MARKUS 1

Yôanes Babtist

(Mt 3:1-6,11-12; Lk 3:1-6,15-18)

1Atataʼa Mbamba Foé Yésus Krist,

Mone Zambe, e nde di,

2aval ane e ne ntilan e kalate nkulu mejô Ezayi na:

O lôô, ma lôme nlômane wom

ôsu wôé na ô ke kôme wo zen .

3Tyiñe môt éziñ ja ke ja yôtan fé été

é jôʼô na:

Kômane zene Nti.

Sôʼane mezene mé,

me bo zôsôô ne tiiññ.

4Nalé Yôanes a mbe e fé été a du bôt,

a kañeteʼe fe ajô nduan ya nkôñelane minlem

asu njamane mam abé .

5E nde ñhe mfaʼa si ôse ya Yudé ô mbe ô zaʼa be Yôanes a bôte bese ya Yérusalém be kele duban e mendim me Yordan, be meme mam abé map. 6Yôanes a nga beʼe ngômesan é to ntiñan a mimvote mi tite kamel, kandé ékôb é tii nye angeteñ, a jaʼa ke ve bitandak a wôé ya mefan. 7E nde ñhe a nga bo a kate bôt Foé a jôʼô na: E môt a zu me mvus a dañe me ngu, me nji bi nkôñ, jaʼane ve abim ya lumbu e si a tiine nye nkole besilefas. 8Mfaʼa wom, me me nga du mia a mendim, ve nye ki a ye du mia a Mfufub Nsisim.

Yésus a duban

(Mt 3:13-17; Lk 3:21-23)

9E nga bo melu mete na, Yésus a nga so e Nazarét ya Galilé, ane Yôanes a nga du nye ôsôé Yordan été. 10E nde e nga bo na, Yésus a kôlôʼô foʼo e mendim été, a nlôô ane yôb da salé, Nsisim a suse be nye aval ane zum. 11Ane tyiñ é nga so e yôb été na: Wo ô ne mone wom ma nyeʼe, me ne ngunguan a wo.

Yésus a tôbane meveʼele

(Mt 4:1-11; Lk 4:1-13)

12Eté été, Nsisim a nga tindi nye na a ke e fé été. 13E fé été wé, tañe melu mewôm menyiin, Satan a veʼeleʼe nye. A nga too baa betit ya mefan, da beéngele be zaʼa toñe nye.

Yésus a taté ésaé e Galilé

(Mt 4:12-17; Lk 4:14-15)

14Eyoñ be biya Yôanes, e nde Yésus a nga ke e Galilé, a kele a kañete Mbamba Foé Zambe, a jôʼô na: 15Eyoñ é kpwaaneya; Ejôé Zambe é nto bebé: kôñelaʼane ñhe minlem, mi buni Mbamba Foé.

Yésus a loone beyéʼé bʼôsu

(Mt 4:18-22; Lk 5:1-3,10-11)

16Eyoñ Yésus a mbe a womôlôʼô kindiʼi mañe ya Galilé, ane a nga yene Simon baa André, monyañe Simon, ba ke ba wua mvunda ôsôé ôsôé, amu be mbe beyobe kos. 17E nde a zu jô be na: Tôñane ma, ma ye bo mia bedutu bôt. 18Eté été, ane be nga wua mevot e si, a tôñe nye. 19Eyoñ a beteya subu ôsu mone nté, ane a nga yene Yakob baa monyañe wé Yôanes, bone be Zébédé, be kôme mvunda jab éfunga été, 20e nde fe a nga loone be été été. Ane be nga lik ésaa wob Zébédé baa bebo bisaé éfunga été, ve kôlô a ke tôñe nye.

Yésus a liti ngule jé e Kapernawum

(Lk 4:31-37)

21E nde be nga ke kui e tison ya Kapernawum. A e Sabat ôsu a nga tôñ valé, ane Yésus a nga nyiin aba Zambe, a nga yeʼele. 22Ane bôte be nga semé ñyeʼelane wé angôndô, amu a nga yeʼele be aval ane nyô a bili ngum avale ngul éziñ, teke bo ane beyeʼele metiñ bap. 23Môt éziñ a nga bili mbia nsisim a nga too aba Zambe été valé, e nde a nga yôtane tyiñ yôp, 24nye na: Bia be wo bi nee za ajôô, a Yésus ya Nazarét? Ye ô zuya jiane bia! Ma yeme za nye ô né, ô ne Mfufub ya Zambe. 25Ane Yésus a nga bôé mbia nsinsim mvam a jô wô na: Dib anyu, kui atan, ô kôlô e be môt ate. 26Eyoñe mbia nsisim ô seʼeseya nye a ngu, môt a nga kpwemetan, e nde fe ô nga tat étua ngule ntat, ane mbia nsisim ô nga kôlô be môte ate. 27Ane angôndô a nga bi be bese, be ve bo feʼe ne vema, môt ase a siliʼi nyô mboʼo na: Avale jame dina e ne aya? mfefé ñyeʼelan, vʼane môt a bili ntum éjôé. Jaʼane mimbia minsisim a jôô mie, mi ve wôʼô nye. 28E nde ñhe jôé dé e nga wum a mialane vôm ase été été a yian afôla seseʼe ya Galilé.

Yésus a saé ntyi minga Simon Pierre

(Mt 8:14-15; Lk 4:38-39)

29Mvus éte, nné ane be nga kôlô aba Zambe, e nde baa be Yakob a Yôanes be nga ke nsamba wua e nda be Simon baa André. 30Ve da, ntyi minga Simon kik a bôô si, a kone tit, nyôl ayôñ ane nduan. E nde be nga jiʼa de ke kate Yésus. 31Ane Yésus a nga ke, a bi nye wo, a bete nye si, ane ayôñ e nga mane nye nyô, a nga belane be.

Minkôkon ya mvuse Sabat

(Mt 4:24; 8:16-17; Lk 4:40-41)

32E nde mame ngôʼé, éyoñ jôb e dimeya, be nga zuu minkôkon mise e be nye, a ba be bili mimbia minsisim. 33Ngumba tison ôse ô zu ñhe foʼo ngunubu e mbé yôp. 34A nga saé akon mevale meva, a vaa mimbia minsisim abui, teke kañese na a ve mimbia minsisim fete ya kobô, amu mibien mi mbe mi yeme nye.

Yésus a kôlô e Kapernawum

(Mt 4:23; Lk 4:42-44)

35A ndib-ndib tyé, éyoñ éte dibi e ngenan, ane Yésus a nga kune kôlô si a dañ atan, a ke vôm bôt be mbe momo, a nga yeʼelane valé. 36E nde Simon a bôte baa be nye be mbe nsamba be nga ke ba jeñe nye. 37Eyoñ be keya yene nye, ane be nga jô nye na: Ke bôte bese ba jeñe wo! 38Ane a nga jô be na: Nkelane vôm mfe, e beta be mal be ne bebé va, me ke ma kañete foé wé, amu jam ma te kui de atan e nde te le. 39Ajô te a nga ke a kate Foé Zambe e meba me Zambe map, a afôla ese ya Galilé, a titaʼane fe mimbia minsisim.

Yésus a saé nzezam

(Mt 8:1-4; Lk 5:12-16)

40Ane nzezam ô nga zu be Yésus, ô nga yeʼelane nye, meboñ me kutu si a jô na: Nge wo kômbô, ô ne ngul ya bo me mfuban . 41E nde Yésus a nga ko nye éngôngo, a same wo wé, a nambe nye, a jô nye na: Ma kômbô foʼo, boʼo mfuban ! 42Ane zam é nga mane nye nyôl été été, nye ve mane bo mvoʼé . 43E nde a nga kobô nye a ayok a jiʼa suu nye, 44a jô nye na: O tabeʼe ntye, te kate môt jam éziñ, kele foʼo ve be Ntuni, ô liti nye nyôle jôé, ô ve fe biôm Môze a nga tiñeti, mfaʼa ntunan ya nyôle jôé, e bo ngaa be bôte bese na ô nto mvoʼé . 45Ake nye ke a nga ke, ve zu ñhe viane kañete de abui abui, a mialane de vôm ase; nalé ate Yésus a nji fe beta bo ngul ya nyiine tison éziñ été e éngengeñ, ane a nga viane ke a tabe atan mefôla me ne teke minlam; bôte bese be nga ke be nye be soʼo mimfaʼa mise.

Currently Selected:

MARKUS 1: BULU09

Highlight

Copy