Luk 20

'Nda Zozii 'la ‑kweliea 'wlʋlʋa 'lɛ bha?

(Mat 21.23-27; Mak 11.27-33)

1Clɩɩ bhlo Zozii ‑kʋa Laagɔpaakadiea* ‑zɔn, ɔ caa 'nyɩ ɔ saa 'lɛ ncɛlɩa Dɩnanɩa*. Na, ‑teyiyinyaa tocɩa ɩya ‑jlɩmazienyaa* ‑ya ncaakpasɩaa ya ci. 2Ma yɔɔ neencla lebhe: «Solu ‑anyɩ, ‑jioli saa nɩkplann ‑n nʋnʋa 'lɛ ‑anɩ ‑naa bha? 'Nyɩ ncaasaa ‑ɔ 'nyɩɔ 'dɛ 'la ‑jiolia bha?» 3Zozii ya maa neenŋonu lebhe: «‑Amʋ ‑ma, n 'ka anyɩ wɔɔkle bhlo neencla. A solu kaan, 4'Nyuwluzʋnyɔ Zaan 'la 'nyuwluzlulɩɛa, ‑laagɔɔn ɩ 'wlʋlʋ 'lɛ bha? ‑Ma ncɛlɩ wlɩɩn bha?» 5Na, maa bhlobhlo ya gugu, 'nyɩ ma yaa 'cla lebhe: «Gbazɩ ‑a ‑ka 'cla lebhe: ‑Laagɔɔn na, ɔ cɩ 'ka 'cla lebhe: 'Nyɩ 'lɩsaa 'la gbʋ a 'taa 'lɛ ɔla wɔlɩa ‑nʋawlɛ bha? 6'Nyɩ ‑a ‑ka 'cla lebhe: Ncɛlɩ wlɩɩn na, ncɛlɩa ‑tɛtɛa cɩ ‑anyɩ cɔkʋʋn bhutili. Sa, ma ‑lio ‑danʋfʋɛ le Zaan ‑glɩa Laagɔnekʋnyɩtɛnyɔ na.» 7Na, ma ya Zozii neenŋonu lebhe: «‑A 'ta ‑ci.» 8'Nyɩ Zozii ya maa 'cla lebhe: «‑Amʋ ‑ma, 'n solu 'ta anyɩ ‑jiolia nɩkplaan n nʋnʋ 'lɛ ɩmɩ ‑naa na.»

‑Ghlɛzɛɛnkwlaklʋlɩnya 'la ‑nyandla

(Mat 21.33-46; Mak 12.1-12)

9Na, Zozii ya ‑nyandlaa ‑naa bu 'nyɩ ɔ ya ncɛlɩa solu lebhe: «Nclɔɔ bhlo ya ‑ghlɛzɛɛnkwla golo, ɔ yaa lobholinʋnya wlɩɩn zʋ le ɔya maasɔ 'ka poli 'nyɩ ɔ ya lowluun mʋ le 'ka 'yɛpɩ ‑gwlɛlɩ. 10Daa ‑ghlɛzɛɛnsadaa ŋeni 'lɛ na, ɔ ya ɔla lobhoco bhlo 'kwlaa 'la 'klʋlɩnyaa 'bhlɩ lobhu le ma 'kaa ‑ghlɛzɛɛncaa ɔla da 'nyɩ. ‑Ma 'kwlaa 'la 'klʋlɩnyaa yɔɔ bhuti 'nyɩ ma ya ɔya wlɩɩ ‑kɔfɩa 'tli. 11Ɔ ya ‑awlɛ ‑buunlobhoco bhlo lobhu. Ɔmɔ ‑ma, ma yɔɔ bhuti, ma yɔɔ vla 'nyɩ ma ya ɔya wlɩɩ ‑kɔfɩa 'tli. 12Ɔ ya ‑awlɛ ‑mɔta ‑naanɔ lobhu, 'nyɩ ɔmɔ ‑ma, ma yɔɔ 'bhlabhlalɩ 'nyɩ ma yɔɔ 'tli. 13Na, 'kwlaa toa ya ɔcɩ 'cla lebhe: 'Lɩsaa n cɩ 'kaa 'lɛ nʋ bha? Ka n cɩ 'ka 'lɛ 'na ‑wawacoa lobhu. Ɔmɔ, ma cɩ sɛɔ zʋ. 14‑Ma, daa lobholinʋnyaa 'lɩ 'lɛ 'cʋa na, maa bhlobhlo ya wɔɔgugwie 'lɩ, 'nyɩ ma ya macɩ 'cla lebhe: Ɔmɔ ‑ɔ ‑glɩ 'lɛ ‑ajaalinyɔa. ‑A 'bhlɔɔ ɩya ‑ajaa 'ka ‑a 'na 'plɩ! 15Ma yɔɔ 'kwlaa 'la glɔa leen 'pa 'nyɩ ma yɔɔ 'bhla. Na, 'lɩsaa 'kwlaa toa cɩ 'kanɩ 'lɛ maa nʋ bha? 16Ka ɔ cɩ 'ka 'lɛ ci, ɔ 'ka 'lɛ lobholinʋnyaa ‑naa 'bhla ɩya ɔ 'ka 'lɛ 'kwlaa ‑buunnaanʋa 'nyɩ.»

Daa ma 'nu ɩmɩ ‑naa na, ma yɔɔ 'cla lebhe: «‑Wɔɔ ɩ cɩ 'ta sɛɛ 'plɩ 'pʋpʋ 'kʋ!» 17‑Ma Zozii ya maa 'ciinkope ‑aan 'nyɩ ɔ ya maa 'cla lebhe: «Ziewɔlɩaziewɔlɩa 'la wɔɔkle ‑naa ‑a cla 'lɛ lebhe: Cokwiea ‑paaslanyaa 'pa 'lɛ 'kwlaan na, ɛmɛ ‑ɛ 'plɩ 'lɛ ‑palʋa 'la lopolugbuducokwiea na, 'nsasa a sasalɩa 'lɛ ‑zɔn bha? 18Nclɔɔa ‑ɔ ‑cɩ ka 'lɛ cokwie ‑naa 'kʋ bhlili na, ɔ cɩ 'kɔtɔkɔtɔlʋ. 'Nyɩ ɔmɔa ɛ cɩ 'ka 'lɛ 'kʋ bhlili na, ɛ cɩɔ su.»

19Na, ‑jlɩmaacanyaa ɩya ‑teyiyinyaa tocɩa 'matɩa le ma 'kaa ‑mɔɔ dɩpɩa 'titi bhlogbɩɩ 'kubhlili, ‑ma ma ya ncɛlɩa 'la ŋanɔ 'gulu. Ma yaa sɛɛ cibhlili wɩaan le mala gbʋ Zozii bua 'lɛ ‑nyandlaa ‑naa.

Sezalɩ 'la ‑lapooa

(Mat 22.15-22; Mak 12.13-17)

20Na, ma dɩdɛa Zozii. Ma yɔɔ 'bhlɩ ncɛlɩa ‑ɔ nʋa 'lɛ lesaa ma ‑glɩa 'lɛ 'kʋnylugolunya na, lobhu le ma kaa 'mɔɔ 'gbuzu ‑zɔn 'paa ɩya ma 'kɔɔ goonvlaa ‑deliin fa. 21Ma yɔɔ wɔɔkle ‑naa neencla lebhe: «Canyɔ, ‑a ‑ci sɛɛ le ɩmɩa ‑n nyɩtɛ 'nyɩ ‑n ca 'lɛ na, ɩ ‑glɩ ‑nʋawlɛ. ‑N ‑pla 'ta ncaatɩtɩ, ‑ma Laagɔ 'la ‑gugwie n pala 'lɛ ncɛlɩ ‑nʋawlɛ nɩkplaan. 22Na, ‑jioli ‑nyɩɔ ‑anyɩ le ‑a ‑plʋ nyɩbhelʋ Sezalɩ 'la ‑lapooa bha? ‑Ma ‑a 'la ‑plʋ bha?» 23Zozii ya mala ‑kplakplaa cibhlili 'nyɩ ɔ ya maa 'cla lebhe: 24«A palakan ‑da 'dala. Ncaasaa 'la 'wlukle ɩya ɔla ŋlɩɩ ‑ɩ ‑kʋa 'lɛ 'kʋ bha?» Ma yɔɔ neenŋonu lebhe: «Sezalɩ 'nɩ» 25Na, Zozii ya maa 'cla lebhe: «'Dɛndlana, a 'nyɩnɩ Sezalɩ lʋʋa ‑ʋ ‑glɩ 'lɛ Sezalɩ 'nʋ na, ɩya a 'nyɩnɩ Laagɔ lʋʋa ‑ʋ ‑glɩ 'lɛ Laagɔ 'nʋ na.» 26'Nyɩ mala wɔlɩ tɔɔ 'kʋzilɩɛ mino, 'bhlɩnyaa 'ci kʋ. Na, nikpoo ya maa sla, neenŋonulɩɛa ɔ 'nyɩa 'lɛ maa na, 'la gbʋ 'nyɩ ma 'taanɩa ne 'lɩ ɩya ma 'ka nyɩtɛ.

'Kwɩɩnkʋbhue 'la cɩa wɔlɩ

(Mat 22.23-33; Mak 12.18-27)

27Na, Saduseyɛɛnnya* ‑zlʋsaasa ya Zozii ŋeni. Saduseyɛɛnnyaa cla le 'kwɩɩnkʋbhue 'ta ‑kʋ. Ma ya Zozii wɔɔkle ‑naa neencla lebhe: 28«Canyɔ, Moyizi ya ‑ala gbʋ zie lebhe: Gbazɩ nclɔɔ ‑ka ɔ bholia ‑ɔ cɩɩ 'lɛ 'ŋlɔ na ‑ka 'nyɩ ɔ ‑ka 'ku 'nyɩ ɔ 'ta 'cuo te na, 'naa ɔ 'cɩ 'kuzluŋlɔa ɩya ɔ 'nyɩ ɔ bholia valɩnɩkpla. 29Na, bholiecɩ ‑ngbɔɔsɔ ‑kʋa. ‑Bɛka ‑naanɔa ya 'ŋlɔ 'cɩ, ‑ma ɔ 'ta 'cilee valɩ 'nyɩ ɔ ya 'lɛ 'ku. 30‑Mɔsɔ ‑naanɔa 31ɩya ‑mɔta ‑naanɔa ‑ma, ya 'ŋlɔa 'cɩ, 'sɛtɛɛ bhlogbɩɩ ‑aan 'nyɩ maa ‑ngbɔɔsɔsɔa 'ta cilee valɩ 'nyɩ ma ya 'ku. 32Bhɩalɩdaa, 'ŋlɔa ‑ma, ɔ ya 'ku. 33Na, ŋlɔ ‑naa, ‑masa maa ‑ngbɔɔsɔa yɔɔ 'lɛ 'cɩ na, ma ‑ka 'kwɩɩnkʋbho na, maa nɩkplaan, ‑anɔsaa 'la ŋlɔɔ ɔ cɩ 'kakɩnɩ 'lɛ 'plɩ bha?» 34Zozii ya maa neenŋonu lebhe: «‑Laagɔzɔn ‑naa 'la ncɛlɩa, maa ‑ɔ cɩ 'lɛ 'ŋwlɛ ‑aana ŋodie. 35‑Ma, maa Laagɔ 'lɩ 'lɛ lebhe maya 'pʋpʋkʋa ‑ɩ ci 'lɛ 'yɛpɩ ɩya 'kwɩɩnkʋbhue ‑ŋwaan 'kʋ na, maya 'cɩcɩɛ 'tanɩ wɔlɩ kalɩ. 36Ma cɩ 'tanɩ 'ku, sa ma kʋnɩ le 'bhlaandleecɩa* 'bhisa: Ma ‑glɩ Laagɔ 'la 'cuo, sa ma ya 'kwɩɩnkʋbho na. 37'Nyɩ ‑ɩ ‑glɩ 'lɛ le 'ku cɩ 'ka 'kwɩɩnkʋbho na, Moyizi 'titi yɩɩ sua ‑ʋ ŋama 'lɛ na 'la cɩa wɔlɩa nɩkplaan pala, daa ɔ la 'lɛ ‑Kwlenyɔa Ablaamʋ 'la Laagɔ, Izakɩ 'la Laagɔ ɩya Zakɔpʋ 'la Laagɔ na. 38Laagɔ 'ta 'ku 'la Laagɔ ‑glɩ, ‑ma ‑jajanya 'la Laagɔ, sa la gbazɔ, maa 'fɩan ‑ja na.» 39‑Jlɩmaazienya* ‑zlʋsaasa ya wɔɔnyɩtʋ 'ma 'nyɩ ma ya 'cla lebhe: «Canyɔ, ‑n ya 'nanɩ nyɩtɛ.» 40'Nyɩ ma 'nyiglili 'taanɩa macɩ ɩya ma 'kaanɩa 'mɔɔ wɔlɩ bhlogbɩɩ neencla.

Laagɔ 'la ‑Sasanyɔa ɩya Daviti

(Mat 22.41-46; Mak 12.35-37)

41Na, Zozii ya maa neencla lebhe: «'Lɩsaa 'la gbʋ ma cla 'lɛ lebhe Laagɔ 'la ‑Sasanyɔa* ‑glɩ Daviti 'la 'cʋ bha? 42‑Masa Daviti 'titi, ɔ cla labhblɩfluwaa nɩkplaan lebhe: ‑Kwlenyɔ ya 'na ‑Kwlenyɔa 'cla lebhe: Kʋʋn 'lipasɔ 'kʋ sa 43ɩya n 'ka ‑naa ‑zɔbhɛlɩgbanyaa, ‑naa 'kʋnamʋnʋlʋʋ ple. 44'Nyɩ Daviti lanɩɔ 'lɛ ‑Kwlenyɔ na, 'nsasa ɔ ‑glɩglɩlɩnɩ ‑awlɛ 'lɛ ɔla 'cʋ bha?»

A 'la nʋa ‑jlɩmaazienyaa 'bhisa

(Mat 23.1,5-7,14; Mak 12.37-40)

45'Bhlɩnyaa ‑tɛtɛa ‑ɔ poa 'mɔɔ 'lɛ 'nyukwliin na 'ci 'kʋ, Zozii ya gɩlɩnyaa* 'cla lebhe: 46A zʋlʋ ‑jlɩmaazienyaa* pɔlɛ 'kʋ. Ma pla lokukadɩ nɩkplaan 'nyɩ mayɩɩsɩ ‑wa bilie, ma ‑wa le, 'clikpua nɩkplaan, ma 'pa maa ‑ayo 'nyɩ ma ‑wa bhibhiepalɩa* ‑zɔn ɩya 'tlɔnblɩ 'kʋ, 'kʋklʋunkpua 'kʋ sakʋlɩɛ. 47Ma ‑ɔ li 'lɛ 'kuzluŋwlɛ 'kʋ 'nyɩ ‑ɔ nʋ 'lɛ bhibhie ‑bliiblii nʋlɩɛ le ma 'ka maa 'lɩmʋ na, ma cɩ 'ka gbaylɩsalɩɛ 'kadie 'lɩ.

Currently Selected:

Luk 20: NTLD13

Highlight

Copy