METIAS 28

Yésus a wômô soñ

(Mk 16:1-7; Lk 24:1-8; Yoa 20:1-2; Sam 16:8-10; Mm 2:24-32; Rm 1:3; 4; 4:25; 1 Ko 15:1-28; Nli 1:17,18)

1Mvuse sabat , ndibe tyé, môs ôsu ya sondô, Marie ya Magdala a nga ke fombô soñ baa Marie mbok. 2Ateme na beta mfôʼôsane si a nga boban, e ne na: Engele Nti a nga sis a soʼo yôp; éyoñ a subuya bebé soñ, a nga biʼiti akoʼo fefe a tabe de yôp. 3A nga yené ane feleves, a ngômesane jé é mbe éfumulu ane sut. 4Ane bebaʼale be nga tyibelan amu woñ be nga ko nye a be nga bo ane mimbim. 5Nde éngel a nga nyoñe nkobô a jô binga na: Te koone woñ, ma yeme foʼo na mia jeñe Yésus nyô be nga tyelé krôa yôp. 6A nji bo va, a wômôya foʼo ane a nga jô, Zakan a yenane vôm a nga bôô. 7Kelan avô a katane beyéʼé bé na a wômôya miñwuan a mi lôô a keya mia ôsu e Galilé; mia ye yene nye wé. Mi lôô me kateya mia foé. 8Be nga ke avô a liʼi soñ, njalan a woñ, mbundaʼan a abui mevak, be mateʼe asu ya kate beyéʼé bé foé. 9Ateme na Yésus a nga tôbane be a jô be na: Mbôlane wé. Be nga subu nye bebé, ve bi nye mebo a kute meboñe si asu dé. 10Ane Yésus a nga jô be na: Te koone woñ; kela katane bobenyañe bam na be ke Galilé, nne ba ye yene ma wé.

Foé bemombô soñ

(Mt 27:62-66; 28:1-6)

11Be ngenan be kelek, ateme na, bôte bʼéziñ ya bebaʼale soñ be nga nyiin e tison a kate betuni benen e mam mese me nga kui. 12Ba be bemvendé be nga sulan ésok, éyoñe be maneya bi abime moné da yian, be nga ve nye bezimbi 13be jôʼô na: Jôʼane na beyéʼé béé be nga zu wube nye alu bi too ôyo. 14Nge ngovina a wôʼô jame te, bia ye bo nye na a yebe njôane te a mia mia ye bo te tyelé minleme yôp. 15Eyoñe bezimbi be nyoñeya moné, be nga bo ane be nga yeʼele be. Njôane wu ô nga mialan e be beyude a kui e môse wu.

Beta abendé

(Mk 16:12-20; Lk 24:13-53; Yoa 20:19-29; 21:1-24; Mm 1:1-12; 1 Ko 15:6,7)

16Beyéʼé awôm a wua be nga ke e Galilé, e nkôle Yésus a nga bendé be, 17éyoñ be yeneya nye, be nga kute meboñe si ve be sôʼane fe. 18Eyoñ a subuya be bebé, Yésus a nga kobô a jô be na: Ngul ése é maneya vebane be ma e yôb été a e si nyô. 19Kelane ñhe a boʼone meyoñ mese beyéʼé mi duu be e jôé Esaa a Mon a Mbamba Nsisim, 20mi yeʼele be ane ba yiane baʼale mam mese me nga bendé mia; mi lôô me ne a mia môse mise akekui amané ya si nyô.

Currently Selected:

METIAS 28: BULU09

Highlight

Copy