Yameesa 2

Qamunna afaaqainainara sia faiqí raina amana kai amiqi amiqia.

1Qini qikaqaafasaa mariasa. Asauku mundirafa Yisufa maasa karaambaiqa Anutuna kaaqa qarana uriqararafa maridanoo. Innee mina ufa iridaqa sia faiqí amiqira nifaaqa qafainnanara amiqira qamunna qafainnanara rainasee amiqira fasiqa fee qimasee minara amiqi amiqia, kafaa sia moona afaaqara manda fasiqa fee qimasee minara akoo akaa iaqa.

2-4Innee amaana maqaki suqufi keeqaifanoo moo fasiqa ainaina faqaafa amiqira afaaqa qamunna afisirafa asaukuki rinna marinafa keeqaannoo moo fasiqa qamunna anaqanaqirafa keeqaannoo, innee amiqira afaaqa qamunna faqaanara amiqira fee qimasee amiqira qoo mara quqasaifanoo ooqu mariannoo manda afaaqa qamunna faqaanara kaqi kikiannee qifanoo kaqi kikiqinoo mariannoo fee maqasaa fee ooqu mariannoo fee. Innee miqidaqa manda iriranannai faiqí rainee mariafanoo.

5Qini qikaqaafasaa mariasa qini ufa iriaqa. Anutufa ainaina siaisara rusandeesamu mandeenoo qafamaseenoo qumareeqeenoo narí saqariki mariasaki uriqararanaki mariaqeera narí innaaruna ququsa maraaqeera ainaina siaisa utaaqamannisaidanoo. Anutufa faasa nariara rimariasara niqafamasee qima afeekaikammasee innaaruna maqa maaqa nimiraree qimaqoofa maridanoo. 6-7Anutufa miqimasee ainaina siaisa uqeeraifaqa inneeqa ufannai rainannimaqaidaqa unnaqimasee misara maqasaa ooqu mariaqee qimariafanoo. Yafa yafee inni Yisuna ufa irimariasa mareeqee ufaki siaasinnai quqaida fee, ainaina faqaasa kai miqidaqa innee aaqaidaqa misara amiqira qoo ooqu mariaqee qimariafanoo. Anutufa inniara narí amaakundi fee qimaqoofa marifaqa ainaina faqaasa kai miqiasara manda fasiqee qidaqa Yisuna uriqararana aquraraidaqa fidiaqaammamaqaidaqa.

8-9Anutuna ququsakinaa ufa maaqi qimasee akara rinoo maridanoo, inneeqa niqoonausara inniqa nifaaqara foora nidianinani. Innee mi ufanamau fidaqa andeeqasee fifaranoo. Innee faiqí nifaaqa qamunna qafamasee rainee mariana mandoosana mareemariafanoo miqimarianara Anutuna sandufa fannoo inni rafaaqafidanoo. 10Faiqí moo fannoo Anutuna sandufa aiqama qumaree marinafa moodaa kai aaqamasainafa mifa Mooseena sandufa rukiee marifa maridanoo. 11Anutufa qinau sia innee faiqí anaasee narí qummuari narí qummuari iaqanani. Mifa kai innee sia faiqí anaasee kuqa naruaqee qinau. Anee sia anaasee qummuarinana kafaa quandaki faiqí arinana Anutuna sandufa rukiee marianafa mariananoo.

12Anutuna sandufa sia faiqí rumbee marifa maridanoo faiqí iduki marifa maridanoo Anutufa mi sandufanasaa kasooqaqee inni ufa iriannoo minara mandainainakiqari idukira kasiqa naanna ramasee andeeqasee maridaqa ufa qiaqa. 13Innee inneeqa niqoonausara sia nimuqusirana nimifanoo Anutufa faqa inniara faqa sia amuqusirana nimiannoo. Nariqa niqoonausara nimuqusidaqa dadaaqimariasa sia Anutuna ufara rufieefaranoo, amiqimasee marifaranoo.

Yisuna saqarikirana fifau ufannoo faqa asaukunnoo qumararanannai faqa mifa rainaidanoo.

14Qini qikaqaafasaa mariasa, faiqí anaasee moo fannoo nariara Yisuna saqariki marunausee qidanoo sia narí marirana akooroo idanoo mi fasiqana saqarikirafa fifau maridanoo. Miqi mandee saqarikinafa amanee naaru naaru marirana amiannoo fee, sia amana amiannoo. 15-16Qinee minara iridaqa moo ainaina kikiqa usuanaura. Inni nikaqaafasaa fee nisooqmaakee kuqaa sarauqimariasara qidaqa misa innee innannai aniree naranaree qamunnaree innaaru qifaqa innee sia nimiqa fifau nifaurukoo kai maaqi qia Anutufa inni amiqi amiqiannoo innee oonu qamunna afisusaifanoo inni nifaaqa tootoo qinaqa narana suqasee naaqa. Miqira ufa sia anoona maridanoo fifau ufa maridanoo. Anee kaqi kasinana nipatasaa sarauqi maria ainainna andeeqasee nimiaqaana. 17Yisuna saqarikirafa miqi kaimminoo maridanoo fifau afaurunnoo akaqaafasaara anee oonu qammunna afisusee narana naa. Miqira ufa sia akaqaafasaa dadaaidanoo. Miqi kai inoo fifau afaurunnoo Yisuna saqarikidee qinafa sia asaukunno Anutuna ufa qumarasee inafa marinana ani Yisuna saqarikirafa kuqinoo maridanoo.

18Faiqí anaasee moo fannoo minara qiannoo, anee Yisuna saqarikirana qumaree marianafa mariananoo qinee qisaukunnai Anutuna ufa qumaree marunausa maridaqa. Qinee Yameesasa minara maaqi qidaqa. Qinee naqimasee ani Yisuna saqarikirana qafaanauree asaukunnoo qumararafa sia marinaqa sia qafaanaura. Qinee Yameesasa qeeqa Yisuna saqarikirana qisaukunnai qumararana miqiqa inni uqannifiqaanaura. 19Anee fee aneennaraa kai fee Anutufa moodaa mari fee qimasee mi iriranannai kai anee amiqiranaki maridee qidanee. Oo amana innee afaannauqa ufa moodaamau aamasee qimariasa mariafanoo. Afaannauqa faqa Anutunara moodaa mari fee qidaqa nariqa mandainaina akiaqara narifandinnanara iriafanoo naaquqaidanoo naindiri raidanoo. 20Oo furufarira fasiqa anaasee asaukunnai dadaaqi qumararafa sia maridanoo Yisuna saqarikirafa narí kai miqoo marida fifau ainainara foora maridanoo. Qinee mi oosannara kafaa koorooianaura.

21Maasa qifaqnafa Abarahaamafa naqimaseenoo fee Anutuna faqa moodaanaki kinau. Narí asaukunnai narí faiqi Isakeena qumareeqeenoo qaindasaa tatufira aandau suqa amianeera quqoonannai Anutuna faqa moodaanaki kinau. 22Sia fee innee iridee. Abarahaamafa narí Anutuna saqarikirana faqa narí asaukunnai qumararana faqa miqandannoo narí dadaaqi narí dadaaqinau. Narí asaukunnai qumararafa narí saqarikirana dadaaqufanoo anoonaikinoo amiqinau. 23Minara akarakina kuqaa maaqi qinau, Abarahaamafa Anutuna aamuaqira ufa irisee kuqaa fee qimasee saqarikufanoo Anutufa mina qafamaseenoo oo andeeqara fasiqa mareenoo qinau. Miqi qimaseenoo Anutufa Abarahaamanara qini qiqoondi fee qinau. 24Doo innee Abarahaamana oosana qafamasee iriaqa, faiqí sia narí saqarikiranannai kaifau Anutuna faqa moodaanaki kidanoofau asaukunnai qumararanannai faqa moodaanaki kidanoo.

25Yeerikoo anaasee moo Raqaba nammarifa dapi nuaanaaseefa marinau. Mifa miqi kai inoo narí asaukunnai qumarasee iranannai Anutuna faqa moodaanaki kinau. Mifa Anutunara irisee Yuda maqannaa qaaraqanda nipuraraa fasiqaqara narí maaqaki mara kukeeqaseenoo kafaa mareeqeenoo moo aatata quqasoofaqa fiqau. 26Maa ufausa ati minara maaqi qinoo maridanoo. Faiqí amana sia marinanoo apata kai doo iri maridanoo kuqinoo mariannoo. Anutuna saqarikirafa naríara maridanoo miqinoo maridanoo asauku qumarasee inafa sia marinara doo kuqinoo maridanoo.

Currently Selected:

Yameesa 2: bjr

Highlight

Copy