YouVersion Logo
Search Icon

Aaquqira Ufa 27

27
1Anee duna auqararee qinna ainainnara sia qimasee aneenna amooqia. Anee maqee kambiqaaninna ainainnara sia irimariananoo.
2Sia aneenna amooqia, saina moo aanaamuru fannoo ani amooqiani.
3Furufarira fasiqa fannoo firaa umaarara ainaina auqaidanoo. Mi ummaarafa ooni umaara faqa nukuda umaara faqa uriaaqaranoo maridanoo.
4Aanoo qirafa faqa aranaqarafa faqa mandainaina maridanoo. Aqoonnanara rairai qirafa misa firaafa maridanoo.
5Manda ainainaki mari fasiqanara qaoo qirafa minara aidirana uriaaqaranoo maridanoo. Mifa sia ani aidirana qafaani.
6Anee aaqamasainanoo ani aqoondi fannoo ufannai aidafuma aminafa mifa andeeqara aqoondi mariannoo. Namuqaa fannoo unnaqimasee amooqira ufa moomoo anisaa quqaannoo.
7Faiqí moo fannoo amuaqu inoo marinanoo kaaqa adiafaa imarina ookasaasa anoona aminanoo minnisaannoo. Faiqí moo fannoo aarara marifa sukaqee mari narannara adiafaa irafee qimasee kaqi naannoo.
8Faiqí moo fannoo narí maaqa quqasee aiqama tinai nimarifa ufini aanna raidanoo narí aanaamukiqari quqasee furufara inoo aiqamai nidanoo.
9Afundimari ainainna afaaqai akusaananoo afunda afaaqai ifanoo aundura asasidanoo. Aneenna aqoondi amiqira aamuaqira ufa qiaminanoo mi aamuaqira ufafa amiqira afundara foora ani rafaaqafuannoo.
10Aneenna aqoondi faqa aneenna akoona aqoondiara faqa sia qaunua. Anee umaaraki aqufinana sia aneenna nianai mari akaqaafasaanara dadaaqiannee qia. Aneenna adeedi mari aqoondifinnai oonurainanoo mifa ani dadaaqiannoo.
11Qini qimaaku anee irirana faqaafa marinaqa qinee asasianaura. Yafee aniara qini diqifaqa ani irirana mau fiqa misa rafaaqafuanauree qinanee.
12Irirana faqaafa mandainaina anifanoo iriseenoo amaaraidanoo. Irirana siaifa kaqi oonurama minaki aqufinoo ummaara maraidanoo.
13Anaamurundari sia irimarinna fasiqafa aniree qinana munnimma aminana anee furufarirafa mariananoo. Miqimari furufarira fasiqafa dapi maraqa nua aanaaseena munnimma amisee maraanoo.
14Anee aneenna aqoondi kananaana afaurirna findifinana firaaqoo faaqa rumasee amandeenana mina aquraree mariananoo.
15Aaku rikari kapatu fannoo aqufidanoo sia taikaidanoo. Manda anaasee fannoo mina kaukaata qirafa kapatu aanna raidanoo.
16Anee ufai qumanee rafaaqa fidanee anee fadameena aki mariana asaukuki qumaraidanee, sia. Miqi kai inana sia amana mi aanaaseena kaukaata qirana rafaaqa finnaranoo.
17Qumi faqa saasuna faqa marasee narisaa anrisaa anainanoo afaidaannoo. Faiqí moo fannoo narí aqoondi faqa moodaaqoo marida narí qimami narí qimamiafanoo ufa fannoo narí dadaaqi narí dadaaqinoo andeeqaannoo.
18Anee murisaa amiqimmasee rakisinanoo irainana anee tiqisee neennaranoo. Miqi kai inoo ainainira faiqi fannoo narí uriqararana ainainasaa amiqimmasee rakisinafa uriqarafa mariannoo.
19Faiqí moo fannoo nammari afainni kikiqammafi narí oori afiri nammariki qafaidanoo. Mifa narí mariranara faqa iriranara faqa iriseenoo miqirafa maridanoo fee qiannoo.
20Faiqí moo moo kuqimariafanoo sia kuqira maqa maaqa umbiqaidanoo, kaqi kai kuqida maridaqa. Miqi kai inoo sia amana faiqí narí aidirana aiqama afaqanoo munu taikaannoo.
21Idannai koora faqa siruaa faqa tasirisirimmasee amanammasee qafaidaqa. Miqi kai iqa faiqí marirafa kai faiqiara kooroo idanoo.
22Anee furufarira fasiqa kuqa ariara foora masainanoo sia mina furufarirafa minaki marifa taikaannoo kaqi mariannoo.
23Anee aneenna sipsipasaa faqa burimakausaa faqa amiqimmasee rakisia.
24Ani munnimma fannoo sia kisaaqasaa mariannoo. Maqasaa karaambaiqa aiku asauku sia kisaaqasaa marifaranoo.
25Ani andanda kisaaqaikinana ateekasainanoo fuka andanda kambiqaani.
26Anee aneenna sipsipa asausinnoo aneenna qamunna auqua. Anee aneenna mimmi akaqana nimisee minasaaqaraa munnimma marasaannananno maqa feefauria.
27Aneenna mimmi akaqafa kaqi marina naamma anoona tatisee anee faqa aneenna faiqi namu faqa aneenna dadaaqi maria manaaqausa faqa naaqa.

Currently Selected:

Aaquqira Ufa 27: bjr

Highlight

Share

Copy

None

Want to have your highlights saved across all your devices? Sign up or sign in