Oze 13
13
Matna handjaf suma a kak djangûna ki Ma didinina
1Ata yima suma Efraim-ma a de zlad’ina,
suma pet a le mandarâ.
A hle yazi akulo yam andaga d’a Israel-la,
wani a kud’or Bäl, zlad’a vaziya, a bo.
2Ki tchetchemba, a nga le tchod’a,
a nga i avogovogo,
a nga yor angus ahlena ki kawei ma hapma,
a nga yor fileina ki lem mazid’a pet.
Ni sun nda sama d’alâ mi lat kabomba.
A nga de kat ala:
Ar suma a nga mba kahle suma ngat buzunina
a sop vun gor amuhl ma a yorom máma.
3Kayam ndata, a mba mbut
d’igi amborogei d’a yorogod’a na,
d’igi mbad’ï d’a ti ge ndjö ti gas seid’a na,
d’igi mbirlim mba ti tor hububu ma ata yima to awuna woid’a na,
d’igi andos ma mi buzuk kei akulo yam azid’ina na mi.
4An ni Ma didina Alo magina
ei yam andaga d’a Ezipte-d’a dei,
agi wagi nga alo ma ding ngi, ni an tu.
Ma sut ma ding nga d’i, ni an tu mi.
5An wagï ni hur ful
ma yam andaga d’a so d’a gangrasina.
6Ata yima an hagi tena ndak yam mei magid’ina,
agi hobogiya, agi hlagi yagi akulo.
Ni kayam ndata ba, agi maragi kanu.
7Ni kayam ndata ba,
an ni mbut d’igi azlona na kagiya,
d’igi sindilâ mi bur suma kä glovot na mi.
8An nga ni lad’agi d’igi ambur urs
sa a yot grotnid’a na,
an nga ni zagagi hurugi woyo,
an nga ni kizagagi woi
d’igi azlo d’a ti kizak ahlena woi d’a na,
amburei suma abageina a mba kizagagi woi kikizek mi.
9Agi Israel-lâ, agi b’lagagi woi
ni kayamba agi kagagi djangûna
ki an ma ni ndjunuginid’a.
10Amul magi ma mi sud’ugina
mi nga ni lara ge?
Magi suma nglo suma avorogi suma a
tagagi lovotina a nga ni lara ge?
Ni agi ba, tchenen ala:
Ang hami amulâ ki suma nglo suma avoromina d’uo zu?
11An hagi amuleina ni kayîna;
ata yima an hurun zalâ,
an yogizi woi mi.
12Tchod’a hi suma Efraim-mid’a, a b’irit nga kä;
tchila mazid’a, a ngomot nga kä mi.
13Ndaka mba d’i nde kazi ni d’igi vuta ti nde yam atchad’a na.
Azi ni d’igi gor ma yam nga d’uo na na.
Ata yima yam ma vuta nda’â,
nga mi ndeï woi kur asum mbi.
14An mba ni prud’uzi woi ata yima azuleina zu?
An mba ni prud’uzi woi abo matna zu?
Ang matna, tugud’ei mang nga tcho d’a tchi matna
ti nga ni lara ge?
Ang yima azuleina, ad’engêng nga ang b’lak ki sumid’a
ti nga ni lara ge?
We hohoud’a dap vita iranu.
15Le andjafâ hi Efraim-ma nga mi i avogovok aduk b’oziyoma pî,
simetna mba mi tcholï abo ma yorogona,
ni simet ma tcholï hur fulâ ata Ma didinina.
Mba mi som mbiyo mam ma laud’a woyo,
mba mi sid’amam golong mamba woi mi.
A mba hurumum ahle mam suma guzuzi kal teglesâ mi.
16Suma Samari-na zlad’a mba d’i vaziya,
kayam a kak djangûna kAlo mazina.
A mba tchazi avun ayîna,
a mba ndjirebezi grozi suma gureina woyo,
amiyôzi suma wirâ, a mba zazi huruzi woi mi.
Currently Selected:
Oze 13: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
