Proverbios 24
24
1Máko ko kukueñu ini ro ja ka kuu maa ñayii ka sa'a ja u'vi ma,
te ni máko ndiyo ini ro ja kondikin tna'a ro ji'in i,
2vaa ini anua i ma chi nanimaa ja jin sakui'na i
xi jin sa'a ndeva'a i ka ñu'u ini i,
te ndimaa tnu'u ndeva'a ka ka'an i.
3Ñayii ndichi ma chi jani va'a i ve'e i ma,
te ka iyo va'a ñayii ve'e i ma, vaa jini i nawa sa'a i ma,
4vaa jini i naxe koo ini ve'e i ma,
te ndimaa ja vii ja va'a neva'a i ve'e i ma,
vaa ñu'u kaji ini i.
5Ñayii ndichi ma chi ni'i‑ka i tnu'u ndee tnu'u ndatnu
naxe ko sa'a ko kuu i ma,
vaa jini i te jáku'ni ini i nde a kúu ja va'a sa'a i ma,
6vaa tee ki'in jin kanaa ji'in in‑ka ñuu ma
chi onde kani vava'a ini de naxe sa'a de ma,
sukan‑va'a kundee de nuu ñuu kanaa ji'in de ma,
te onde kakan‑tnu'u de nuu tee ka jini‑ka ma,
te jin ka'an jin kachi tee ma nuu de ma,
sana kundee de nuu ñayii kanaa ji'in de ma.
7Ñayii so'o te ndee ini i ma
chi masu na tnu'u ndichi neva'a i ja ka'an i
ora iyo nawa ka ndatnu'u tna'a ñayii ma in tnu'u kanuu ma,
vaa masu ni'i ini maa i nawa ka'an i ma.
8Ñayii ñu'u ini ja sa'a i ja u'vi ma
chi masu kua'a‑ni kivi te ka jini ñayii ma
ja masu ñayii sa'a ja va'a kúu ñayii yukan,
vaa ndimaa ja u'vi ñu'u ini i ja sa'a i ma.
9Nanimaa ja u'vi ñu'u ini ñayii ndee ini ma
ja sa'a i te jiso kuechi maa i,
te ndaka ñayii ma, masu ka kunimani i nuu ñayii sa'a sukan ma.
10Ñayii xtaya ora kénda kua'a tniñu nuu i ma
chi ja ñatuu kaa ndee ini i kúu.
11Nú ni jini ni ja iyo yika in ñayii ma
ja ka iyo ñayii ka kuni ja jin ka'ni i ñayii yukan ma,
te chindee ni i ja na kaku i ma, sukan‑va'a ma kûu i,
12vaa visi na ka'an ni:
“Masu ni ka jini kuiti sa ja sukan ko kuu ma”,
¿jani ini ni ja masu jini iya jini nawa jani ini o ma
te ma ndakan ya kuenda te ndachunaa ñayii ma nawa sa'a i ma?,
vaa nde'ya ya onde ini anua ni a, te jini ya ndaka,
te ndataa ya nuu ndi‑in ndi‑in o ja va'a xi ja u'vi ni ka yo sa'a o ma.
13Sa'ya maa ri, skua'a‑ka tnu'u ndichi ya te kuni ro
ja ja va'a xeen kúu.
Sukan vixi jaa nduxi ñuñu ma, sukan kuni asi ro.
14Vaa tnu'u ndichi a chi ja va'a kúu i,
vaa chíndee i anua o a,
te nuna ndani'i o tnu'u ndichi a
chi iyo tnu'u kanu ini te masu na in xnaa ña'a,
te ni'i o ja ndetu o ma.
15Máko ko kani ini ro ja u'vi ja kúu ñayii sa'a ja va'a ma,
ni a ko xnaa ro ve'e nuu iyo i ma,
16vaa visi uja jichi na kotuu i, kovaa ndone'e ña'a Su'si ma,
kovaa ñayii ka sa'a ja u'vi ma chi jin kotuu i te jin skenaa i maa i.
17Te ni másu ko kutachi xeen ro nú ni jini ro
ja ndimaa skenaa ñayii ñatuu kúnimani nuu ro ma,
18vaa Su'si ma chi masu játna ini ya ja sukan ko sa'a ko kuu o ma,
vaa nuna kuni ya ja sukan sa'a o ñayii yukan
te su'va ndunda'vi ini ya i te masu ndakiti‑ka ini ya nuu i.
19Máko ndakiti ini ro nuu ñayii ka sa'a ja u'vi ma,
te ni másu ko kukueñu ini ro ja sukan ka sa'a i ma,
20vaa ñayii sa'a ja u'vi ma chi masu kee va'a i,
vaa sukan‑ni ndá'va ñu'u ma, sukan‑ni nda'va i.
21Sa'ya maa ri, koyu'u Su'si o a ji'in tee kúu rey ma,
te máko kondikin tna'a ro ji'in ñayii so'o xeen ka ndaa ma,
22vaa masu jin kunitnuni maa i,
sani te Su'si ma xi tee kúu rey ma jin xndo'o jin xneni ñayii yukan,
te ni masu jini o nde a ko kuu tnundo'o jin ni'i jin tna'a maa i
ja sukan so'o ka ndaa i ma.
23Tnu'u ya'a ka ka'an tna ñayii ndichi ma:
Masu va'a‑ni ja tee ja'nde tniñu ñayii ma,
te kuji'in de ji'in jaku ñayii kenda koo nuu de ma,
te ma ka'nde ndaa de tniñu in‑ka ñayii ma.
24Vaa ñayii ká'an ja masu na kuechi ndiso ñayii ni sa'a ja u'vi ma
chi masu va'a‑ni ja sukan sa'a i ma,
te ndaka ñayii ñuu ma jin ka'an u'vi i ja kuu ñayii yukan,
te jin saxiko ña'a i.
25Kovaa tee ka ja'nde tniñu ma,
nuna jin xndo'o de ñayii ndiso kuechi ma
chi ke koo va'a‑ka de,
vaa ndaka ñayii ma chi jin ka'an va'a i ja jin kuu de.
26Vaa ñayii ká'an tnu'u ndaa tnu'u ndija ma
chi jin kutoo xeen ña'a ñayii ma,
te onde jin chitu i yikinuu ñayii yukan ja sukan va'a ini i ma.
27Xinañu'u ndásatu'va ni ñu'ú ni ma ja chi'i ni tata itu ni ma,
te ndata'vi ndasaka ni te koo tu'va,
sani te kuu tetna'a ni sa'a ni ve'e ni ma.
28Másu ko ka'an ni ja kuu in‑ka ñayii ma, nú ñatuu jini ni,
te máko ko kava tnu'u yu'u ni.
29Máko ko ka'an ni sa'a:
“Onde ndasa'a o ñayii yukan sukan ni sa'a ña'a i ma,
onde ndachunaa o te ndakuni i sukan ni sa'a ña'a i ma.”
30Ni ya'a sa itu ñayii kuxi ma ñayii ñatuu ndása'a kuenda ma,
31te ni jini sa sukan ni ja'nu yi'i, ni ja'nu tnu‑iñu ni‑ka'nu ini itu i ma,
te ni ndi'i yuu kúu koo yu'u itu i ma ni ndatnana.
32Te ja sukan ni jini sa ma,
te ni jakin sa cuidado te ni tava'a va'a sa ini anua sa a,
vaa ni ndasa'a sa kuenda,
33ja nuna kani ini o ja ndatatu o nunuu‑ni,
te ndachiyo'o o nda'a o te kusu o,
34chi kona'a o ja masu kua'a‑ni,
te kenda tnu'u nda'vi tnu'u kee ma nuu o
sukan kénda in tee ndiso xeen ja ka'ni ña'a de ma.
Currently Selected:
Proverbios 24: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
