MARKUS 4

Nkana mmiase mvoñ

(Mt 13:3-9; Lk 8:4-8)

1E nde a nga beta taté na a yeʼele bôt e nsaʼa mañ. Ane jama bôt a nga tôkan e vôm a mbe, ane a nga jibi bet éfunga été a ke tabe mendime yôp, ndulu bôt ase nyuna ki a too e kindik a fombôʼô mañ. 2A nga yeʼele ñhe be abui mam a minkana. E ñyeʼelane wé été, a mbe a jôʼô be na: 3Vôʼôlaʼan! mmiase memvoñ a nga ke a miase fes. 4A nga bo na, éyoñ a kele a miase nalé, fese éziñ é nga ku e mfôme zen , ane anon e nga so a mane di je. 5Ane fese fok é nga ku e si mekok , e vôm a mbe tekeʼe metek abui, e nde fes éte é nga jiʼa faa; amu teke mfañ afib tyia. 6Eyoñe vian ô nga faé, ane fes éte é nga mane viele, a amu é mbe teke minkañ, e nde é nga mane dik. 7Fese fe é nga ku e minsiniʼi été, ane minsinik mi nga bet a yandan je yôp, e nde é nga bo teke ve bibuma. 8Fese foʼo kik é nga ku mbamba si, ane é nga faa a yaé a ve bibuma, é nga wum, fese jia bibuma mewôm mela, fese éziñ mewôm mesaman, foʼéziñ ntet. 9E nde ñhe a zu jô na: E môt a beʼe melo ya wôk, a wôʼôk!

Amu jé Yésus a yeʼele a minkana

(Mt 13:10-17; Lk 8:9-10)

10Eyoñe Yésus a liʼiya étam, e nde bôt be nga too nye mbômaʼane baa be beyéʼé awôm a bebaé ba zu sili nye ajô minkana mite. 11Ane a nga jô be na: Mia e vebaneya na mi yem ndimba mam ya éjôé Zambe. Ve mfaʼa ba ya atan, ba kobô be mam mese ve a minkana, 12ajô te ba ye fombô

na be yen,

ve teke yen

ba ye vôʼôlô

na be wôk,

ve teke wôk,

be za kôñelan minlem

a nyoñe njaman .

13Ane a nga jô be na: Mi ne teke wôʼô nkana wu amu je? E nde mia ye yeme wôʼô minkana mivoʼo mise aya?

Nkana mmiase mvoñ wo tinan aya

(Mt 13:18-24; Lk 8:11-15)

14E môt a miase mvoñ a miase Mejô me Zambe. 15E ba ya vôm fes é nga ku e mfôme zen , e mbe be ne na, éyoñ be wôʼôya Mejô me Zambe, Satan a soé été été, mejô ba te miase be e minlem, a jiʼa zu té me si. 16Avale te fe e ba ya fese be nga mias e si mekok , e mbe be ne na, éyoñe be maneya wôʼô Mejô me Zambe, ba nyoñe me avô a mevak; 17ve mbôl bebien be nji bi minkañ, amu be ne bôt bʼandôn, éyoñ minjuk a ékpweʼele bi soya amu Mejô me Zambe, ba ku foʼo si été été. 18Bana mbe be ne bôte ya fes be nga mias e minsiniʼi été: Balé bete be ne na, éyoñe be maneya wôʼô Mejô me Zambe, 19minjuʼu ya si ndôn a meduʼane ya akume si a minkômbane ya mame mevoʼo mese, bi jaé be nlem ne lut, a mane yametane mejô mete, me ntoo ñhe teke fe awumi ébuma. 20Bana kik be ne bôte ya fes be nga mias mbamba si: E ba bese ba wôʼô mejô me Zambe, be nyoñe me, be nga wume ñhe, bibuma fes éziñ mewôm mela, foʼéziñ mewôm mesaman, nyô fok ntet.

Ye lambe a tetebe éwolo si

(Mt 5:15; Mt 10:26; Lk 8:16-18; Lk 11:33; Lk 6:38)

21Ane a nga jô be na: Ye ba zuu lambe na a tebee tawôlô si, nge ke énoñe si? Ye sa na a tebe ételé belambe yôp? 22Teke jam éziñ e solô da ye bo te kui atan; a teke jôm éziñ be ne solé, ja ye bo te kui éngengeñ. 23Nge môt éziñ a beʼe melo ya wôk, a wôʼôk.

24E nde fe a jô be na: Mi tukaʼa fas e jôme mia wôk. Ovek mia ye veʼe wô ñwô fe ba ye veʼe mia, abet da ye fe kôʼôlane mia yôp. 25Amu na e nyô a bili e nye fe ba ye beta ve; a e nyô a nji bi, ba ye vaa nye jaʼane mon abim a bili.

Mvoñ ja yaé, môte teke yem

26Ane a nga jô fe be na: Ayoñ Zambe e ne aval ane môt a wua mvoñ e si. 27Toʼo nyʼa ke ôyo, toʼo ke a vee, a alu a môs , fese ve faa, é nga yaé éyoñe nye a nji yem. 28Si ébien ja vu bidi, a taté kaé, akui abam, akekui ndu fes ya abam été. 29Ane ébuma é tôlôbô, be jiʼa daa meyo me fa, amu éyoñ ya mekoé é kpwaaneya.

Nkana fes ôndôndôô

(Mt 13:31-32,34-35; Lk 13:18-19)

30E nde fe a beta jô na: Jé foʼo bi ne funane jee ayoñe Zambe? Nge ke na bia ye veʼane de a za nkanaa? 31E ne aval ane fes ôndôndôô. Eyoñe ba bé je e si, é ne tyôtyoé é lôte mefese mese ya si nyô. 32Ve éyoñe be béya je, ja bet a ke e yôp alôte bibébéé bise, é nga biaé fe beta mintyap, abim ane anone ya yôb e ne lôñe mumbaʼa e éjijine jé. 33A zen ya abui minkana avale te, e nje a mbe a kate be Mejô me Zambe ane be ne tuʼa yeme wôk. 34A nji kobô be teke ku minkana. Ve éyoñ baa beyéʼé be liʼiya étam, a mbe a timiʼine be mam mese.

Yésus a jeʼe ôkôs

(Mt 8:23-27; Lk 8:22-25)

35Môs ôte, valé ngôʼé é nga bo, e nde a jô be na: E ndañekan e kindiʼi yat. 36Ane be nga liʼi ékoone bôt, be ve kee nye éfunga a nga too été, bifunga bife bi mbe fe nsamba té. 37E nde mbia ngul ôkôs a nga taté na a vuñ, mintyôa mi nga sembe éfunga été, éfunga é nga ye ñhe jaé a mendim. 38Nye ki a bôô ôyo e mvus éfunga, nlô ô bete ébônga. E nde ñhe ba ke vele nye a jô nye na: A Ñyeʼele, ye ô ne teke bisi nge bia mane jañ? 39Ane a nga vee ôyo, a sa évuñulu mvam , ne tiñ, a jô mañ na: Tabeʼe évô, boʼo ne mieññ! E nde évuñulu é nga tebe, mañ ve bo ne mieññ. 40Ane Yésus a nga jô be na: Mia ko woñ abime di amu jé? Amu jé mi ne tekeʼe mbunan? 41Ane be nga dañe ko woñ, be nga ke fe ba sili na: Nyuna nye ñhe a ne za? amu jaʼane évuñulu, a mañ bi ve wôʼô nye?

Currently Selected:

MARKUS 4: BULU09

Highlight

Copy