MARKUS 3

Yésus a saé môt e môse Sabat

(Mt 12:9-14; Lk 6:6-11)

1Ane Yésus a nga beta zu nyiin aba Zambe été. Môt éziñ a mbe valé, wo ô too nye ñyemelan. 2Be nga bole ñhe na be yen, nge a ye kôme saé nye e môse sabbat, éyoñe te ba bi jame ya boʼolô nye. 3Ane a nga jô môt a mbe nkôte wo na: Kôlôʼô si, zaʼa zañe bôt va. 4E nde fe a jô be na: Jé ja yian e môse sabbat, ye bo mbamba jam, ye bo mbia jam, ye nyii môt, ye wôé môt? Ane be nga langane bivô. 5E nde éyoñ a nga mane bômane lôbô be a ayok, nleme mintaé a ôlun amu ayete minleme dap. Ane a nga jô môt ate na: Same wo, ane a nga sam, e nde wo ô nga bo nye mvoʼé . 6Ane Befarizieñ a bôte ya ngame Hérôde be nga mane kui atan été été, a bo émoʼo avale be ne wosane nye a jañele nye ékok.

Yésus baa ndulu bôt

(Mt 4:24-25; Mt 12:15-16; Lk 6:17-19)

7Ane Yésus baa beyéʼé bé be nga tame wondé a ke nsaʼa mañ, ane nkunda bôt ô nga ke so e Galilé wô nga ke wo tôñe nye. E nde fe, ataté Yudé, 8Yérusalém a Idumé a kindiʼi Yordane ya yat, a mbômaʼane Tir baa Sidoñ, éyoñe bôte be wôʼôtaneya mam Yésus a mbe a boʼok, ane beta nsamba bôt a nga zu be nye. 9Ane a nga jô beyéʼé na be kômesane nye éfunga, jama bôt a za zu bametane nye a bo nye yemeyeme! 10A nga bo ñhe abui bôt mvoʼé , ane ndulu bôt a nga ke buʼi a zu be nye, e ba bese be nga bili akon, be jeñe na be nambe nye. 11A mimbia minsisim, éyoñe mi yeneya nye, mi nga ku si asu dé, a yôtane na: Wo, ô ne foʼo Mone Zambe. 12Ane Yésus a nga bame minsisime mite a abui ayok, na mi bo teke kulane nye.

Yésus a telé Beyéʼé awôm a bebaé

(Mt 10:1-4; Lk 6:12-16)

13Ane Yésus a nga bet e nkôle yôp, a loon e ba émien a nga kômbô, ane be nga zu be nye. 14E nde a nga telé Beyéʼé awôm a bebaé na baa be be be tabee a na e mbe a lôm, be ke ba kañete Mbamba Foé, 15be nyoñe fe ngule ya titane mimbia minsisim. 16Ane a nga telé Beyéʼé awôm a bebaé, a yôlé Simon jôé afe na Pierre, 17Yakob, mone Zébédé, baa Yôanes monyañe wé, e mbe ki a nga yôlé na Bôanerge, nalé a tinane na bone be zoʼoyañ, 18a André baa Filip, Bartélémi baa Metias a Thomas, Yakob mon Alfé, Thaddé baa Simon ya Kana, 19a Yudas Iskariôt, e nyô a nga koñe nye.

Yésus baa Bélzébul

(Mt 12:22-32; Lk 11:15-23; Lk 12:10)

20E nde Yésus a nga ke e nda . Ane jama bôte fe a nga beta sulan, be ntoo teke adii bidi. 21Eyoñe bôte bé be wôʼôya nalé, ane be nga so na ba zu bi nye a ngul; amu be mbe be jôʼô na a ntoo teke fek. 22Beyeme bekalate ki be nga so e Yérusalém, mfaʼa ya nkôle yôp, be mbe be jôʼô na: A bili Bélzébul abum été, a na e ngule njôô mimbia minsisim e nje a titane je mimbia minsisim. 23E nde ñhe a nga loone be, be subu nye bebé, a nga kobô be a minkana. Nye na: Aval avé Satan a ne ngule ya titane Satan? 24Nge éjôé ja salé zañ a kandane mengame-mengam a wosan a ébien, éjôé éte é se ngul ya tebe. 25A nge nda bôt ja kaban mengame-mengam a wosan a ébien, nda bôt éte é se ngul ya tebe. 26Ajô te, nge Satan a tebe na a wosan émien, a mane kandane mengame-mengam, a se ngule ya tebe, amu e maneya mfaʼa wé. 27Amu na môt éziñ a se ngule ya nyiin e nda be ngungule môt, a nga sa nye biôm, nge teke taté bi ngungule ôte a mane kaʼa wô ngataʼa, éyoñe te nje a ye sa nye nda . 28Ma kate foʼo mia bebela na, bone be bôt ba ye nyoñe njaman ya mam abé mese a minkobô mi ébiasé mise, abim ese ba ye kobô Zambe, 29ve e nyô a ye kobô Mfufub Nsisim ébiasé, a se ngul ya bi njaman akekui nnôm éto, 30a beʼeya mekua me nsem ya nnôm éto. Amu ajô be mbe be jôʼô na: Ke a bili mbia nsisim .

Beza be ne nda bôt Yésus?

(Mt 12:46-50; Lk 8:19-21)

31Ane nyia wé baa be bobenyañ be nga so, be ntele nseñ, e nde be nga lôme bôte na be ke nye loon. 32Nkunda bôt ô nga too nye mbômaʼane nyô. Ane be nga kate nye na: Nyua baa be bobenyoñ be tele e nseñ ba, ba yi wo. 33Ane a nga yalan a sili be na: Za a ne nyia wom, a bobenyañe bam be ne beza? 34E nde a nga fombô bôte be nga to nye mbômaʼane, nye na: E nyia wom, a bobenyañe bam e mbe ñhe ba: 35E môt ase a bo nkômbane Zambe, e nye a ne ma monyañ, nge ka, nge ke nyia.

Currently Selected:

MARKUS 3: BULU09

Highlight

Copy