MARKUS 2

Yésus baa mbôbôk ya Kapernawum

(Mt 9:1-8; Lk 5:17-26)

1Eyoñe bone melu be lôteya, e nde a nga beta so e Kapernawum. Foé é kele fe na a nto e nda . 2Ndulu bôt a zu ñhe ngunubu, teke fe atelé abo, jaʼane mbé yôp. A nyoñe ñhe nkobô a nga kate be mejô me Zambe. 3E nde ba zu soo nye mbôbôk, bôte benyin be beʼe wô. 4Mbôle be mbe teke zen ya zu kui vôm a nga too amu ndulu bôt, e nde be nga sôʼandile nda e zia a nga too, a suu ôkala mbôbôk ô nga bôô vôm be nga tub andil. 5Ayene Yésus a nga yene mbunane wop, ane a nga jô mbôbôʼô na: A mon, mam abé môé me nto njaman . 6Beyem bekalate bʼéziñ be nga to valé, be nga ke ba sili e minlem miab été na: 7Amu jé môte nyuna a kobô avale di? ke a ta Zambe! za éziñ a ne ngule ya vaa minsem, sesale ve Zambe étam? 8Eyoñe Yésus a yemeya été été e nsisim wé été na ba simesane nalé e minlem miab, ane a nga jô be na: Amu jé mia simesan avale mame te e minlem mienan été? 9Jé foʼo ja dañe tyiʼibi? ye jô mbôbôʼô na: Mam abé môé me nto njaman , ye ke na: Tebeʼe tetele, nyoñe ôkala wôé, ô téé dulu, ô ke? 10E nde amu mi tuʼa yeme na Mone Môt a bili ngule ya jamé mam abé e si ndône mu, ane a nga jô mbôbôʼô na: 11Wo ma jôô nye, tebeʼe tetele, nyoñe ôkala wôé, ô ke e nda jôé! 12Ye a nga tame suu nkobô, a kôlôya ke si, a nyoñe ôkala, a téé dulu e mise me bôte bese. Bôte bese be nga kam angôndô, be nga ve Zambe duma, be jôʼô na: Avale di, bi bi ngenan te tame yene de môse mfe.

Yésus a loone Lévi

(Mt 9:9-13; Lk 5:27-32)

13Ane Yésus a nga beta téé a zu kui nsaʼa mañ. Ane ndulu bôt ase a nga zu be nye; a nga yeʼele be. 14Eyoñ a lôte nalé, ane a nga yene Lévi, mon Alfé, a too si e wofis ya ésaé ba yaʼane betoya. E nde a nga jô nye na: Tôñe ma. Ane a nga kôlô si, a tôñe nye. 15E nde da zu bo na Yésus a jaʼa bidi e nda Lévi valé, abui benyoñe toya a mbia be bôt, be fe be jaʼak, fufulu a Yésus baa beyéʼé bé. Be mbe foʼo abui, ba ba zu ba tôñe nye. 16Eyoñe Beyeme bekalate a Befarizieñ be yeneya na baa be mbia be bôt a benyoñe toya ba di vôma wua, ane be nga jô beyéʼé bé na: Nalé a boban amu jé na baa benyoñe toya a mbia be bôt ba di a nyu fufulu? 17Eyoñ Yésus a wôʼôya nalé, e nde a nga jô be na: E bôt be ne mvoʼé be nji yi dokita , ve minkôkon étam. Me nji zu loone bezôsôô be bôt, ve bebo abé .

Ajô étyi bidi

(Mt 9:14-17; Lk 5:33-35)

18Mbôl beyéʼé be Yôanes a Befarizieñ be mbe be tyi bidi, e nde be nga zu jô Yésus na: Jé ja bo na beyéʼé be Yôanes a Befarizieñ be be tyi bidi, ve beyéʼé bôé kik be teke tyi? 19Ane Yésus a nga sili be na: Ye bôt be ne nloon ya zu e dina abôʼaluk be ne ngul ya tyi bidi nté ba be nluʼu minga be ngenan be too? Nté ôse be ngenan be bili nluk e zañe jap, be se ngul ya tyi bidi. 20Ve melu ma ye fe bo, éyoñ nluʼu minga a kôlôya be be, môs ôte ñwô ñhe ba ye tyi bidi. 21Môt éziñ a nji beté mfefé abaka e ntuʼu ngômesan, nge ba bo nalé, mfefé abaka ô viane mane limiti a nyab ntuʼu ngômesan, nyaban ô nga ke wo nenenen. 22A teke môt éziñ a loé mfefé woon e minnôm mendeʼe bikôp; nge da bo nalé, woon a ye bo na mendeʼe mete me tôlé, woon a mendek, bise ve wu ntuk. Ba loé mfefé woon ve mimfefé mendeʼe bikôp.

Beyéʼé ba tyam atiñ sabbat

(Mt 12:1-8; Lk 6:1-5)

23A nga bo na, Yésus a lôtôk e zañe mefub bidi, beyéʼé bé be nga ke ba wondé mefes e zenezen. 24Ane Befarizieñ be nga jô nye na: Tame yen ane ba bo jam e nji yian e môse sabbat! 25E nde Yésus a nga jô be na: Ye mi mi nji lañ, e jam David a nga bo, éyoñ a biya njuk, a nga wôʼô zaé baa be bôte be nga too nye nsamba? 26A nga ke nyiin e nda Zambe, éyoñ éte Abiatar nye a too Ntuni Nnen, a nga di fembé mimveane Zambe, e nje é ne étyi môte mfe te di, vengevenge ve betuni, ane a nga ve fe e bôte baa be nye be nga too. 27Ane Yésus a nga jô be na: Sabat e nye a nga boban asu môt, ve sa ke môt asu sabbat. 28Nalé ate Mone Môt e nye a jôô jaʼane môse Sabat.

Currently Selected:

MARKUS 2: BULU09

Highlight

Copy