Proverbios 2
2
Ñayii jan‑ta'vi tnu'u ndichi Su'si ma chi ko kuu i in ñayii ndichi
1Sa'ya maa ri, nuna kuan‑ta'vi ro tnu'u ka'an ri a
te ûni sa'a ro sukan tátnuni ri nuu ro a,
2te nuna koniniso'o ñukuun ro tnu'u ndichi ká'an ri a
te ni‑yu'u ni‑ini ro katanuu ro ja ko kuu ro ñayii ndichi,
3nú ni‑yu'u ni‑ini ro kakan‑ta'vi ro nuu Su'si ma
ja na taa ya tnu'u ndichi maa ya ma
te na sa'a ya ja na jaku'ni ini ro,
sukan‑va'a ko kuu ro in ñayii sa'a ndaa sa'a ndija,
4te nú ûni na ndanduku ñukuun ro tnu'u ndichi ká'an ri a
sukan ndánduku o in xu'un yinee yu'u ma
te ndeya'vi xen‑xeen i ma,
5sani te jaku'ni ini ro nawa kúni Su'si ma ja ko sa'a ro ma,
te jaku'ni ini ro ja jiniñu'u ja koyu'u ro Su'si ma,
vaa iya ndákan kuenda kúu ya ma.
6Vaa Su'si ro Iya Tátnuni ma kúu iya táa tnu'u ndichi ma
te sa'a ya ja jaku'ni ini ro ndaka.
Vaa maa ya kúu iya jini ndaka tu'u naxe iyo ñuu ñayivi a.
7Te chukan kúu ja ñayii ni‑yu'u ni‑ini i ndikin i ya ma
te ñatuu ni‑in ja u'vi sa'a i ma
chi ñukuun jito va'a ya i,
te chíndee ya i nawa ka kuni i ja jin sa'a i ma.
8Te ñayii sa'a ja va'a ja ndaa ma
chi suni ñukuun jito ya i nde kuan koo ve koo i ka kuu i ma,
te sa'a ya ja ndimaa ka iyo va'a i nuu ya ma.
9Ndasa'a maa ro kuenda sukan va'a ini ya a,
sani te jaku'ni ini ro sukan ko sa'a ro ja va'a ja ndaa ma
ji'in ndi‑in ndi‑in ñayii ma,
te ndimaa sukan ko sa'a ko kuu ro nde kua'an nde vee ro.
10Vaa sukan, te koo tnu'u ndichi ma ini anua ro a,
te koo sii ini ro, te kutachi ro ja jini ro ja va'a ja ndaa ma.
11Ja katanuu ro tnu'u ndichi ká'an Su'si ro a
te ni'i ini ro ja ko sa'a ro ja va'a ma,
te maa i ko koto va'a ña'a, te masu nawa ndo'o ro.
12Ja koo tnu'u ndichi ma ini anua ro a
chi chindee ña'a i ja másu ko sa'a‑ka ro ja u'vi
sukan ka sa'a ñayii inundee ini ma ja ndimaa ja u'vi ka ka'an i ma.
13Vaa ka xndoo i ichi va'a ichi ndaa Su'si ma
te kuan koo maa i ichi nuu nee,
ichi nuu masu ka jaku'ni ini i ja ja u'vi kúu ja ka sa'a ka kuu i ma.
14Vaa ñayii yukan ma chi ka jatna ini i ja ndimaa ja u'vi ka sa'a i ma.
Te ûni ka sa'a i in viko ja ka kutachi i
ja ni ka kundee i ni ka sa'a i ja u'vi ma.
15Vaa masu ichi va'a ichi ndaa kúu ichi kuan koo i ma,
su'va ichi nuu jin skenaa i maa i kúu ma.
16Kovaa ro'o chi nuna katanuu ro tnu'u ndichi Su'si ro a
chi masu kundee ña'a kúneé kú‑uun ja vivii ká'an ña
ja kúni ña ja xnda'vi ña'a ña ma;
te kaku ro nuu ja u'vi ma.
17Vaa ña'a yukan chi ni ndunaa ña sukan ni skuiso ña nuu Su'si ma,
te xnda'vi ña yii ña ma, tee ni tnanda'a ji'in ña ma,
te kívi nduu ña ji'in in‑ka tee ma.
18Chukan kúu ja tee tnii ichi ja ki'in de ve'e ña'a yukan ma
chi kuenda tnu'u ja ni tnii ichi maa de
kua'an de ichi nuu kûu de ma kúu.
19Tee ka kivi nduu ji'in ña'a yukan
chi ja ka nduku maa de kúu ja jin kûu de,
te onde yukan‑ni ni ka kenda koo de te jin skenaa de maa de.
20Kovaa ro'o chi nuna ko katanuu ro tnu'u ndichi ká'an Su'si ro a
chi ko kaka ro ichi ndaa ichi va'a
ka jika ñayii ñatuu‑ka na ja u'vi ka sa'a i ma.
21Vaa kona'a ro ja ñayii ni‑yu'u ni‑ini i ndikin i Su'si a
te sa'a i ja va'a ja ndaa ma
chi koo i ni‑kani ni‑jika nuu ñu'ú ká'an maa ya ma.
22Kovaa ñayii ndimaa ja u'vi ka jatna ini i ja jin sa'a i ma
chi kene'e nda'a ya i,
te masu kua'a ya tnu'u ja jin koo i
nuu ñu'ú jin koo ñayii ka sa'a ja va'a ma.
Currently Selected:
Proverbios 2: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
