Roomma 12
12
Pauroofa andeeqasee nirana mariranara naamuaqinau.
1Oo qini qikaqaafasaauqa, Anutufa inniara amuqusirana faqa amiqi amiqirana faqa firaaqoo marinara afeekaikamandee qeeqa qimuqusa ookiqari inni qimannimidaqa innee inneeqa marirana nipata aandau tatufiranara foora Anutuna amiaqa, Anutuna ufamau fidaqa mina aidira ainaina andeeqasee marirana mina mina amiaqa. Miqiqa inniqa Anutunara innaaru qirafa amooqirafa anoonaikiannoo. 2Minara irisee maaqimmiaqa sia maa maqa maaqanasaa mariasa naanna raaqa. Innee eedoo qifanoo Anutufa inni nitikura amiqimmasee firaaqoo quandanniseenoo naunduraki nirana faqa quandannisaannoo. Innee miqimmaseeqa Anutuna irirana faqa Anutuna aidirana faqa amiqiranee qimariana faqa idaaqiranee qimariana faqa amiqimandee irifaranoo.
3Qinee Pauroosa Anutufa afaarida nimimari ainainara irisee maaqi qidaqa. Innee sia inneeqara amiqirausee qimasee firaaqoo inneeqa nimooqiaqa innee andeeqasee reendeenamaseeqa inneeqa nimana kai irirana iriaqa. Aiqamausa náriara qidaqa Anutufa faiqí anaasee dadaaqira nimirana irisee mina amana kai nariqa kai iriaqa, sia noori uqeerasee inneeqara firaaqoo irirana faqaasee qiaqa.
4Maasa qipata moomoo ati ootupanoo maridanoo. Mi ootupara atisa naadu naadu ainaina quqee mariasa maridaqa. 5Maasa miqirausa maridaqa asauku mundiranasaa ootupaqa marunausa moomoosa naadu naadu nipata atiara foora mariasa moodaa qipatara foora mafiqa Yisunaindi maridaqa narisaa narisaa atooaqa maridaqa narisaa narisaa mundiqa mariaqeera.
6Minara maasa aiqamausa irisee nariara nariara aadu aadu akoofasaiki marinna ainaina marasee minannai Anutufa nimuna akoofasaikirana amana kai minannai kai aiqamausa narí dadaaqi narí dadaaqiaqa. Anee Anutunaindaraa ufa irisee faiqí anaasee ufa qimannimi marianafa maridana, Anutufa narí saqarikirana amuna mina amana kai qimannimia. 7Anee dadaaqimarianafa akoofasa maridana doo misa dadaaqia. Anee ufa akoofasa maridana doo mina ati qimannimia. 8Anee reendeenamandee fuki faaki qirana akoofasa maridana doo miqimmia. Faiqí anaasee moo fannoo narí akaqa nimira ainaina akaqausa raina nimidanoo sia akoo akaa ida nimia, oori inaa inaa ida nimia. Anee faiqí anaasee rakisi marinafa maridana anee faqa eeraaramasee ainainia. Faiqí aanaaseera qimudaoo qimasee dadaaqi mariasa sia nikoo nikaa mandeeqa miqia, asasammandee oori inaa inaa idana dadaaqiaqa.
9Inniki nariara nariara nimuqusirafa inniqa nimuqusannai kai nariara nariara nimuqusiaqa. Innee aiqama manda mariranara fidiaqaamasee amiqira marirana kai rakisisimma qumaraaqa.
10Innee aiqama asauku mundirana mandaaqaqa mariasa minara irisee nariara nariara qikaqaafasaa fee qimasee nariara nariara nifaaqasaa aqoondiara foora nariara nariara andeeqasee ridaqa asasiaqa. Inneeqa niqoonnanara maasa uriqararanee qimasee maqee maqee mina auqu kooroo qia.
11Innee inneeqa oosana oosana ainainiranaki maridaqa nimudaanai qimaseeqa kadaapiruaqa sia kudoosaapaaqa. Inniqa nimuqusaki karaambaiqara nidirafa qumbiqanoo marinaqa mina ainainammidee qidaqa asasamandee mi kadaapina riqa fuaqa.
12Innee Yisufa qumuaninnanara afeesidaqa asasidaqa kai mariaqa, maqee maria kadaapirira ummaarafa rafaaqafinaqa naundura asooamasee kasooqaqee ubiqafiqa reendeenamasee kaqi kai minaki fuaqa, maqee maqee innee aiqamausara faqa aiqama ainainara faqa innaaru qimannisaaqa.
13Innee niqoonausa Yisuna ufa irimariasa nana ainainaree sarau imariasa inneeqaindi misa faqa rainasee naida nimiaqa. Sia qafee marinna aanaamurufa faqa anirainana amiqi amiqimandee maaqa aminanoo tootooqiranaki fuani.
14Faiqí anaasee akaqausa Yisuna ufasaara nárí niqifaqa innee quandakinaqa sia minara iriaqa amiqi amiqira afaaqooqa kai qimannisaaqa, sia niquraraaqa amiqi amiqima nisaaqa.
15Faiqí anaasee akaqausa asasifaqa innee faqa dadaaqiqa asasiaqa. Faiqí anaasee akaqausa ummaara narinaqa ikiraqaifaqa innee faqa dadaaqiqa ikiraqaaqa.
16Aiqama narinni narinni maridaqa moodaanaki kiqa maridaqa aqoondikidaqa mariaqa. Sia innee inneeqara uriqararausee amiqirausee qimasee noori uqeeraaqa. Kaqiqeesa ooreeqararausa faqa aqoondi kiaqa. Sia misa ooreeqararausara noori runusee noori uqeeraaqa.
17Moo fasiqa anaasee fannoo ani mandaikammamaqainana sia anee mina akiaqara mina mandaikammamaqa, aiqama fasiqanaasee amiqira oosanee qimariana, mi oosanna amanamasee mi oosanamau kai fuaqa.
18Anee aiqama fasiqa anaasee faqa asooaranaki kai mariaqa, misa sia amanaikifana aneennakai kafaa kafaa amanida qafaa.
19Moo fannoo ani arinoo mandaikammamaqainana sia anee mina akiaqara arua, Taikara aukuana Anutuna aanoo irafa minasaa mariannoo fee qimasee miqoo minnisaa. Tamummaqara fasiqa akara minara maaqi qinoo maridanoo.
Karaambaiqa maaqi qinoo qinee mandainaina akiaqara nimianaura, ani arifaqa qeeqa kai mina akiaqara qianaura.
20Kafaa moo fannoo maaqi qinoo.
Ani namuqaa fannoo aararee marinana narana kaqi amia.
Nammariara mifa aidinana kaqi amia. Anee miqinana aneenna amiqira iriranannai asaurirana mina aminnaranoo.
Qinee Pauroosa minara mi tamummaqara fasiqana ufamau fuaqeera qimannimidaqa.
21Faiqí anaasee mandainaina fannoo sia inni rafaaqa fuani, inneeqa amiqira oosanannai misa mandoosana rafaaqafuaqa.
Currently Selected:
Roomma 12: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
