 42Eté été, ane mona minga a nga kôlô si a tebe tetele, a nga ke a wulu, amu a mbe mimbu awôm a mibaé. Ane bôt be nga semé beta nseman. 43E nde a nga bendé be nya mbendane na, étyi, môt a boʼo teke yeme jame te, a jô fe na be ve mongô jôm ya di.

Currently Selected:

MARKUS 5: BULU09

Highlight

Copy