Yoohanee 13

Yisufa narí faiqi namu niku namari uqu ufafa.

1Anutuna ainnaaqarara qoomaqa adeedi ramafufanoo Yisufa maa maqana quqasee doo narí akoofinai firafa adeedi reemarufanoo minara Yisufa irimarinau. Maa maqa maaqanakinaasa narisaa atooqeemariasara amuqusufanoo ridanoo kaqi misara aidimarufanoo fidanoo kasaaqai munu kuqinau.

2Yisufa narana eendaki sakasaida narí faiqi namufaqa neemarinau. Yudasifa Keerioota maqusaindaraafa indaaruqaa Simoona amarana amaaku mifa Yisuna faiqi namufaqa miqoo marufa faasai Sadannafa mina dadaaqufanoo Yisunara ueeqararee qidanoo deedaqimarinau. 3Anutufa aiqama afeeka innaaruna faqa maqa faqa Yisuna aramandunnai quqaqoofanoo marufanoo Yisufa mina irida marinau. Narí Anutufinaindari qumufa iridanoo marinau. Narí kaifaa Anutufinnai ooru firafa adeedi ranoo marufanoo minara faqa irida marinau. 4-5Yisufa narí faiqi namufaqa narana namaseenoo findifinoo narí siuta raipaqusee taura qumareenoo narí aranandauqanna rumbaseenoo difaani maraseenoo nammari minaki adiaseenoo narí faiqi namu niku nammaruqusaidanoo taurannai rukannimaqeemarinau.

(Yisufa maru aukuana mina maqannaa oosana maaqimminoo marinau. Faiqí moo fannoo moo maqusaindari narí aqoondi qafararee qimasee ani mina maaqaki keeqafinanoo maaqa akoofa mi fasiqana qafeenoo narí ainainira fasiqa ureeqarana aaramasee qimaminoo anee maa fasiqana aiku nammaruquseenana taura qumaree rukasainanoo ooqumariani. Mi oosanna niku nammaruqira saika sia uriqararausa maree mariqau ureeqarausa faaqu fasiqa fooqaasa miqimariqau.)

6Yisufa Simoona moo auqu Peetooroona aiku nammaruqirarufanoo Simoona moo auqu Peetooroofa qinau. Oo Karaambaiqa kuqaa fee anee qini qiku nammaruqiraree qidanee. Sia miqia, anee uriqararafa mariananoo.

7Yisufa qinau, Eeoo nammari uquanaura anee maqee sia qini oosana irimariananoo kasooqaqee irinnaranoo.

8Peetooroofa qinau, anee maasa uriqararafa mariananoo naaru naaru sia uqanna qini manda qiku nammaruqua.

Yisufa mina iriseenoo qinau. Qinee ani aiku sia nammari uquanana maaqooqari anee sia qini faiqikinnaranoo.

9Simoona moo auqu Peetooroofa mi ufana iriseenoo qinau. Oo karaambaiqa sia qiku kai nammaruqua qisauku faqa qikiaqa faqa aiqama nammari uqua.

10Yisufa mina iriseenoo qinau. Faiqí nammari auqeemariasa aiqama nifaaqa amiqinoo maridanoo niku kai doona kookoomma akinoo maridanoo. Innee aiqama amiqiqa mariafanoo moodaa fannoo mandaikinoo marifaqa qafaidaqa. 11Yisufa faasai narí ueeqee maruna qafaidanoo miqi qinau. Inni nifaaqa aiqama nammari uqinoo maridanoo. Moodaa fannoo kai sia nammari auqara fee qinau. Narí ueeqaaninnanara iriseenoo miqi qinau.

12Yisufa narí faiqi namu niku nammari uquseenoo kafaa narí siuta afisumaree kafaa misa faqa ooqumari finoo qimanniminoo qinau. Qinee inni niku nammari uqunnanara iridee sia fee iridee. 13Doo maqee mina nammari uqunnana oosana kooroo ianaura. Innee qiniara ufasaa rakisira fee karaambaiqee qimariafanoo. Doo mina kuqaa qimariafanoo qinee miqirausa maridaqa. 14Qinee inni ufasaa rakisirausa inni karaambaiqa maridaqa ureeqarausa saika mareemariana misa naanna raidaqa inni niku nammari uqidaqa innee miqi kai iqa qini daanna reeqa ureeqara fasiqa anaaseera foora narí dadaaqi narí dadaaqiaqa. 15Qinee uqannifiqaunnana qafeeqa qinee unandee kai iaqanani. 16Qinee kuqaa anoona ufa inni qimannimidaqa. Ainainira fasiqa fannoo sia narí rakisirana uriqararafa maridanoo. Ufa maree fimari fasiqafa sia aqiqeemarina uraaqararafa maridanoo. 17Innee maqee maa ufana anoona naaqooki irimariafanoo. Innee maa ufana irisee auqaifanoo asasirafa mariannoo.

18Yisufa kaifaa narí faiqi namu maaqi qimasee qimanniminau. Anutuna tamummaqara fasiqauqa ooqeenaa akara oosana maaqimminoo maridanoo.

Innikiqari moodaa fannoo qini narana qini faqa neemarifa mifa qini namuqaakinoo aranaiqi daruannoo.

Maa akarana oosana inniki kambiqaannoo, sia inni aiqamara qidaqa. Qinee oonu mareeqee qeeqaindika maqaunausa mariafanoo moodaa fannoo kai. 19Qinee maqeesaa qimannimidaqa sia kambiqai kamuqoo qimannimidaqa. Kambiqainaqa innee qiniara irifaranoo. Qinee qeeqaraa ufa qunausa doo misaki maridaqa. 20Qinee anoona ufa kuqaa qimannimidaqa. Faiqí anaasee moo fannoo qinee inni niqiqamaqaanausa niqoondikinafa qini faqa qiqoondikidanoo. Faiqí anaasee moo fannoo qini qiqoondikamma qimaqainafa qini diqiqamaqoona faqa kai aqoondikidanoo.

Yisufa narí uqeeqeefandinna ufana kooroo u ufafa.

(Mat 26:20-25; Mak 14:17-21; Ruk 22:21-23)

21Yisufa minara qimanniminsoofanoo narí aunduraki oonumafi irufanoo amuqusufanoo kafaa kooroomasee qimanniminau. Qinee anoona ufa qimannimidaqa innikiqari moo fannoo qiniara ueeqaannoo.

22Yisuna faiqi namu mi ufana iriseeqa tautumakufaqa narí qafee narí qafee idaqa randaqau. 23Yisuna afaaqasaa aqoondi fannoo mina aaqa ooqumarifi marinau. 24Simoona moo auqu Peetooroofa mi fasiqana auqamaseenoo qinau anee karaambaiqa irammirisee iria. Yafasiqanaree qidanoo fee yafee ani ueeqaannoo fee.

25Miqi qufanoo mi fasiqafa Yisuna aaqa firambaqafufanoo maqandanai irammirinau Karaambaiqa yafee ani ueeqaannoo fee. 26Yisufa qinau, qinee feemu rakeemandeeqa sauna anoona fooqaanaki raaraamandee amianana qafa. Mifa kai qini ueeqaannoo. Miqi qimasee Yisufa feemu rakeemaseenoo sauna anoona fooqaanaki raaraameeqeenoo Yudasifa Keerioota maqannaa Simoona amarana amaaku aminau. 27Yudasifa mi feemuna qumarasee namasoofanoo doo Sadannafa mina aundurai keeqanau. Miqufanoo Yisufa Yudasina qimaminoo qinau. Doo anee aneenna inna ainaina doo dauni dauni ia. 28Miqoo marusa sia Yisuna ufa oosana iriqau. 29Yudasifa Yisuna faiqi namu munnimmasaa rakisimarufa marufanoo Yisufa aqiqoofaqa misa narana aina fi fi maraanifeera aqiqee maqi qiqau. Kudi fasiqauqa munnimma nimiannoo fee qiqau.

30Yudasifa mi feemuna mara namaseenoo findimeeqeenoo aaqee kai eendaki raudamaki finau.

Yisufa fuka aaquqira ufa qimannimu ufafa.

31Yudasifa fufanoo Yisufa kaifaa narí faiqi namu qimanniminoo qinau. Doo maqee faiqí nimaaku qini amiqi amiqira afeeka eeraarirafa doo kooroo inoo maridanoo. 32Anutuna afeeka eeraarirafa qinisaa kooroo inoo maridanoo, Anutufa narí uqanna quandaki qini qifaaqa firaaqoo areenaannoo, qusasaa maqee uqanna miqiannoo. 33Qini faiqi namu sia kisaaqasaa inniki marianaura. Yuda maqannaa qimannimiafannandee kai inni qimannimidaqa. Innee qiniara randee sia paqurifaranoo. Qinee fuannaqoo sia innee amana fifaranaoo. 34Doo maqee qinee fuka aaquqira ufa qimannimidaqa. Innee nariara nariara nimuqusidaqa nariara nariara ruaqa. Qinee inniara qimuqusufaqa inniara rimariqia innee faqa qini daanna raaqa nariara nariara ruaqa. 35Innee nariara nariara rimarifaqa aiqamausa inni nindafeeqa inniara boo Yisuna faiqi namu miqidammiafoo qiaqa.

Yisufa Peetooroofa nariara qaoo qianinna ufana kooroou ufafa.

(Mat 26:31-35; Mak 14:27-31; Ruk 22:31-34)

36Yisufa miqi qimasoofanoo Simoona moo auqu Peetooroofa irammirinoo qinau, Oo Karaambaiqa anee yai fee finaqee maasa sia ani faqa fuanauree.

Yisufa iriseenoo qinau, Qinee maqee fuanannai anee sia amana qini faqa finnaranoo, kasooqaqee anee qini faqa finnaranoo.

37Simoona moo auqu Peetooroofa iriseenoo qimaminau, Karaambaiqa anee naqi naqee qinee sia ani faqa fuanauree. Qinee aniara kuquanauranoo. 38Yisufa mi ufana iriseenoo qimaminoo qinau, Kuqaa fee anee maqee qiniara kuqinnaree, qinee anoona ufa ani qimamidaqa fafaa eendaki kookooraana sia ufa qinnakamuqoo anee kuqiranara rufiaseenana qaaramoo kari qiniara sia qafaunausee qinanoo kookooraana ufa qiannoo.

Currently Selected:

Yoohanee 13: bjr

Highlight

Copy